Hechos 22:1-30
22 “Nokniuan uan tetajmej, xikkakikan tlen nikijtos para nimopaleuis”.
2 Ijkuak okikakej okintlapouiaya ika hebreo, ayakmo itlaj okijtojkej. Pablo noijki okinmilui:
3 “Ne nijudío uan onineski* altepetl Tarso tlen kajki Cilicia. Pero nikan Jerusalén onechmachti Gamaliel. Onechmachtijkej maniktlakamati* nochi tlen kijtoua iTlanauatil Moisés. Nochipa nimochijchikaua niktekichiuilis toTajtsin Dios ika nochi noyolo ijkon ken namejuan nankichiuaj.
4 Onikintlajyouilti akinmej opouiayaj itech Ojtli tlen melauak uan onikchi makinmiktikan. Onikinkitskiaya tlakamej uan siuamej uan onikintsakuaya.
5 Tlayekankej uan teopixki tlen tlayekana uelis namechiluiskej melauak tlen nikijtoua. Yejuan onechinmakakej amamej tlen nikinmititiskia tlayekankej judíos ompa Damasco. Onia onikintemoto akinmej kichiuaj ken Jesús uan nikinualikaskia nikan Jerusalén makintlajyouiltikan”.
6 “Pero ijkuak yiniajsiskia Damasco uan yokatka kanaj tlajkotonal, se tlauili tlen oualaya iluikak onechualyaualo.
7 Ne oniuetsito ipan tlali uan onikkak ikaj onechilui: ‘Saulo, Saulo, ¿tleka techtemojtinemi?’.
8 Ne oniktlajtlani: ‘¿Akin tejuatsin noTeko?’. Ye onechnankili: ‘Ne niJesús Nazareno uan te techtemojtinemi’.
9 Tlakamej tlen nouan oyayaj okitakej tlauili pero amo okikakej akin onechtlapouijtoka.
10 Ijkuakon ne oniktlajtlani: ‘NoTeko, ¿tlen moneki nikchiuas?’. Ye onechnankili: ‘Ximoketsa uan xio Damasco. Ompa ikaj mitsiluis tlen moneki tikchiuas’.
11 Ne ayakmo onitlachiaya porque onechixmikti non tlauili, ikinon onechmatilankej tlakamej tlen nouan oyayaj uan ijkon oniajsito Damasco”.
12 “Ompa okatka se tlakatl itoka Ananías. Ye okichiuaya nochi tlen kijtoua iTlanauatil Moisés uan ompa nochtin judíos okitlakaitayaj.
13 Ye onechitato, omoketski nonakastlan uan onechilui: ‘¡Nokni Saulo, oksepa xitlachia!’. Ijkuakon oniajkotlachixki uan onikitak.
14 Ye onechilui: ‘InDios touejkatatajuan omitspejpenki xikixmati tlen ye kineki. Noijki xikixmati tlakatl yolkuali uan xikkaki itlajtol.
15 Porque omitspejpenki xiktematilti nochi tlen otikitak uan tlen omitsilui.
16 Axkan ¿tlen tikchia? Ximoketsa, ximoapolakti uan moneki tikneltokas itoka Jesús para toTajtsin Dios mamitstlapojpoluili motlajtlakol’”.
17 “Ijkuak onimokopki Jerusalén uan onimotlatlaujtijtoka templo, itlaj onechmonextili.
18 Onikitak Jesús uan onechilui: ‘San niman xikistikisa Jerusalén porque amo mitskakiskej ijkuak tiktematiltis akin ne’.
19 Ne onikilui: ‘NoTeko, yejuan kuali kimatij ne oniaya itech sinagogas,* onikinuitekiaya akinmej omitsneltokayaj uan onikintsakuaya.
20 Noijki noixpan okimiktijkej Esteban tlen omitstekichiuiliaya. Kuali onikitaya makimiktikan uan onikinmalui intlaken akinmej okimiktijkej’.
21 Pero ye onechilui: ‘Xio porque nimitstitlanis itech altepemej tlen katej uejka’”.
22 Akinmej ompa okatkaj okikaktokaj, pero satepan chikauak okijtojkej: “¡Xikmiktikan non tlakatl! ¡Amo kinamiki yoltos!”.
23 Yejuan chikauak otlajtouayaj, okitlamotlayaj intlaken uan okajkotlamotlayaj tlalpinoli.
24 Soldado tlen otlayekanaya otlanauati makikalakikan Pablo kanin okatkaj soldados. Noijki otlanauati makiuitekikan ika mekatl uan makitlajtlanikan tlen okichi. Ye okinekiaya kimatis tleka chikauak okijtouayaj makimiktikan.
25 Ijkuak yokilpijkej para kiuitekiskej ika mekatl, Pablo okilui tlakatl tlen okinyekanaya soldados: “¿Namechkauilia tlanauatil xikuitekikan se romano maski ayamo kixkomakaj?”.
26 Ijkuak Pablo ijkon okijto, non tlakatl okiluito soldado tlen otlayekanaya: “¿Tlen timokuayejyekoua* tikchiuas? Porque nin tlakatl romano”.
27 Soldado tlen otlayekanaya okitato Pablo uan okitlajtlani: “¿Melauak tiromano?”. Ye okinankili: “Kema”.
28 Soldado tlen otlayekanaya okilui: “Ne onimochi niromano porque oniktlaxtla miak tomin”. Pero Pablo okilui: “Ne niromano porque ijkon onineski”.*
29 Ijkuakon san niman okikajkej tlakamej tlen kiuitekiskiaj uan kitlajtlaniskiaj tlen okichi. Ijkuak soldado tlen otlayekanaya okimatki Pablo okatka romano omomojti porque okilpi ika cadena.
30 Ye okinekiaya kimatis tleka judíos okiteluiayaj Pablo, ikinon mostlatika okikajka uan otlanauati mamonechikokan akinmej opouiayaj Sanedrín uan teopixkej tlen otlayekanayaj. Ijkuakon otlanauati makitemouikan Pablo uan inmixpan okiuikak.
Notas
^ Noso “onitlakatki”.
^ Noso “manikuelkaki”.
^ Xikita diccionario.
^ Noso “timonejneuilia”.
^ Noso “onitlakatki”.
