Lucas 15:1-32
15 Nochtin tominololojkej uan akinmej otlajtlakolchiuayaj omotokiayaj inauak Jesús uan okikakiayaj.
2 Fariseos uan akinmej otlamachtiayaj tlanauatil, amo okinpaktiaya uan okijtouayaj: “Nin tlakatl kinyekselia akinmej tlajtlakolchiuaj uan inuan tlakua”.
3 Ijkuakon Jesús okinmilui nin neskayotl:*
4 “Tla ikaj kinpia 100 ichkamej uan se poliuis, ¿amo kinkajteuas 99 ichkamej itech tlala uan kitemoti tlen opoliuik hasta ijkuak kajsis?
5 Pakis ijkuak kajsis uan kimokechpanoltis.
6 Ijkuak ajsiti ichan, kinnotsas iyolikniuan uan akinmej ik ompa chantij. Ye kinmiluis: ‘¡Nouan xipakikan porque onikajsik nochka tlen opolika!’.
7 Ne namechiluia, ompa iluikak okachi pakij ijkuak moyolkopa ikaj tlen otlajtlakolchiuaya, maski yetoskej 99 yolkualmej tlen amo moneki moyolkopaskej”.
8 “Noijki tla se siuatsintli kinpia majtlaktli dracmas* uan se kipoloua, ¿amo kixotlaltis se tlauili, tlachpanas uan kuali kitemos hasta ijkuak kajsis?
9 Ijkuak kajsis, kinnotsas iyolikniuan uan akinmej ik ompa chantij. Ye kinmiluis: ‘¡Nouan xipakikan porque onikajsik dracma* tlen onikpolojka!’.
10 Ne namechiluia, iángeles toTajtsin Dios noijki pakij ijkuak moyolkopa ikaj tlen otlajtlakolchiuaya”.
11 Jesús noijki okijto: “Se tlakatl okinpiaya ome itelpochuan.
12 Xokoyotl okilui ipapa: ‘Papa, techmaka tlen techkajteuilis’. Ikinon tlakatl okintlaxejxelili ome itelpochuan.
13 Satepan xokoyotl oyajki okse altepetl uan okiuikak nochi tlen okipiaya. Ompa okauilti nochi tlen okipiaya uan okichijtinenki tlen pitsotik.
14 Ijkuak okitlami nochi tlen okipiaya, otlaapistik itech non altepetl uan ye ayakmo okipiaya tlen kikuas.
15 Ijkuakon okitlajtlanilito tekitl se tlakatl tlen ompa ochantiaya uan ye okinauati makinmaluiti pitsomej* itlala.
16 Telpochtli okinekiaya kikuas intlakual pitsomej* porque oapismikiaya, pero amikaj itlaj okimakaya”.
17 “Satepan omolnamik uan okijto: ‘Miakej itlakeualuan nopapa kipiaj miak tlakuali uan ne nikan niapismiktok.
18 Nimokopas ichan nopapa uan nikiluis: “Papa, onitlajtlakolchi ixpan toTajtsin Dios uan noijki moixpan.
19 Ayakmo techita ken nimokone. Techita ken se motlakeual”’.
20 Telpochtli omokopki ichan ipapa. Ipapa okitak ijkuak uejka oualaya uan okiknomatki. Omotlalo okinamikito, okinapalo* uan okipijpitso.*
21 Telpochtli okilui ipapa: ‘Papa, onitlajtlakolchi ixpan toTajtsin Dios uan noijki moixpan. Ayakmo techita ken nimokone’.
22 Pero ipapa okinnauati itlakeualuan: ‘San niman xikkuitij* se kuali tlakemitl ueyak uan xiktlalilikan. Noijki xiktlalilikan se anillo uan xikkaktikan.*
23 Xikualikakan torojkonetl tomauak uan xikmiktikan. Matiiluichiuakan uan matitlakuakan porque notelpoch omokopato.
24 Notelpoch yetoskia ken oixpolika uan oksepa omoyoliti. Opolika uan oksepa otikajsikej’. Ijkuakon oiluichijkej”.
25 “Telpochtli tlen otlayekanaya* okatka tlala. Ijkuak omokopki ichan, okikak otlatsotsonayaj uan omijtotiayaj.
26 Ye okinotski se tlakeuali uan okitlajtlani tlen okichijtokaj.
27 Tlakeuali okilui: ‘Mokni omokopato uan mopapa okimikti torojkonetl tomauak porque itelpoch amitlaj okipanok uan chikajtok’.
28 Pero telpochtli tlen otlayekanaya* okualanki uan amo okinek kalakis. Ipapa okiski uan okitlatlaujti makalaki.
29 Telpochtli okilui ipapa: ‘Miak xiuitl yonimitspaleui ken se tlakeuali uan nochipa nikchiua tlen technauatia. Pero amo keman otechmakak se tentsontsin para niiluichiuas inuan noyolikniuan.
30 Pero omokopato motelpoch uan otikmiktili torojkonetl tomauak. Maski ye okauilti tlen moaxka inuan siuamej tlen monemakaj’.
31 Tlakatl okilui itelpoch: ‘Nokone, te nochipa nouan tika uan moaxka nochi tlen nikpia.
32 Pero omonekiaya tiiluichiuaskej uan tipakiskej porque omokopato mokni. Ye yetoskia ken oixpolika uan oksepa omoyoliti. Opolika uan oksepa otikajsikej’”.
Notas
^ Noso “ejemplo”.
^ Xikita diccionario.
^ Xikita diccionario.
^ Noso “kochijtin”.
^ Noso “kochijtin”.
^ Noso “okinauajtek”.
^ Noso “okitennamik”.
^ Noso “xikanatij”.
^ Noso “xikhuarachtikan”.
^ Noso “okachi ueyi”.
^ Noso “okachi ueyi”.
