Lucas 16:1-31
16 Satepan Jesús noijki okinmilui discípulos: “Se tlakatl tlen okipiaya miak tomin okipiaya se tlakeuali. Tlakeuali okiteluijkej san okauilti tlen iaxka iteko.
2 Tlakatl okinotski itlakeual uan okilui: ‘Amo kuali tlen kijtojtinemij tikchiua. Xio uan xikijkuilo tlen otikchi ika notomin porque ayakmo nimitskauilis xitlamalui nochanʼ.
3 Tlakeuali okimolui: ‘¿Axkan tlen nikchiuas tla noteko nechkixtilis noteki? Ne amo nitlaxikos nitlatokas uan nipinaua niktlajtlantinemis itlaj manechtliokolikan.
4 Yinikmati tlen nikchiuas para manechselikan inchan oksekimej ijkuak ayakmo nikpias noteki’.
5 Tlakeuali sejse okinnotski akinmej itlaj okiuikiliayaj iteko. Tlakatl tlen achto oajsito okitlajtlani: ‘¿Kech tikuikilia noteko?’.
6 Ye okinankili: ‘Nikuikilia 2,200 litros aceite de oliva’. Tlakeuali okilui: ‘Nikan ijkuilitok kech tikteuikilia. Ximotlali uan san niman xikijkuilo tikteuikilia 1,100 litros’.
7 Satepan okitlajtlani okse tlen okiteuikiliaya: ‘¿Te kech tikteuikilia?’. Ye okinankili: ‘Nikteuikilia 100 costales* de trigo’. Tlakeuali okilui: ‘Nikan ijkuilitok kech tikteuikilia. Xikijkuilo tikteuikilia 80 costales’.
8 Tlakatl omotlajtlachialti porque itlakeual okatka ixtlamatki maski amo kuali tlen okichi. Ne namechiluia, akinmej axkan* yoltokej kiteititiaj okachi ixtlamatkej ijkuak itlaj kichiuaj uan amo ken akinmej kintlauilia toTajtsin Dios”.
9 “Noijki namechiluia, xiknejnekikan* tlen onka itech tlaltikpak para kuali nanmouikaskej inuan oksekimej, ijkon ijkuak ayakmo itlaj nankipiaskej, namechseliskej itech se kali tlen amo keman pojpoliuis.
10 Akin ueli kimaluia tlen amo miak, uelis kimaluis miak tlamantli. Pero akin amo ueli kimaluia tlen amo miak, amo uelis kimaluis miak tlamantli.
11 Ikinon tla amo kuali onankinejnekej* tlen onka itech tlaltikpak, ¿ken namechmaktiliskej xikmaluikan tlen melauak ipati?
12 Tla amo nankimatij nankimaluiskej tlen amo namoaxka, ¿akin uelis itlaj namechmakas?
13 Nion se tlakeuali uelis kinpias ome itekouan porque se kikokolis uan okse kitlasojtlas. Noso se kitlauelitas uan okse nochipa kipaleuis. Namejuan amo uelis nankitekichiuiliskej toTajtsin Dios tla nankinekij nankipiaskej miak tomin”.
14 Fariseos okikakej tlen okijto Jesús uan okitlauelitakej porque okinpaktiaya kipiaskej tomin.
15 Jesús okinmilui: “Namejuan teixpan nankijtouaj nanyolkualmej, pero toTajtsin Dios kimati tlen nankipiaj namoyolipan. Porque tlen sekimej kipatioitaj, toTajtsin Dios kitlajyaltia”.
16 “Profetas uan iTlanauatil Moisés okijtojkej tlen panoskia hasta ijkuak Juan opejki tetlapouia. Ijkuakon opejki motetlapouia kuali tlajtoli itech iTekiuajkayo toTajtsin Dios, uan miakej mochijchikauaj ompa yetoskej.
17 Uelis pojpoliuis iluikak uan tlaltikpak, pero amo pojpoliuis nion se letra tsikitsin tlen ijkuilitok itech iTlanauatil Moisés tla amo mochiua”.
18 “Se tlakatl auilnemis* tla kikauas isiua uan monamiktis iuan okse siuatl. Noijki auilnemis* tla monamiktis iuan se siuatl tlen okika inamik”.
19 “Okatka se tlakatl tlen okipiaya miak tomin uan omotlakentiaya ika tlakemitl morado de lino. Ye san omoyolpaktiaya uan okipiaya miak tlamantli.
20 Pero ikaltempa okitlaliayaj se tlakatl itoka Lázaro. Icuerpo non tlakatl nochi otemalkisaya uan okitlajtlaniaya itlaj makitliokolikan.
21 Ye okinekiaya kikuas tlen ouetsiaya itlampa imesa tlakatl tlen okipiaya tomin. Noijki oualayaj itskuintin uan okipajpalouayaj kanin otemalkisaya.
22 Satepan oixpoliuik Lázaro uan ángeles okiuikakej inakastlan Abrahán”.
“Tlakatl tlen okipiaya miak tomin noijki oixpoliuik uan okitokakej.
23 Ijkuak otlajyouijtoka ijtik Mikatekochtli,* oajkotlachixki uan uejka okitak Lázaro okatka inakastlan Abrahán.
24 Ikinon okijto: ‘Papa Abrahán, techiknomati uan xikualtitlani Lázaro makisiaua imajpil uan manechnenepilsiauaki, porque sapanoua nitlajyouia ijtik nin tlitl’.
25 Pero Abrahán okilui: ‘Nokone, xikilnamiki ijkuak otiyoltoka otikpixki miak tlamantli, pero Lázaro sapanoua otlajyoui. Axkan ye nikan kajki ika yolseuilistli uan te titlajyouia.
26 Noijki techtlajkoxelojtok tlauejkatlan, ikinon akinmej nikan katej amo uelis ompa panoskej maski kinekiskej. Noijki akinmej ompa katej amo uelis panoskej kanin tejuan tikatej’.
27 Ijkuakon tlakatl tlen okipiaya miak tomin okijto: ‘Papa Abrahán, tla ijkon, xiktitlani Lázaro mauia ichan nopapa,
28 porque nikinpia makuili nokniuan uan nikneki makintlapouiti. Ijkon yejuan amo tlajyouikiuij’.
29 Abrahán okilui: ‘Yejuan makikakikan tlen okijkuilo Moisés uan tlen okijkuilojkej profetas’.
30 Tlakatl okijto: ‘Papa Abrahán, yejuan amo kinkakiskej pero moyolkopaskej tla kinmitati ikaj tlen moyolitis’.
31 Abrahán okilui: ‘Tla amo kikakij tlen okijkuilo Moisés uan tlen okijkuilojkej profetas, noijki amo kikakiskej akin moyolitis’”.
Notas
^ Se costal okipiaya 170 kilos.
^ Xikita diccionario kanin kijtoua tlen axkan onka.
^ Noso “xiktekitiltikan”, “xikkuikan”.
^ Noso “onankitekitiltijkej”, “onankikuikej”.
^ Noso “kikajkayauas isiua”.
^ Noso “kikajkayauas isiua”.
^ Ika griego moijtoua Hades. Xikita diccionario.
