Juan 15:1-27
15 “Ne melauak niuvajkouitl uan noTajtsin ye akin tlatoka.
2 Ye kitsonteki nomamayo tlen amo kitemaka tlakilotl. Pero kichipaua nomamayo tlen kitemaka tlakilotl para okachi matlaki.*
3 Namejuan yonanmochipajkej ika tlajtoli tlen onamechilui.
4 Nouan xiyetokan uan ne namouan niyetos. Imamayo uvajkouitl amo uelis kitemakas tlakilotl tla amo salitos iuan ikojyo. Namejuan noijki amo uelis nankichiuaskej tlen kuali tla amo nouan nanyetoskej.
5 Ne niuvajkouitl uan namejuan nanyetoskiaj ken nomamayo. Akin nouan kajki uan ne iuan nika, yetoskia ken kitemaka miak tlakilotl. Namejuan amitlaj uelis nankichiuaskej tla amo nouan nanyetoskej.
6 Tla ikaj amo nouan kajki, kitsontekiskej ijkon ken kitsontekij imamayo se kouitl uan uaki. Satepan kololouaj uan kitlatiaj.
7 Tla nouan nankatej uan tla nankichiuaj tlen nikijtoua, xiktlajtlanikan tlen nankinekij uan namechmakaskej.
8 Nankiueyichiuaj noTajtsin tla nochipa nankitemakaj miak tlakilotl uan tla nankiteititiaj namejuan nannodiscípulos.
9 Ne namechtlasojtla ijkon ken noTajtsin nechtlasojtla ikinon ximopaleuikan ika notlasojtlalis.
10 Tla nankichiuaj tlen namechnauatia, nanmopaleuiskej ika notlasojtlalis. Ijkon ken ne nimopaleuia ika itlasojtlalis noTajtsin porque nikchiua tlen nechnauatia”.
11 “Ijkon namechiluia para xipakikan ken ne nipaki, ijkon sapanoua nanpakiskej.
12 Ne namechnauatia ximosepantlasojtlakan ijkon ken ne namechtlasojtla.
13 Akin motemakas makimiktikan ipatka iyolikniuan kijtosneki sapanoua kintlasojtla.
14 Nanyetoskej noyolikniuan tla nankichiuaj tlen namechnauatia.
15 Ayakmo namechnotsa notlakeualuan porque se tlakeuali amo kimati tlen kichiua iteko. Namechnotsa noyolikniuan porque yonamechilui nochi tlen yonikkakili noTajtsin.
16 Ne onamechpejpenki uan amo namejuan onantechpejpenkej. Ne yonamechnauati xiakan uan xikchiuakan tlen kuali uan nochipa ijkon xikchijtokan. Ijkon noTajtsin namechmakas nochi tlen nankitlajtlaniliskej ika notoka”.
17 “Ijkon namechnauatia para ximosepantlasojtlakan.
18 Tla oksekimej namechkokoliaj, namejuan yinankimatij ne achto onechkokolijkej.
19 Akinmej amo kitekichiuiliaj toTajtsin Dios namechtlasojtlaskiaj tla inuan nanpouiskiaj. Pero namechkokoliaj porque ne onamechpejpenki uan amo inuan nanpouij.
20 Xikilnamikikan onamechilui tlakeuali amo okachi ueyititok ken iteko. Tla yejuan onechtlajyouiltijkej, namejuan noijki namechtlajyouiltiskej. Tla yejuan okitlakamatkej* notlajtol, namejuan noijki namechtlakamatiskej.*
21 Ijkon namechtoktiskej porque namejuan nannodiscípulos. Yejuan amo kixmatij akin onechualtitlanki.
22 Yejuan amo kintlajtlakoltiskiaj tla ne amo niualaskia uan tla amo nikintlapouiskia. Pero axkan amo uelis kijtoskej amitlaj intlajtlakol.
23 Akin nechkokolia noijki kikokolia noTajtsin.
24 Yejuan amo kintlajtlakoltiskiaj tla inmixpan amo nikinchiuaskia milagros tlen amo keman ikaj ijkon yokichi. Pero axkan yonechitakej uan nechkokoliaj uan noijki kikokoliaj noTajtsin.
25 Pero non opanok para mamochiua tlen ijkuilitok itech inTlanauatil: ‘Onechkokolijkej maski amitlaj onikchi’.
26 NoTajtsin namechualtitlanilis manamechpaleui espíritu santo tlen kiteititia tlen melauak. Ijkuakon espíritu santo kitematiltis akin ne.
27 Namejuan noijki xiktematiltikan akin ne, porque nouan nankatej desde ijkuak opejki nitetlapouia”.
