Judas 1:1-25
1 Ne niJudas, niktekichiuilia Jesucristo uan niikni Santiago. Namechtlajkuililia namejuan akinmej toTajtsin Dios onamechnotski. Ye namechtlasojtla uan namechmaluia para nanyetoskej iuan Jesucristo.
2 ToTajtsin Dios okachi manamechiknomati, manamechmaka yolseuilistli uan manamechtlasojtla.
3 Nokniuan, oniknekiaya namechijkuililis ken techmakixtis toTajtsin Dios. Pero axkan nikita moneki namechtlajkuililis para namechyolchikauas ximochijchikauakan xikmaluikan tlamachtil tlen melauak. Non tlamachtil san se uelta okinmachtijkej akinmej yolchipauakej uan amo moneki oksepa kinmachtiskej.
4 Ne namechtlajkuililia porque sekimej tlakamej ichtaka okalakej kanin namejuan nankatej. Yiuejkika iTlajtol toTajtsin Dios okijto nonmej tlakamej kinmixkomakaskej. Yejuan amo kitlakaitaj toTajtsin Dios, kinejnekij* itetliokolil toTajtsin Dios tlen kuali para mopaleuiskej ijkuak tlajtlakolchiuaj uan ayakmo pinauaj.* Noijki yokikajkej Jesucristo akin san ye toTeko.
5 Maski namejuan kuali yinankimatij, nikneki namechilnamiktis Jehová okimakixti se altepetl ompa Egipto pero satepan okinmixpolo akinmej amo otlaneltokakej.
6 Ángeles tlen okikajkej inteki iluikak uan okikajkej kanin omonekiaya chantiskej, okinmilpi ika cadenas tlen amo keman kotonij. Yejuan katej kanin sapanoua tlayoua para kinmixkomakaskej itech ueyi tonal.
7 Noijki akinmej ochantiayaj Sodoma, Gomorra uan itech altepemej tlen ik ompa okatkaj, sapanoua oauilnemiayaj* uan okichiuayaj tlen okinekiaya incuerpo maski amo omonekiaya kichiuaskej. Yejuan okintlajyouiltijkej uan sepa okinmixpolojkej ika tlitl uan ijkon technejmachtiaj.
8 Nonmej tlakamej noijki san mokuayejyekojtokej* tlen amo kuali. Noijki kisokiotiaj incuerpo uan kisokiotiaj incuerpo oksekimej, kintlauelitaj akinmej tlanauatiaj uan kinteneuaj* akinmej ueyititokej.
9 Pero ijkuak arcángel Miguel omokualani iuan Diablo por icuerpo Moisés, amo omixeui kixkomakas nion amo okiuijuikalti. Ye okijto: “Jehová mamitsajua”.
10 Pero nonmej tlakamej kiuijuikaltiaj nochi tlamantli tlen amo kajsikamatij. Yejuan moijtlakouaj porque katej ken yolkamej tlen amo teajsikamatij uan kichiuaj nochi tlen kichiuaj yolkamej.
11 ¡Mialmastin! Yejuan okichijkej ijkon ken okichi Caín. San niman okichijkej tlen amo kuali ijkon ken Balaam porque okinekiayaj makinteochiuakan. Noijki okinmixpolojkej porque oteixnamikej ijkuak otlajtojkej ijkon ken okichi Coré.
12 Ijkuak namouan tlakuaj kanin nanmiluichiuaj ika tlasojtlalistli, nonmej tlakamej katej ken temej* tlen tlatitokej itlampa atl. Katej ken tlajpixkej tlen san inselti motlamakaj uan amo momojtiaj. Katej ken mixtli tlen amo kipia atl uan kiuiuika ejekatl. Katej ken kojmej tlen amo kitemakaj tlakilotl ijkuak moneki kitemakaskej, yetoskiaj ken sepa miktokej uan okiuiuitlakej inneluayo.
13 Nonmej tlakamej katej ken atl tlen motlauiteki ijtik mar uan itempa atl kikixtiaj nochi sokio tlen ika mopinatiaj. Katej ken sitlalimej tlen amo kimatij kanin yauij uan nochipa yetoskej kanin sapanoua tlayoua.
14 Enoc okatka chikome ixui Adán. Ye noijki okijto tlen toTajtsin Dios okimatilti kinpanos ijkuak okijto: “Jehová ouala inuan miles iángeles,
15 porque nochtin okinmixkomakako. Noijki okiteititiko intlajtlakol akinmej amo kitlakaitaj. ToTajtsin Dios ijkon okichi porque yejuan kichiuaj nochi tlen amo kuali uan kiuijuikaltiaj”.
16 Nonmej tlakamej motlaueltiaj porque amo pakij san ika tlen kipiaj uan kichiuaj san tlen yejuan kinekij. Moueyinekij ika tlen kijtouaj uan kualtsin kintlapouiaj oksekimej para san yejuan mopaleuiskej.
17 Pero namejuan nokniuan xikilnamikikan tlen achto okijtojkej iapóstoles toTeko Jesucristo.
18 Yejuan nochipa onamechiluiayaj: “Itlamian tonalmej yetoskej akinmej tepinauiskej uan kichiuaskej tlen amo kuali kinyoltilana”.
19 Nonmej tlakamej kinxexelouaj tokniuan. Yejuan kichiuaj ken yolkamej uan amo kinyekana iespíritu toTajtsin Dios.
20 Pero namejuan nokniuan ximoyolchikauakan ika ajsitok namotlaneltokilis inauak toTajtsin Dios. Noijki espíritu santo manamechpaleui ximotlatlaujtikan.
21 Ijkon nochipa nanmopaleuiskej ika itlasojtlalis toTajtsin Dios axkan ijkuak nankichiaj mateiknomati toTeko Jesucristo tlen namechpaleuis nochipa xiyoltokan.
22 Noijki nochipa xikinmiknomatikan akinmej amo kimatij kox melauak tlen kineltokaj.
23 San niman xikinmakixtikan ijtik tlitl. Noijki nochipa xikinmiknomatikan oksekimej pero ximomaluikan uan amo ximotokikan inauak intlaken porque yokisokiotijkej ika tlen amo kuali kichiuaj.
24 ToTajtsin Dios tlen ueyititok uelis namechpaleuis amo xiuetsikan imak tlajtlakoli. Noijki namechpaleuis ixpan xiyetokan nanchipauakej uan xipakikan miak.
25 San ye toTajtsin Dios akin otechmakixti ika toTeko Jesucristo, nochipa makiueyichiuakan, maueyitito, makipia chikaualistli uan matlanauati, ijkon ken achto, axkan uan nochipa. Amén.
Notas
^ Noso “kitekitiltiaj”, “kikuij”.
^ Xikita diccionario.
^ Xikita diccionario kanin kijtoua auilnemi.
^ Noso “monejneuilijtokej”.
^ Noso “kinmijtouaj”, “kinpojpouaj”.
^ Noso “tepejximej”.
