Lucas 18:1-43
18 Jesús okinmilui idiscípulos se neskayotl* para kinmachtis nochipa mamotlatlaujtikan uan amo mamosotlauakan.
2 Okinmilui: “Itech se altepetl okatka se juez tlen amo okimauiliaya toTajtsin Dios nion amo okintlakaitaya oksekimej.
3 Ompa noijki okatka se siuatl tlen oixpoliuik inamik. Ye nochipa oyaya kitati juez uan okiluiaya: ‘Xikyektlali ouijkayotl tlen nikpia iuan akin nechkokolia ijkon ken moneki’.
4 Juez amo okinekiaya kipaleuis siuatl pero satepan okimolui: ‘Maski amo nikmauilia toTajtsin Dios nion amo nikintlakaita oksekimej,
5 nikpaleuis nin siuatl porque san nechkuejsojtok. Ijkon ayakmo nechkuejsojtinemis’”.
6 Jesús noijki okijto: “Xikajsikamatikan tlen okijto juez maski amo yolkuali.
7 Ikinon ¿amo kinpaleuis toTajtsin Dios akinmej okinpejpenki uan kitlatlaujtiaj tlajka uan youak makinpaleui? Porque ye kimati kinchias.
8 Ne namechiluia, toTajtsin Dios kichiuas san niman makinpaleuikan. Pero ijkuak ajsiki iKone Tlakatl, ¿yetoskej akinmej melauak tlaneltokaj?”.
9 Noijki okinmilui nin neskayotl* akinmej okineltokayaj okatkaj yolkualmej uan okinmitayaj amitlaj inpati oksekimej.
10 “Se fariseo uan se tominololo otlejkokej omotlatlaujtitoj itech templo.
11 Fariseo omoketski uan opejki motlatlaujtia san ichtaka. Okijto: ‘ToTajtsin Dios, nimitstlasojkamatilia porque amo nikchiua ken oksekimej. Yejuan tlachtekij, amo yolkualmej uan auilnemij.* Noijki amo nikchiua ken nin tominololo.
12 Amo nitlakua* ome uelta se semana uan niktemaka diezmo’.
13 Pero tominololo san uejka omoketoka uan amo omixeuiaya ajkotlachias. Omoelpanuitekiaya uan okijtouaya: ‘ToTajtsin Dios, techiknomati porque nitlajtlakole’.
14 Ne namechiluia, ijkuak tominololo omokopki ichan okiteititi okatka okachi yolkuali uan amo non fariseo. Porque kipinauiskej akin moueyineki, pero kiueyitlaliskej akin yolyamanki”.
15 Noijki sekimej okinuikilijkej inkoneuan para makinteochiua.* Pero discípulos okinmajuakej akinmej okinuikilijkej konemej ijkuak okinmitakej.
16 Jesús otlanauati makinualikilikan konemej uan okijto: “Xikinkauakan konemej nonauak maualakan uan amo xikintsakuilikan. Porque akinmej yolkualmej ken ninmej konemej, inmiaxka iTekiuajkayo toTajtsin Dios.
17 Ne namechiluia, akin amo kiselia iTekiuajkayo toTajtsin Dios ken se chokotsin, amo uelis ompa yetos”.
18 Se tlakatl tlen okinnauatiaya judíos okitlajtlani Jesús: “Kuali Tlamachti, ¿tlen moneki nikchiuas para nochipa niyoltos?”.
19 Jesús okilui: “¿Tleka techiluia kuali Tlamachti? San toTajtsin Dios yolkuali.
20 Te tikinmixmati itlanauatiluan toTajtsin Dios: amo xiauilnemi,* amo xitemikti, amo xitlachteki, amo xitlakajkayaua, xiktlakaita mopapa uan momama”.
21 Tlakatl okilui: “Nochi non opejki nikchiua ijkuak onikatka nitsikitsin”.
22 Jesús okikak uan okilui: “Ok mitspoloua tikchiuas se tlamantli, xiknemaka nochi tlen tikpia uan tlen tiktlanis xikinxejxelili akinmej amitlaj kipiaj. Ijkon tikpias itlaj miak ipati ompa iluikak. Satepan nouan xiuiki”.
23 Ijkuak Jesús ijkon okijto, tlakatl sapanoua omoyolkoko porque okipiaya miak tomin.
24 Jesús okitak uan okijto: “¡Akinmej kipiaj miak tomin oui kitaskej kalakiskej itech iTekiuajkayo toTajtsin Dios!
25 Akin kipia miak tomin oui kitas kalakis itech iTekiuajkayo toTajtsin Dios. Okachi amo oui panos se camello ijtik se aguja tlen ika tlajtsomaj”.
26 Akinmej okikaktokaj omotlajtlanijkej: “Tla ijkon, ¿akin uelis momakixtis?”.
27 Jesús okinnankili: “Nochi tlen amo ueli kichiuaj tlakamej, toTajtsin Dios ueli kichiua”.
28 Pedro okilui: “Tejuan otikkajkej tlen otikpiayaj uan mouan otiualajkej”.
29 Jesús okinmilui: “Ne namechiluia, akin okika ichan, isiua, ikniuan, ipapanuan noso ikoneuan ipatka iTekiuajkayo toTajtsin Dios,
30 axkan kiselis okachi miak tlen okika uan satepan nochipa yoltos”.
31 Satepan Jesús oksekan okinuikak 12 apóstoles uan okinmilui: “Axkan tiauij* Jerusalén, uan iKone Tlakatl kipanos nochi tlen okijkuilojkej profetas.
32 Kitemaktiskej inmak akinmej amo judíos, kipinauiskej, kiuijuikaltiskej uan kichijchaskej.
33 Satepan kiuitekiskej ika mekatl uan kimiktiskej, pero ipan eyi tonal toTajtsin Dios kiyolitis”.
34 Yejuan amo okajsikamatkej tlen okinmilui porque okatka ken itlaj otlatitoka.
35 Ijkuak Jesús yiajsiskia Jericó, itempa ojtli okatka* se tlakatl tlen amo otlachiaya uan okitlajtlaniaya tomin.
36 Non tlakatl otlajtlanki tlen opanotoka porque okikak miakej ik ompa opanotokaj.
37 Sekimej okiluijkej: “¡Nikan panotok Jesús Nazareno!”.
38 Ijkuak okimatki, chikauak okijto: “¡Jesús iKone David, techiknomati!”.
39 Akinmej oyayaj tlayekapan okajuakej uan okiluijkej amitlaj makijto. Pero ye okachi chikauak okitsajtsiliaya: “¡IKone David, techiknomati!”.
40 Jesús omoketski uan otlanauati makiualikilikan tlakatl. Ijkuak tlakatl oajsito, Jesús okitlajtlani:
41 “¿Tlen tikneki manikchiua?”. Tlakatl okinankili: “NoTeko, nikneki oksepa nitlachias”.
42 Jesús okilui: “Oksepa xitlachia. Yotipajtik porque titlaneltoka”.
43 Tlakatl san niman oksepa opejki tlachia uan okiueyichijtiaj toTajtsin Dios ijkuak okitokak Jesús. Noijki nochtin okiueyichijkej toTajtsin Dios ijkuak okitakej tlen opanok.
Notas
^ Noso “ejemplo”.
^ Noso “ejemplo”.
^ Noso “kikajkayauaj insiua noso innamik”.
^ Noso “nimosaua”.
^ Noso “inpan makintlali imauan”.
^ Noso “amo xikkajkayaua mosiua iuan okse siuatl”.
^ Noso “titlejkoj”.
^ Noso “oeuatoka”, “oyetoka”.
