Hebreos 4:1-16
4 ToTajtsin Dios techiluia ok uelis tikalakiskej kanin ye moseuia, ikinon matimomaluikan uan ijkon amo tikmopoliliskej tlen ye techiluia.
2 Porque tejuan noijki otechmatiltijkej kuali tlajtoli ijkon ken touejkatatajuan. Pero yejuan amo okinpaleui tlen okikakej porque amo otlaneltokayaj ijkon ken akinmej otetlakamatkej.*
3 Akinmej tikteititiaj titlaneltokaj tikalakij kanin ye moseuia. Tejuan ijkon tikmatij porque ye okijto: “Sapanoua onikualanki uan onikijto: ‘Yejuan amo kalakiskej kanin ne nimoseuia’”. Ye ijkon okijto maski yokitlamijka iteki ijkuak ayamo ikaj okatka.
4 ITlajtol toTajtsin Dios kijtoua itech tonal chikome: “ToTajtsin Dios omoseui ipan tonal chikome ijkuak okitlami iteki”.
5 Noijki kijtoua: “Amo kalakiskej kanin ne nimoseuia”.
6 Akinmej achto okintlapouijkej kuali tlajtoli amo okalakej porque amo otetlakamatkej.* Pero ok uelis kalakiskej sekimej.
7 Ikinon miak xiuitl satepan toTajtsin Dios okijto itech isalmo David ijkon ken yomoijto itech nin carta: “Amo xiyoltlakuauakan tla axkan nankikakij itlajtol”. Ye oksepa okitlali se tonal tlen itoka “axkan”.
8 Porque tla Josué kinuikaskia israelitas kanin moseuiskiaj, satepan toTajtsin Dios amo kijtoskia onka okse tonal.
9 Ikinon ok kajki tonal sábado para moseuiskej akinmej pouij itech ialtepe toTajtsin Dios.
10 Akin kalakis kanin moseuia toTajtsin Dios, kijtosneki yotlanki okichi iteki uan omoseui ijkon ken toTajtsin Dios omoseui ijkuak otlanki otekipano.
11 Ikinon matimochijchikauakan tikalakiskej kanin toTajtsin Dios moseuia. Ijkon amikaj makichiua ken akinmej amo otetlakamatkej.*
12 Porque iTlajtol toTajtsin Dios yoltok uan kipia chikaualistli. Okachi tlateki uan amo ijkon ken se espada tlen ojka tlateki. Kalaki toijtik uan kiteititia tlen tikpiaj toyolipan uan tlen tikpiaj panixko. Noijki kiteki kanin tisasalitokej uan kalaki ijtik chiauak tlen kajki ijtik toomio. Ueli kinextia tlen timokuayejyekouaj* uan tlen tikpiaj toyolipan.
13 Ixpan toTajtsin Dios amitlaj tlatitok. Mota nochi tlen okichijchi uan ye kita. Ijkuak techixkomakaskej tikiluiskej tlen otikchijkej.
14 Jesús iKone toTajtsin Dios uan ye teopixki tlen tlayekana. Ye okalak iluikak ikinon nochipa matitetlapouikan tejuan tikneltokaj.
15 Tejuan tikpiaj se teopixki tlen tlayekana uan kajsikamati tlen techpanoua. Nochi tlen ika techyejyekouaj noijki ika okiyejyekojkej pero ye amo otlajtlakolchi.
16 Matimotokikan itech itrono toTajtsin Dios tlen kitetliokolia tlen kuali, uan amitlaj matechtsakuili ijkuak tiktlatlaujtiaj. Ijkon techiknomatiskej uan techtliokoliskej tlen kuali ijkuak monekis techpaleuiskej.
Notas
^ Noso “otlauelkakej”.
^ Noso “otlauelkakej”.
^ Noso “otlauelkakej”.
^ Noso “timonejneuiliaj”.
