Mateo 11:1-30
11 Jesús otetlapouito uan otlamachtito itech okseki altepemej ijkuak otlanki okinnauati tlen kichiuaskej 12 idiscípulos.
2 Pero Juan Bautista otsaktoka uan okimatki tlen okichiuaya Cristo, ikinon okinnauati idiscípulos
3 makitlajtlanitij: “¿Kox te tlen okijtojkej ualaskia noso tikchiaskej okse?”.
4 Jesús okinnankili: “Xikiluitij Juan tlen yonankitakej uan yonankikakej:
5 ‘Yitlachiaj akinmej amo otlachiayaj, yinejnemij akinmej amo onejnemiayaj, yopajtikej akinmej opalaniaya innakayo,* yitlakakij akinmej amo otlakakiayaj, yokinyolitijkej akinmej oixpolikaj uan kinmatiltiaj kuali tlajtoli akinmej amitlaj kipiaj.
6 Paki akin amitlaj kitsakuilia manechneltoka’”.
7 Ijkuak idiscípulos Juan oyajkej, Jesús okinmilui akinmej ompa okatkaj akin okatka Juan. Ye okinmilui: “¿Tlen onankitatoj kanin tlauaki? ¿Se akatl tlen kiuiuika ejekatl?
8 ¿Tlen onankitatoj? ¿Se tlakatl tlen moyektlakentia? Amo, porque akinmej moyektlakentiaj katej inchan tekiuajkej.
9 Pero ¿tlen onankitatoj? ¿Onankitatoj se profeta? Kema, uan ye amo san se profeta.
10 Nin tlen omoijto kichiuaskia Juan: ‘¡Moyekapan niktitlanis akin tetlapouis uan mitschipauilijtias ojtli!’.
11 Ne namechiluia, amikaj okachi ueyititok ken Juan Bautista. Pero akin amo ueyititos itech Tekiuajkayotl tlen kajki iluikak, okachi ueyititos uan amo ijkon ken Juan.
12 Ijkuak Juan Bautista opejki tetlapouia, miakej opejki mochijchikauaj yetoskej itech Tekiuajkayotl tlen kajki iluikak. Akinmej mochijchikauaj uelis ompa yetoskej.
13 Profetas uan iTlanauatil Moisés okitematiltijkej tlen panoskia hasta ijkuak Juan opejki tetlapouia.
14 Ye ‘Elías tlen omoijto ualaskia’ maski nankineltokaskej noso amo.
15 Mayektlakaki akin kinpia inakasuan”.
16 “¿Tlen kichiuaj akinmej axkan yoltokej? Yejuan kichiuaj ken konemej tlen motlaliaj tiankisko uan kintsajtsiliaj akinmej inuan mauiltiaj:
17 ‘Otikpitskej flauta pero amo onanmijtotijkej. Otimechtlakuikilijkej tlakuikalmej teyolkokojkej pero amo onanmoyolkokojkej uan amo onanmoelpanuitekej’.
18 Juan amo otlakuaya uan amo okoniaya vino pero miakej kijtouaj: ‘Kipia se ejekatl’.*
19 IKone Tlakatl tlakua uan koni vino pero miakej kijtouaj: ‘Nin tlakatl san tlakua uan tlauana. Mouika inuan tominololojkej uan noijki mouika inuan akinmej tlajtlakolchiuaj’. Pero akin kichiua tlen kuali kiteititia ixtlamatki”.
20 Ijkuakon okinmajuak akinmej ochantiayaj itech altepemej kanin okinchi miakej milagros porque amo omoyolkopkej. Okinmilui:
21 “¡Mialmastin akinmej chantij Corazín uan akinmej chantij Betsaida! Porque tla akinmej chantij Tiro uan Sidón kinmitaskiaj milagros tlen onankinmitakej, yejuan yiuejkika moyolkopaskiaj. Noijki kimotlaliliskiaj intlaken tetsojtsopiti* uan motlaliskiaj ijtik tlikonextli.
22 Ne namechiluia, okachi nantlajyouiskej ijkuak toTajtsin Dios tlaixkomakas, uan amo ken otlajyouijkej akinmej chantij Tiro uan Sidón.
23 ¿Nanyaskej iluikak namejuan tlen nanchantij Capernaúm? Amo. Namejuan nanyaskej ijtik Mikatekochtli.* Porque tla akinmej ochantiayaj Sodoma kinmitaskiaj milagros tlen omochijkej itech namoaltepe, yejuan ok yoltoskiaj.
24 Ne namechiluia, okachi nantlajyouiskej ijkuak toTajtsin Dios tlaixkomakas uan amo ken otlajyouijkej akinmej ochantiayaj Sodoma”.
25 Non tonal Jesús okijto: “NoTajtsin, teixpan nimitsueyichiua, te moaxka iluikak uan tlaltikpak. Te otikinmatilti nochi nin tlamantli akinmej yolyamankej ken konemej pero otikintlatili akinmej ixtlamatkej.
26 Kema noTajtsin, tejuatsin ijkon otikmonekilti tikchiuas”.
27 Noijki okijto: “NoTajtsin onechmakak nochi tlen onka. Amikaj kuali kixmati teKone, san toTajtsin kixmati. Noijki amikaj kuali kixmati toTajtsin, san teKone kuali kixmati uan nochtin akinmej ye kinkauilis makixmatikan.
28 Nouan xiualakan nochtin namejuan tlen chikauak nantekipanouaj uan yetoskia ken nankimamajtokej itlaj etik, uan ne namechyolseuis.
29 Xikmoajkolmamaltikan noko* uan ximochiuakan nodiscípulos porque ne niyolyamanki uan amo nimoueyineki. Ne namechyolseuis.
30 Porque noko amo oui nankiuikaskej uan notlamamal amo okachi etik”.
Notas
^ Noso “okipiayaj lepra”.
^ Noso “demonio”.
^ Xikita diccionario.
^ Ika griego moijtoua Hades. Xikita diccionario.
^ Nin kijtosneki se kouitl noso se tepostli tlen kimoajkolmamaltiaj para itlaj kiuikaskej.
