Juan 7:1-52
7 Satepan Jesús onentinemiaya Galilea. Ye amo okinekiaya yas Judea porque judíos okitemouayaj ken kimiktiskej.
2 Ijkuakon yiajsiskia iluitl ijkuak judíos okinchiuayaj kaltsitsintin.
3 Ikinon ikniuan okiluijkej: “Xio Judea uan ijkon modiscípulos noijki kitaskej tlen tikchiua.
4 Ijkuak ikaj kineki makixmatikan, amitlaj kichiua san ichtaka. Ximoteititi inmixpan oksekimej uan makitakan tlen tikchiua”.
5 Ikniuan Jesús amo okineltokayaj.
6 Ijkuakon Jesús okinmilui: “Namejuan san tlen hora kuali nankitaj, pero ne ayamo ajsi nohora.
7 Ne miakej nechkokoliaj porque nikinmatiltia tlen amo kuali kichiuaj, pero namejuan amo moneki namechkokoliskej.
8 Namejuan xiuiaj iluitl. Ne ayamo nias porque ayamo ajsi nohora”.
9 Ye ijkon okinmilui uan omoka ompa Galilea.
10 Ijkuak ikniuan oyajkej* iluitl, ye noijki oyajki pero amikaj okimatki porque san ichtaka oyajki.
11 Judíos okitemojtinemiayaj Jesús itech iluitl uan omotlajtlaniayaj: “¿Kanin kajki non tlakatl?”.
12 Miakej omoichtakatlapouiayaj akin ye. Sekimej okijtouayaj: “Non tlakatl yolkuali”. Oksekimej okijtouayaj: “Amo yolkuali. Ye san tekajkayajtinemi”.
13 Pero amikaj omixeuiaya ijkon kijtos teixpan porque okinmauiliayaj* judíos.
14 Ijkuak yikanaj naui tonal oiluichijtokaj, Jesús oajsito* templo uan opejki tlamachtia.
15 Judíos omotlajtlachialtijkej uan okijtouayaj: “Nin tlakatl sapanoua ixtlamatki, ¿ken kichiua tla amo oyajki escuela?”.*
16 Jesús okinmilui: “Amo noaxka tlen nitlamachtia, iaxka akin onechualtitlanki.
17 Tla ikaj kineki kichiuas tlen toTajtsin Dios kineki, kimatis kox ye iaxka tlen nitlamachtia noso tlen ne nimokuayejyekoua.*
18 Akin tlamachtia tlen san ye mokuayejyekoua,* kineki san ye makiueyitlalikan. Pero tla ikaj kineki makiueyitlalikan akin okiualtitlanki, amo tlakajkayaua uan amo kichiua tlen amo kuali.
19 ¿Amo ye Moisés onamechinmakak Tlanauatilmej? Pero namejuan amo nankintlakamatij* nonmej Tlanauatilmej. ¿Tleka nankinekij nantechmiktiskej?”.
20 Yejuan okinankilijkej: “¡Te tikpia se ejekatl!* ¿Akin kineki mitsmiktis?”.
21 Ijkuakon Jesús okinmilui: “Onikchi san se tlamantli uan namejuan onanmotlajtlachialtijkej.
22 Ximokuayejyekokan* ijkuak Moisés onamechnauati xikmochiuilikan circuncisión (maski non ualeuatok desde namouejkatatajuan uan amo ualeuatok desde Moisés), uan namejuan nankichiuiliaj circuncisión se chokotsin maski sábado.
23 Namejuan nankichiuiliaj circuncisión se chokotsin maski sábado porque nankitlakamatij* iTlanauatil Moisés. Pero ¿tleka namechkualania porque onikpajti se tlakatl maski sábado?
24 Ayakmo xiteixkomakakan ika tlen nankitaj. Xiteixkomakakan ijkon ken moneki”.
25 Sekimej tlen ochantiayaj Jerusalén opejki kijtouaj: “¿Amo ye nin tlakatl tlen kinekij kimiktiskej?
26 Pero xikitakan, ye teixpan tlajtojtok uan amitlaj kiluiaj. Xamo tekiuajkej tlen technauatiaj yokitakej ye melauak Cristo.
27 Tejuan tikmatij kanin ouala nin tlakatl, pero ijkuak uits Cristo amikaj kimatis kanin uits”.
28 Ijkuakon Jesús chikauak okijto ijkuak otlamachtijtoka itech templo: “Namejuan nantechixmatij uan nankimatij kanin oniuala. Pero amo oniuala porque ne oniknek. Akin onechualtitlanki yoltok uan namejuan amo nankixmatij.
29 Ne nikixmati porque ye onechualtitlanki ipatka maniuiki”.
30 Ijkuakon opejki kitemouaj ken kikitskiskej, pero amikaj ouelik itlaj okitokti porque ayamo oajsiaya ihora.
31 Miakej tlen ompa okatkaj okineltokakej uan okijtojkej: “Ijkuak uits Cristo, kinchiuas miakej milagros uan nin tlakatl ijkon kichiua”.
32 Fariseos okikakej miakej omoichtakatlapouijtokaj akin Jesús, ikinon fariseos uan teopixkej tlen otlayekanayaj okintitlankej soldados makikitskitij Jesús.
33 Jesús okinmilui akinmej ompa okatkaj: “Namouan niyetos ok kanaj keski tonal uan satepan nikajsiti akin onechualtitlanki.
34 Namejuan nantechtemoskej pero amo nantechajsiskej. Amo uelis nanyaskej kanin ne niyetos”.
35 Ijkuakon judíos opejki kimoluiaj: “¿Kanin yas nin tlakatl para amo uelis tikajsiskej? ¿Kox yas inuan judíos tlen chantij Grecia uan kinmachtiti griegos?
36 ¿Tleka okijto: ‘Namejuan nantechtemoskej pero amo nantechajsiskej. Amo uelis nanyaskej kanin ne niyetos’?”.
37 Itech saiktlami tonal ijkuak okichijtokaj ueyi iluitl, Jesús omoketski uan chikauak okijto: “Nonauak mauiki akin amiki uan maatli.
38 Tla ikaj nechneltokas, ‘iyolipan meyas atl ken se aueyatl tlen kipaleuis mayolto’, ijkon ken kijtoua iTlajtol toTajtsin Dios”.
39 Tlen okijto Jesús kijtosneki akinmej kineltokaskiaj kiseliskiaj espíritu santo. Ijkuakon ayamo okiseliayaj espíritu santo porque Jesús ayamo okiueyitlaliayaj.
40 Ijkuak ijkon okikakej, sekimej tlen ompa okatkaj okijtojkej: “Ye melauak profeta”.
41 Oksekimej okijtojkej: “Ye nin Cristo”. Pero sekimej okijtouayaj: “¿Kox uelis kisas Cristo ompa Galilea?
42 ITlajtol toTajtsin Dios kijtoua Cristo yetoskia ixui David uan nesiskia* ompa Belén. Itech altepetsintli kanin oneski* David”.
43 Ijkuakon nochtin omoxexelojkej porque tlatlamantli omokuayejyekouayaj.*
44 Sekimej okinekiayaj kikitskiskej pero amitlaj ouelik okitoktijkej.
45 Soldados omokopkej kanin okatkaj fariseos uan teopixkej tlen otlayekanayaj. Yejuan okintlajtlanijkej soldados: “¿Tleka amo onankiualikakej?”.
46 Soldados okinnankilijkej: “¡Amo keman tikkakij se tlakatl tlajtoua ijkon ken ye!”.
47 Fariseos okinmiluijkej: “¿Noijki namejuan onamechkajkaya?
48 ¿Kox se tekiua tlen technauatia noso se fariseo yokineltokak Jesús?
49 Pero toTajtsin Dios amo kinselia akinmej amo kixmatij iTlanauatil Moisés”.
50 Se fariseo itoka Nicodemo tlen achto okitato Jesús, okinmilui:
51 “ToTlanauatil amo techkauilia ikaj matikixkomakakan tla amo achto tikkakij uan tikmatij tlen kichiua”.
52 Ijkuak ijkon okikakej, yejuan okiluijkej: “¿Te noijki moaltepe Galilea? Kuali ximomachti iTlajtol toTajtsin Dios uan tikitas ompa Galilea amo uelis kisas se profeta”.*
Notas
^ Noso “otlejkokej”.
^ Noso “okinmimakasiayaj”.
^ Noso “otlejkok”.
^ Itech ninmej escuelas otlamachtiayaj tlayekankej teopixkej.
^ Noso “nimonejneuilia”.
^ Noso “monejneuilia”.
^ Noso “nankinuelkakij”.
^ Noso “demonio”.
^ Noso “ximonejneuilikan”.
^ Noso “nankiuelkakij”.
^ Noso “tlakatiskia”.
^ Noso “otlakatki”.
^ Noso “omonejneuiliayaj”.
^ Seki copias miak inpati tlen yiuejkika okinmijkuilojkej amo kipia versículo 53 itech nin capítulo. Noijki capítulo 8 amo kipia versículos 1 a 11.
