Hechos 17:1-34
17 Pablo uan Silas opanokej ik altepemej Anfípolis uan Apolonia uan oajsitoj Tesalónica. Ompa okatka se insinagoga* judíos.
2 Pablo okalak kanin yejuan okatkaj ijkon ken nochipa okichiuaya. Eyi sábados okinpaleui makajsikamatikan iTlajtol toTajtsin Dios.
3 Ye okinyekiluiaya uan okinmititiaya ika iTlajtol toTajtsin Dios, omonekiaya tlajyouis Cristo pero toTajtsin Dios kiyolitiskia. Okinmiluiaya: “Ne namechiluia Jesús ye Cristo”.
4 Sekimej otlaneltokakej uan opejki mouikaj iuan Pablo uan Silas. Noijki ijkon okichijkej miakej griegos tlen okiueyichiuayaj toTajtsin Dios uan miakej siuamej tlen oueyititokaj.
5 Pero judíos okintlauelitayaj ikinon okinnechikojkej sekimej tlakamej amo yolkualmej tlen san onentinemiayaj tiankisko. Noijki okinkuejsojkej akinmej ochantiayaj itech non altepetl. Satepan okalakitoj ichan Jasón uan okintemojtinemiayaj Pablo uan Silas para kinmaktiliskiaj akinmej omonechikojkej.
6 Yejuan amo okinmajsikej ikinon okintilantiajkej Jasón uan oksekimej tokniuan inmixpan tekiuajkej tlen ompa otlanauatiayaj. Chikauak okijtouayaj: “Nikan yikatej tlakamej tlen san tekuatlapololtijtinemij ipan nochi tlaltikpak.
7 Jasón kinkalotijtok ichan. Nochtin ninmej tlakamej amo kitlakamatij* tlen tlanauatia César. Yejuan kijtojtinemij onka okse tekiua itoka Jesús”.
8 Tekiuajkej uan oksekimej omomojtijkej ijkuak ijkon okikakej.
9 Jasón uan oksekimej tokniuan okinkajkajkej ijkuak okitlaxtlajkej tlen okintlajtlanilijkej tekiuajkej.
10 Non youak, tokniuan okintitlankej Pablo uan Silas altepetl Berea. Ijkuak oajsitoj, oyajkej itech insinagoga* judíos.
11 Pero nonmej judíos okatkaj okachi yolyamankej amo ken judíos tlen okatkaj Tesalónica, porque okiselijkej iTlajtol toTajtsin Dios ika nochi inyolo. Mojmostla kuali omomachtiayaj iTlajtol toTajtsin Dios porque okinekiayaj kitaskej kox melauak tlen okinmiluiayaj.
12 Ikinon miakej opejki tlaneltokaj. Noijki otlaneltokakej miakej siuamej griegas tlen okintlakaitayaj. Sekimej tlakamej noijki otlaneltokakej.
13 Judíos tlen okatkaj Tesalónica okimatkej Pablo otetlapouiaya iTlajtol toTajtsin Dios ompa Berea, ikinon oyajkej okinkuejsotoj uan okinkualanitoj akinmej ompa ochantiayaj.
14 Tokniuan san niman okiuikakej Pablo itempa mar, pero Silas uan Timoteo ompa omokajkej.
15 Akinmej oyayaj iuan Pablo okiuikakej altepetl Atenas. Satepan omokopkej okinmiluitoj Silas uan Timoteo, Pablo okinnauati san niman makajsitij.
16 Ijkuak Pablo okinchixtoka Atenas, sapanoua okualanki porque okitak itech non altepetl okinpiayaj miakej imágenes.
17 Ikinon itech sinagoga* opejki kinmachtia judíos iTlajtol toTajtsin Dios uan noijki akinmej okiueyichiuayaj toTajtsin Dios. Noijki mojmostla okinmachtiaya akinmej onemiayaj tiankisko.
18 Pero sekimej ixtlamatkej tlen okinmiluiayaj epicúreos uan estoicos omokualanijkej iuan Pablo. Sekimej omotlajtlaniayaj: “¿Tlen kineki techiluis nin tlakatl tlen san tlajtojtinemi?”. Oksekimej okijtouayaj: “Nesi kitematiltia makinmixmatikan dioses tlen oksekan kinueyichiuaj”. Ijkon okijtouayaj porque Pablo otetlapouiaya kuali tlajtoli tlen kijtoua akin Jesús uan otetlapouiaya kinyolitiskej akinmej yoixpolikej.
19 Ijkuakon okikitskijkej, okiuikakej itech Areópago* uan okiluijkej: “¿Uelis techiluis tlen kijtosneki nin yankuik tlamantli tlen titlamachtia?
20 Porque titlamachtia tlen amo keman otikkakiayaj uan tiknekij tikmatiskej tlen kijtosneki”.
21 Nochtin tlen ochantiayaj Atenas uan akinmej oualayaj itech okseki altepemej, okinpaktiaya kikakiskej noso kijtoskej itlaj yankuik. San non okichiuayaj ijkuak omajxiliayaj.
22 Ijkuakon Pablo omoketski itlajko Areópago* uan okijto:
“Tlakamej tlen nanchantij Atenas, nikita namejuan okachi nankinueyichiuaj dioses uan amo ken kichiuaj oksekimej.
23 Ijkuak oninemiaya itech nin altepetl, onikitak tlen nankiueyichiuaj uan onikitak se altar kanin ijkuilitok: ‘Nin iaxka Dios tlen amo tikixmatij’. Ne namechmatiltia akin non Dios tlen nankiueyichiuaj maski amo nankixmatij.
24 Non Dios okichijchi tlaltikpak uan nochi tlen ipan onka. Ye iaxka iluikak uan tlaltikpak ikinon ye amo chanti itech templos tlen kinchiuaj tlakamej.
25 Noijki amo kinmiluia akinmej chantij tlaltikpak makipaleuikan porque amitlaj kipoloua. Ye kichiua tinochtin matiyoltokan, kichiua matimijyotikan uan techmaka nochi tlen onka.
26 San ika se tlakatl okinchijchi nochtin tlen pouij itech altepemej para mamomiaktilikan ipan nochi tlaltikpak. Ye yokijto keman panos seki tlamantli uan okijto kanin chantiskiaj tlakamej.
27 ToTajtsin Dios ijkon okichi para makixmatikan akinmej mochijchikauaj kixmatiskej, porque ye amo oui tikixmatiskej.
28 Ye kichiua nikan matiyetokan, matimolinikan uan matiyoltokan. Ijkon ken okijtojkej sekimej tlakamej griegos tlen otlajkuilouayaj: ‘Tejuan noijki tiikoneuan’”.
29 “Tla tejuan tiikoneuan toTajtsin Dios, amo matikijtokan ye chijchitok ika oro, plata noso tetl. Amo matikijtokan ye mota ken itlaj tlen tlakamej kichiuaj ken yejuan mokuayejyekouaj.*
30 Yiuejkika miakej ijkon okichiuayaj pero toTajtsin Dios okintlapojpolui porque amo okimatiayaj tlen okichijtokaj. Pero axkan nochtin kinmiluia mamoyolkopakan.
31 Porque ye yokitlali se tonal ijkuak kinmixkomakas nochtin tlen chantij tlaltikpak ijkon ken moneki. Yokitlali se tlakatl tlen ijkon kichiuas uan yokiteititi ijkon panos ijkuak okiyoliti non tlakatl”.
32 Ijkuak okikakej Pablo okijto kinyolitiskej akinmej yoixpolikej, sekimej okipinauijkej uan oksekimej okijtojkej: “Okse tonal timitskakiskej”.
33 Ijkuakon Pablo oyajki.
34 Pero sekimej tlakamej opejki tlaneltokaj uan opejki mouikaj iuan Pablo. Se omotokayotiaya Dionisio uan ye okatka juez itech Areópago.* Noijki opejki tlaneltoka se siuatl tlen omotokayotiaya Dámaris uan oksekimej.
Notas
^ Xikita diccionario.
^ Noso “kiuelkakij”.
^ Xikita diccionario.
^ Xikita diccionario.
^ Xikita diccionario.
^ Xikita diccionario.
^ Noso “monejneuiliaj”.
^ Xikita diccionario.
