Marcos 11:1-33
11 Jesús uan idiscípulos okatkaj ik tepetl Olivos kanin katej altepemej Betfagué uan Betania, uan yonajsiayaj Jerusalén. Ijkuakon ye okintitlanki ome idiscípulos
2 uan okinnauati: “Xiakan itech neka altepetl tlen nankitaj. Ijkuak namajsitiuij, nankitaskej se burrito ilpitok tlen ayamo ikaj ipan motlalia. Xiktotomakan uan xikualikakan.
3 Tla ikaj namechtlajtlanis: ‘¿Tlen nankichiuaj?’. Namejuan xiknankilikan: ‘ToTeko kineki matikuikilikan pero san niman kikopas’”.
4 Ome discípulos oyajkej uan okajsitoj burrito ilpitok kaltempa itempa ojtli uan okitotonkej.
5 Pero sekimej tlen ompa okatkaj okintlajtlanijkej: “¿Tleka nankitotomaj burrito?”.
6 Discípulos okinnankilijkej ijkon ken Jesús okinmilui uan yejuan okinkauilijkej mayakan.
7 Yejuan okiuikilijkej burrito, okipejpechtijkej ika intlaken uan Jesús ipan omotlali.
8 Miakej okisouayaj intlaken ipan ojtli uan oksekimej ojtempa okitekej imamayo kouitl.
9 Akinmej oyayaj iyekapan Jesús uan akinmej okitokayaj, chikauak okijtouayaj: “¡ToTajtsin Dios timitstlatlaujtiaj xikmalui! ¡Yokiteochijkej akin uits ika itoka Jehová!
10 ¡Yokiteochijkej akin tlanauatiki, iKone topapa David! ¡ToTajtsin Dios timitstlatlaujtiaj, xikmalui ompa iluikak!”.
11 Ijkuak Jesús oajsito Jerusalén, okitato nochi tlen okatka itech templo. Satepan oyajki Betania inuan 12 apóstoles porque yotlayouatoka.
12 Mostlatika ijkuak okiskej Betania, Jesús opejki apismiki.
13 San uejka okitak se higoskouitl tlen okipiaya ixijyo. Okitato kox okipiaya itlakilo pero amo okajsik nion se tlakilotl. Okipiaya san ixijyo porque ijkuakon ayamo otlakiaya* higos.
14 Jesús okilui higoskouitl: “Ayakmo keman ikaj makikua motlakilo”. Uan idiscípulos okikakej tlen okijto.
15 Ijkuak Jesús oajsito Jerusalén, okalak templo okinkixtito akinmej otlanemakayaj uan akinmej otlakouayaj. Okintlatlamotlak mesas kanin otominpatlayaj. Noijki okintlatlamotlak insillas akinmej okinnemakayaj palomas.
16 Amikaj okikauiliaya mapano ika itlamamal itlajko templo.
17 Satepan Jesús okinmachti akinmej ompa okatkaj uan okinmilui: “¿Amo kijtoua iTlajtol toTajtsin Dios: ‘Nokalijtik kitokayotiskej kali kanin motlatlaujtiaj akinmej chantij itech nochi altepemej’? Pero namejuan yonankikopkej se kali kanin nantlachtekij”.
18 Teopixkej tlen otlayekanayaj uan akinmej otlamachtiayaj tlanauatil, okimatkej tlen okichi Jesús uan opejki kitemouaj ken kimiktiskej. Yejuan okimauiliayaj porque miakej okintlajtlachialtiaya ken otlamachtiaya.
19 Ijkuak otiotlakik, Jesús uan idiscípulos okiskej Jerusalén.
20 Mostlatika kualkan, opanokej kanin okatka higoskouitl uan okitakej ouaki hasta ineluayo.
21 Pedro okilnamik tlen opanok uan okilui Jesús: “¡Tlamachti, xikita! Ouaki higoskouitl tlen otikuijuikalti”.
22 Ijkuak Pedro ijkon okijto, Jesús okinmilui idiscípulos: “Xikneltokakan toTajtsin Dios.
23 Ne namechiluia, tla ikaj kiluis nin tepetl mamachiua* uan mamotlamotla ijtik mar, ijkon panos tla tlaneltoka ika nochi iyolo.
24 Ne namechiluia, nochi tlen nankitlajtlanij ijkuak nanmotlatlaujtiaj, xikneltokakan ken yetoskia yonankiselijkej, uan melauak nankiseliskej.
25 Ijkuak nanmoketsaskej nanmotlatlaujtiskej, xiktlapojpoluikan akin itlaj onamechtokti uan ijkon toTajtsin Dios tlen kajki iluikak noijki namechtlapojpoluilis namotlajtlakol”.
26 *
27 Satepan oksepa oajsitoj Jerusalén. Ijkuak Jesús onejnentiaya ik kanin kajki templo, okajsitoj teopixkej tlen otlayekanayaj, akinmej otlamachtiayaj tlanauatil uan tlayekankej.
28 Yejuan okitlajtlanijkej: “¿Akin omitsnauati xikchiua nin tlamantli? ¿Akin omitsualtitlanki xikchiuaki nin tlamantli?”.
29 Jesús okinnankili: “Ne itlaj namechtlajtlanis. Tla nantechnankiliskej, ne namechiluis akin onechnauati manikchiuaki nin tlamantli.
30 Techiluikan, ¿toTajtsin Dios okinauati Juan mateapolakti noso tlakamej?”.
31 Yejuan opejki kimoluiaj: “Tla tikiluiskej toTajtsin Dios okinauati, ye kijtos: ‘¿Tleka amo onankineltokakej?’.
32 Pero ¿akin mixeuis kijtos tlakamej okinauatijkej?”. Yejuan omomojtiayaj porque oksekimej okineltokayaj Juan melauak okatka se profeta.
33 Ikinon okiluijkej Jesús: “Amo tikmatij akin okinauati”. Ye okinmilui: “Ne noijki amo namechiluis akin onechnauati manikchiuaki nin tlamantli”.
Notas
^ Noso “omochiuaya”, “opankisaya”.
^ Noso “mamijkuani”.
^ Seki biblias kipiaj nin versículo pero tlen yiuejkika omoijkuilo ika griego amo kipia.
