Lucas 2:1-52
2 Itech nonmej tonalmej, César Augusto otlanauati nochtin makijkuilotij intoka itech inmialtepe.
2 (Nin achto censo omochi ijkuak Quirinio otlanauatiaya ompa Siria).
3 Nochtin okijkuilotoj intoka itech inmialtepe.
4 José noijki ijkon okichi. Ye okatka altepetl Nazaret tlen kajki Galilea uan oyajki altepetl Belén tlen kajki Judea. Ijkon okichi porque opouiaya itech ifamilia David. Belén okatka ialtepe David.
5 José uan María san sekan okijkuilotoj intoka ompa Belén porque yomonamiktijkaj. Uan María yikipiaskia ikonetsin.
6 Ijkuak yokatkaj Belén, oajsik tonal nesis* ikonetsin.
7 Ijkuakon María okipixki achto ikone. Okikimilo ika tsotsoli* uan okitekak kanin otlakuayaj yolkamej porque ayakmo okatka kanin mokalotiskej.
8 Ik ompa, sekimej tlajpixkej youak okinmaluiayaj inmichkauan itech tlala.
9 Ijkuakon okinmonextili iángel Jehová uan inpan opetlanki iueyitilis Jehová. Yejuan omomojtijkej,
10 pero ángel okinmilui: “Amo ximomojtikan porque onamechiluiko kuali tlajtoli tlen kinpaktis israelitas.
11 Axkan itech ialtepe David oneski* konetl tlen namechmakixtis. Ye toTeko Cristo.
12 Nankixmatiskej konetl ijkuak nankitaskej kimilitok ika tsotsoli* uan yetos kanin tlakuaj yolkamej”.
13 Ijkuakon oualmonextijkej miakej ángeles kanin okatka non ángel uan okiueyichiuayaj toTajtsin Dios. Yejuan okijtouayaj:
14 “Maueyitito toTajtsin Dios ompa iluikak, uan nikan tlaltikpak makipiakan yolseuilistli akinmej ye kinselia”.
15 Ijkuak ángeles omokopkej iluikak, tlajpixkej okimoluijkej: “Moneki san niman matitlachiatij tlen opanok Belén tlen Jehová otechmatilti”.
16 Yejuan san niman oyajkej uan okinmajsitoj María uan José. Konetl okatka kanin tlakuaj yolkamej.
17 Ijkuak okitakej konetl, okijtojkej tlen okinmatiltijkej.
18 Nochtin omotlajtlachialtijkej ijkuak okikakej tlen okijtojkej tlajpixkej.
19 María okimokaui iyolipan nochi tlen okijtojkej uan omokuayejyekouaya* tlen okijtosnekiaya.
20 Tlajpixkej omokopkej kanin okatkaj inmichkauan. Yejuan okiueyichijtiajkej toTajtsin Dios, porque okitakej uan okikakej opanok ijkon ken okinmiluijkej.
21 Chikueyi tonal satepan, konetl okichiuilitoj circuncisión uan okitokayotijkej Jesús, ijkon ken ángel yokiluijka María ijkuak ayamo okipiaya.
22 Oajsik tonal ijkuak yejuan kitemakaskiaj tetliokolil para mochipauaskiaj ijkon ken okijtouaya iTlanauatil Moisés. José uan María oyajkej Jerusalén okixpantilitoj Jehová non konetl.
23 Ijkon okichijkej porque iTlanauatil Jehová kijtoua: “Chokotsin tlen tlayekana moneki yetos iaxka Jehová”.
24 Okitemakakej tetliokolil ijkon ken kijtoua iTlanauatil Jehová: “Ome palomas uejueyij noso ome palomaskonemej”.
25 Ompa Jerusalén okatka se tlakatl yolkuali itoka Simeón tlen otlaneltokaya. Ye okipiaya espíritu santo uan okichiaya toTajtsin Dios makinpaleui israelitas.
26 ToTajtsin Dios ika iespíritu santo yokimatiltijka amo ixpoliuiskia hasta ijkuak kitaskia Cristo tlen Jehová okipejpenki.
27 Espíritu santo okiyekanki Simeón makalaki itech templo. José uan María noijki okalakej itech templo uan okiuikayaj Jesús. Yejuan okichiuatoj tlen okijtouaya iTlanauatil Moisés.
28 Ijkuakon Simeón okinapalo konetl, okiueyichi toTajtsin Dios uan okijto:
29 “NoTeko te tiueyititok, ne nimitstekichiuilia uan axkan yitechkauilis maniixpoliui ika pakilistli ijkon ken otikijto.
30 Porque yonikitak akin techmakixtis.
31 Te otikualtitlanki inmixpan nochtin tlen chantij itech altepemej.
32 Ye se tlauili tlen kinmixtlapos akinmej amo judíos uan yokichi maueyitito moaltepe Israel”.
33 José uan María omotlajtlachialtijkej ijkuak okikakej tlen kichiuaskia konetl.
34 Satepan Simeón okinteochi uan okilui María imama chokotsin: “Nin chokotsin okitlalijkej para miakej mauetsikan ompa Israel uan miakej oksepa mamoketsakan. Ye yetos se tlamantli tlen kitlauelitaskej,
35 para momatis tlen kipiaj miakej inyolipan. (Te María titlajyouis ken yetoskia mitstsopitiskej ika se espada)”.
36 Noijki ompa okatka se siuatl profeta tlen omotokayotiaya Ana uan yokipiaya miak xiuitl. Ye okatka ichpoch Fanuel uan opouiaya itech ifamilia Aser. Omonamiktijka pero san chikome xiuitl okatka iuan inamik
37 porque oixpoliuik. Ana yokipiaya 84 xiuitl uan nochipa okatka itech templo. Tlajka uan youak ompa okiueyichiuaya toTajtsin Dios, amo otlakuaya* uan omotlatlaujtiaya.
38 Ijkuakon omotoki inauak José uan María, uan opejki kitlasojkamatilia toTajtsin Dios. Noijki okinmilui akin okatka non chokotsin nochtin tlen okichiayaj makimakixtikan Jerusalén.
39 Ijkuak yokichijkej tlen kijtoua iTlanauatil Jehová, omokopkej inmialtepe ompa Nazaret tlen kajki Galilea.
40 Chokotsin omoskalti, omochi chikauak uan ixtlamatki. ToTajtsin Dios nochipa okipaleuiaya.
41 José uan María sejse xiuitl oyayaj Jerusalén porque ompa okichiuayaj iluitl Pascua.
42 Ijkuak Jesús okipiaya 12 xiuitl, oyajkej* iluitl ompa Jerusalén ijkon ken nochipa okichiuayaj.
43 Ijkuak otlanki iluitl, yejuan omokopkej inchan pero Jesús omoka ompa Jerusalén uan ipapanuan amo okitakej.
44 Yejuan omokuayejyekojkej* xamo oualaya inuan oksekimej tlen okinualtokayaj. Se tonal yonejnenkej pero satepan opejki kitemouaj. Okitemojkej kanin oualayaj infamiliares uan akinmej okinmixmatiayaj.
45 Pero amo okajsikej ikinon omokopkej Jerusalén okitemotoj.
46 Opanok eyi tonal uan okajsitoj itech templo. Ye okatka* intlajko akinmej otlamachtiayaj, okinkaktoka uan okintlajtlaniaya miak tlamantli.
47 Nochtin tlen okikakiayaj omotlajtlachialtiayaj, porque okitakej okatka ixtlamatki uan kuali okinnankiliaya.
48 José uan María omotlajtlachialtijkej ijkuak okitakej. María okilui: “¿Tleka ijkon otikchi nokone? Mopapa uan ne otimotekipachojkej uan otimitstemojtinemiayaj”.
49 Ye okinmilui: “¿Tleka onantechtemojtinemiayaj? ¿Amo nankimatij moneki niyetos ikalijtik noTajtsin?”.
50 Pero yejuan amo okajsikamatiayaj tlen okinmilui.
51 Ijkuakon Jesús inuan omokopki altepetl Nazaret uan ye nochipa okintlakamatki.* María okimokauiaya iyolipan nochi non tlajtoli.
52 Jesús omoskalti, omochi ixtlamatki, okiyolpaktiaya toTajtsin Dios uan okinyolpaktiaya oksekimej.
Notas
^ Noso “tlakatis”.
^ Noso “tlakemitl”, “tilmajtli”.
^ Noso “otlakatki”.
^ Noso “tlakemitl”, “tilmajtli”.
^ Noso “omonejneuiliaya”.
^ Noso “omosauaya”.
^ Noso “otlejkokej”.
^ Noso “omonejneuilijkej”.
^ Noso “oeuatoka”, “oyetoka”.
^ Noso “okinuelkaki”.
