Lucas 24:1-53
24 Ijkuak peua semana,* siuamej san kualkan oyajkej kanin otoktoka Jesús. Okiuikakej xiuitl ajuiak tlen yejuan okiyektlalijkej.
2 Pero okitakej yokitokijkaj tetl kanin okatka Jesús.
3 Ijkuak okalakej, amo okajsikej icuerpo Jesús.
4 Siuamej amo okimatiayaj tlen kichiuaskej. Ijkuakon innakastlan oualmonextijkej ome tlakamej tlen intlaken opetlaniaya.
5 Siuamej omomojtijkej uan omotolojkej. Tlakamej okintlajtlanijkej: “¿Tleka nankitemouaj akin yoltok kanin toktokej akinmej yoixpolikej?
6 Ye amo nikan kajki porque toTajtsin Dios yokiyoliti. Xikilnamikikan tlen ye onamechilui ijkuak okatka Galilea.
7 Ye onamechilui iKone Tlakatl kitemaktiskiaj inmak tlajtlakolejkej uan kimiktiskiaj itech se kouitl, pero ipan eyi tonal toTajtsin Dios kiyolitiskia”.
8 Ijkuakon siuamej okilnamikej tlen okinmilui Jesús.
9 Satepan okiskej kanin otoktoka Jesús uan okinmiluitoj tlen opanok 11 apóstoles uan noijki oksekimej.
10 Nonmej siuamej omotokayotiayaj María Magdalena, Juana uan María imama Santiago. Noijki ompa okatkaj oksekimej siuamej tlen okinmiluijkej apóstoles tlen opanok.
11 Pero apóstoles amo okineltokakej porque omokuayejyekouayaj* amo melauak tlen yejuan okijtouayaj.
12 Pedro omoketeuak uan san niman oyajki kanin otoktoka Jesús. Ijkuak otlachixki tlaijtik, san okitak ompa okatka tsotsoli* de lino. Satepan oyajki uan omotlajtlanijtia tlen opanok.
13 Non tonal, ome discípulos oyayaj itech se altepetsintli itoka Emaús. Non altepetsintli okatka kanaj 11 kilómetros ik Jerusalén.
14 Yejuan omotlapouijtiayaj nochi tlen opanok.
15 Ijkuak omotlapouijtiayaj tlen opanok, Jesús okinmajsito uan inuan onejnentia.
16 Pero yejuan amo okixmatkej.
17 Ye okintlajtlani: “¿Tlen nanmotlapouijtiuij?”. Yejuan omoketskej uan omotaya omoyolkokouayaj.
18 Tlakatl tlen omotokayotiaya Cleopas okinankili: “¿Tleka amo tikmati tlen opanok Jerusalén tla ompa tichanti? ¿Amo ompa moaltepe?”.
19 Ye okintlajtlani: “¿Tlen opanok?”. Yejuan okinankilijkej: “Tlen okipanok Jesús Nazareno. Ye okiteititi okatka se profeta ixpan toTajtsin Dios uan inmixpan oksekimej, porque okichi uan okijto miak tlamantli tetlajtlachialti.
20 Teopixkej tlen techyekanaj uan tekiuajkej tlen technauatiaj, okitemaktijkej makimiktikan uan okipilojkej itech kouitl.
21 Tejuan otikneltokayaj ye kimakixtiskia altepetl Israel. Pero yikipia eyi tonal ijkon opanok.
22 Noijki otechtlajtlachialtijkej sekimej siuamej tlen touan pouij. Yejuan san kualkan otlachiatoj kanin otoktoka Jesús.
23 Pero amo okajsikej icuerpo. Satepan otechiluikoj okinmitakej sekimej ángeles tlen okinmiluijkej Jesús yoltok.
24 Sekimej tlen touan okatkaj otlachiatoj kanin otoktoka uan okitakej ijkon ken okijtojkej siuamej. Pero amo okitakej Jesús”.
25 Jesús okinmilui: “¡Namejuan amo namixtlamatkej uan nankitaj oui nankineltokaskej tlen okijtojkej profetas!
26 ¿Amo omonekiaya tlajyouis Cristo uan satepan kiueyitlaliskiaj?”.
27 Ijkuakon Jesús opejki kinyekiluia iTlajtol toTajtsin Dios kanin kijtoua tlen kipanoskia. Okinyekilui tlen okijkuilo Moisés uan tlen okijkuilojkej profetas.
28 Ijkuak yiajsiskiaj itech altepetsintli kanin oyayaj, Jesús omotaya okachi uejka yaskia.
29 Yejuan okitlatlaujtijkej inuan mamokaua. Okiluijkej: “Touan ximokaua porque yitiotlak uan yitlayouas”. Jesús okalak uan ompa inuan omoka.
30 Ijkuak otlakuajtokaj, Jesús okonanki pan, omotlatlaujti, okipojposteki uan okinmajmakak.
31 Ijkuakon yejuan okajsikamatkej akin okatka ye uan okixmatkej, pero ye inmixpan oualpoliuik.
32 Yejuan okimoluijkej: “¿Amo otiyoltlatlayaj ijkuak otechtlapouijtiualaya itech ojtli uan otechyekilui tlen kijtoua iTlajtol toTajtsin Dios?”.
33 Ijkuakon omoketeuakej uan omokopkej Jerusalén. Ompa okinmajsitoj 11 apóstoles uan oksekimej tlen ompa okatkaj.
34 Okijtouayaj: “¡Jesús melauak okiyolitijkej uan okimonextili Simón!”.
35 Ijkuakon ome discípulos okijtojkej tlen opanok ojtli uan ken okixmatkej ijkuak okipojposteki pan.
36 Ijkuak yejuan ijkon okijtojtokaj, Jesús oualmonexti tlatlajkotia uan okinmilui: “Xikpiakan yolseuilistli”.
37 Yejuan omomojtijkej uan ouiuiokayaj porque omokuayejyekojkej* okitakej se espíritu.
38 Pero ye okinmilui: “¿Tleka nanmomojtiaj? ¿Tleka amo nantlaneltokaj?
39 Xikinmitakan nomauan uan nokxiuan. Techkitskikan uan techitakan porque ne nikpia nonakayo uan noomio. Pero se espíritu amo kipia inakayo nion iomio”.
40 Ye okinmititi imauan uan ikxiuan ijkuak ijkon okinmilui.
41 Pero yejuan amo okineltokayaj porque opakiayaj uan omotlajtlachialtijkej. Ijkuakon Jesús okintlajtlani: “¿Nankipiaj itlaj tlen nikkuas?”.
42 Yejuan okimakakej se michin tliuaki.
43 Ye okiseli uan inmixpan okikua.
44 Satepan okinmilui: “Nin tlen onamechilui ijkuak namouan onikatka: ‘Omonekiaya nechpanos tlen kijtoua iTlanauatil Moisés, tlen okijkuilojkej profetas uan tlen kijtoua Salmos’”.
45 Ijkuakon okinpaleui kuali makajsikamatikan tlen kijtosneki iTlajtol toTajtsin Dios.
46 Ye okinmilui: “Nin tlen ijkuilitok: ‘Cristo tlajyouiskia uan ipan eyi tonal toTajtsin Dios kiyolitiskia.
47 Peuaskia motetlapouis ika itoka ompa Jerusalén uan itech nochi altepemej. Ijkon mamoyolkopakan uan kintlapojpoluiliskej intlajtlakol’.
48 Namejuan nankitematiltiskej nin tlamantli.
49 Xikmatikan namechualtitlanilis tlen noTajtsin yokijto namechmakas. Pero ximokauakan Jerusalén hasta ijkuak nankiseliskej chikaualistli tlen uits iluikak”.
50 Satepan Jesús okinuikak Betania, okinmajkokuik imauan uan okinteochi.
51 Ye okinkajte ijkuak okinteochijtoka, uan toTajtsin Dios okiuikak iluikak.
52 Yejuan ixpan omotlankuaketskej uan opakiayaj ijkuak omokopkej Jerusalén.
53 Yejuan nochipa okiueyichiuayaj toTajtsin Dios itech templo.
Notas
^ Nin tonal itoka domingo. Insemana judíos opeuaya ika non tonal.
^ Noso “omonejneuiliayaj”.
^ Noso “tlakemitl”, “tilmajtli”.
^ Noso “omonejneuilijkej”.
