Juan 17:1-26
17 Ijkuak Jesús otlanki ijkon okijto, oajkotlachixki uan okijto: “NoTajtsin, yoajsik hora. Xikueyitlali mokone uan ijkon mokone mitsueyichiuas.
2 Tejuatsin otiktlali mokone nochtin makinnauati para makinmaka yolilistli tlen amo keman tlamis akinmej otikinmaktili.
3 Nochipa yoltoskej akinmej mitsixmatiskej san tejuatsin melauak titoTajtsin Dios. Noijki tla kixmatiskej Jesucristo akin otikualtitlanki.
4 Ne yonimitsueyichi nikan tlaltikpak uan yonikchi nochi tlen otechnauati.
5 NoTajtsin, axkan monakastlan techueyitlali ijkon ken monauak oniueyititoka ijkuak ayamo ikaj okatka”.
6 “Yonikinmatilti motoka akinmej otechinmaktili nikan tlaltikpak. Okatkaj moaxkauan uan otechinmaktili. Yejuan kitlakamatij* motlajtol.
7 Axkan yikimatij tejuatsin otechmakak nochi tlen nikpia.
8 Ne yonikinmatilti motlajtol uan yejuan yokiselijkej. Yejuan yokajsikamatkej mopatka oniuala uan yokineltokakej te otechualtitlanki.
9 Nimotlatlaujtia inpatka akinmej otechinmaktili porque moaxkauan. Amo nimotlatlaujtia inpatka akinmej chantij tlaltikpak.
10 Moaxka nochi tlen nikpia uan noaxka nochi tlen tikpia. Yejuan nechtlakaitaj”.
11 “Ne ayakmo niyetos nikan tlaltikpak porque monauak nias. Pero yejuan mokauaj nikan tlaltikpak. NoTajtsin tejuatsin tisanto, xikinmalui porque yejuan kipiaj motoka tlen tejuatsin otechmakak. Ijkon yejuan san sekan yetoskej ken tejuan san sekan tikatej.
12 Ne onikinmaluiaya ijkuak inuan onikatka porque yejuan kipiaj motoka tlen tejuatsin otechmakak. Ne onikinmalui uan nion se oixpoliuik. San se ixpoliuis para mamochiua tlen ijkuilitok.
13 Pero axkan monauak nias. Ijkon nikijtoua ijkuak ok nika ipan tlaltikpak para yejuan sapanoua mapakikan ijkon ken ne nipaki.
14 Ne onikinmatilti motlajtol pero akinmej chantij tlaltikpak kinkokoliaj porque amo inuan pouij. Ijkon ken ne amo nipoui inuan akinmej chantij tlaltikpak”.
15 “Amo nimitstlatlaujtia xikinkixti itech tlaltikpak. Nimitstlatlaujtia xikinmalui amitlaj makintokti Satanás.
16 Yejuan amo pouij inuan oksekimej, ijkon ken ne amo nipoui inuan oksekimej.
17 Melauak tlen kijtoua motlajtol. Ika tlen melauak xikinpejpena para mamitstekichiuilikan.
18 Ne onikintitlanki innauak akinmej chantij tlaltikpak ijkon ken tejuatsin otechualtitlanki innauak akinmej chantij tlaltikpak.
19 Inpatka otechpejpenki para manimitstekichiuili. Ijkon ika tlen melauak noijki tikinpejpenas para mamitstekichiuilikan”.
20 “Amo san yejuan inpatka nimotlatlaujtia. Noijki nimotlatlaujtia inpatka akinmej kintlapouiskej uan nechneltokaskej
21 para nochtin san sekan mayetokan. NoTajtsin, tejuatsin nouan tika uan ne noijki mouan nika. Yejuan noijki touan mayetokan uan ijkon oksekimej kineltokaskej tejuatsin otechualtitlanki.
22 Ne nikintlakaita ijkon ken tejuatsin techtlakaita para yejuan san sekan mayetokan ken tejuan san sekan tikatej.
23 Ne inuan niyetos uan tejuatsin nouan tiyetos para yejuan san sekan yetoskej. Ijkon oksekimej kimatiskej tejuatsin otechualtitlanki uan tikintlasojtla ijkon ken ne techtlasojtla.
24 NoTajtsin, kanin ne niyetos nikneki nouan mayetokan akinmej otechinmaktili para makitakan otechueyitlali, porque yotechtlasojtlaya ijkuak ayamo ikaj okatka.
25 NoTajtsin tejuatsin tiyolkuali. Oksekimej amo mitsixmatij pero ne nimitsixmati uan yejuan yokimatkej tejuatsin otechualtitlanki.
26 Ne onikinmatilti motoka uan ok niktematiltis. Ijkon tikintlasojtlas ken ne techtlasojtla uan ne inuan niyetos”.
Notas
^ Noso “kiuelkakij”.
