Mateo 25:1-46
25 “Tekiuajkayotl tlen kajki iluikak yetoskia ken majtlaktli ichpochmej. Yejuan okiuikakej intlauil uan okinamikitoj novio.
2 Makuili ichpochmej amo okatkaj ixtlamatkej uan makuili okatkaj ixtlamatkej.
3 Ichpochmej tlen amo ixtlamatkej okiuikakej intlauil pero amo okiuikakej aceite.
4 Pero ichpochmej ixtlamatkej, okiuikakej intlauil uan noijki okiuikakej aceite ika kontsin.
5 Ichpochmej opejki kochisnekij uan okochkej porque novio omouejkauaya.
6 Pero tlajkoyouak ikaj chikauak okijto: ‘¡Novio yoajsiko! ¡Xiuiaj xiknamikitij!’.
7 Nochtin ichpochmej oijsakej uan okixotlaltijkej intlauil.
8 Ichpochmej tlen amo okatkaj ixtlamatkej okinmiluijkej ichpochmej ixtlamatkej: ‘Techmakakan tepitsin namoaceite porque yiseuis totlauil’.
9 Yejuan okinmiluijkej: ‘Xamo amo tinochtin techajxilis. Xiakan xikmokouitij kanin kinemakaj’.
10 Pero novio oajsiko ijkuak yejuan okikouatoj aceite. Ichpochmej tlen ompa omochixtokaj, okalakej iuan novio kanin omonamikti uan otlatsakej.
11 Ijkuak omokopatoj ichpochmej tlen okikouatoj aceite, okiluijkej novio: ‘¡Toteko, toteko, techtlatlapoli!’.
12 Pero ye okinnankili: ‘Ne namechiluia, amo namechixmati’”.
13 “Ikinon ximotlachilijtokan porque tonal uan hora amo nankimatij”.
14 “Tekiuajkayotl noijki yetoskia ken se tlakatl tlen oyajki okse altepetl. Ijkuak ayamo oyaya, otlanauati makinnotsatij itlakeualuan iuan okinmilui makimaluikan tlen iaxka.
15 Se okimakak makuili bolsa tomin,* okse okimakak ome bolsa uan okse okimakak se bolsa. Okinmajmakak ijkon ken okitak uelis kitekipanoskej uan ye oyajki okse altepetl.
16 Tlakeuali tlen okiseli makuili bolsa tomin, san niman otlasemanato uan okitlanki ok makuili bolsa tomin.
17 Noijki tlakeuali tlen okiseli ome bolsa tomin okitlanki ok ome bolsa tomin.
18 Pero tlakeuali tlen okiseli san se bolsa tomin, otlachkuato uan okitlalpacho itomin iteko”.
19 “Opanok miak tonal uan non tlakatl omokopato. Okintlajtlani itlakeualuan kox okitekipanojkej itomin.
20 Tlakeuali tlen okiseli makuili bolsa tomin, okiuikili iteko ok makuili bolsa tomin uan okilui: ‘Noteko, otechmakak makuili bolsa tomin uan oniktlanki ok makuili’.
21 Iteko okilui: ‘¡Kuali tlen otikchi uan kuali titekipanoua! Kuali otikmalui seki tlamantli maski amo miak ikinon okachi miak nimitsmakas. Xiuiki uan nouan xipaki’.
22 Satepan oajsito tlakeuali tlen okiseli ome bolsa tomin uan okilui: ‘Noteko, otechmakak ome bolsa tomin uan oniktlanki ok ome’.
23 Iteko okilui: ‘¡Kuali tlen otikchi uan kuali titekipanoua! Kuali otikmalui seki tlamantli maski amo miak ikinon okachi miak nimitsmakas. Xiuiki uan nouan xipaki’”.
24 “Saiktlami oajsito tlakeuali tlen okiseli se bolsa tomin uan okilui: ‘Noteko, ne nikmati san niman tikualani, tikmoaxkatia tlen amo otiktokak uan tikololoua tlen amo otikchipa.
25 Ikinon onimomojti uan oniktlalpachoto motomin. Nikan kajki tlen moaxka’.
26 Iteko okilui: ‘Te amo kuali titekipanoua uan titlatsijki. ¿Yotikmatiaya nikmoaxkatia tlen amo oniktokak uan nikololoua tlen amo onikchipa?
27 Tla otikmatiaya, omonekiaya tikuikas notomin itech banco. Ijkon ijkuak niualaskia, nikseliskia tlen kitlaniskia notomin’”.
28 “Satepan iteko otlanauati: ‘Xikkixtilikan tomin tlen kipixtok uan xikmakakan akin kipia majtlaktli bolsa tomin.
29 Porque akin itlaj kipia okachi kimakaskej. Pero akin amitlaj kipia kikixtiliskej nochi tlen kipia.
30 Tlakeuali tlen amo yolkuali xikkixtikan uan xikkauatij kanin tlayoua. Ompa tlauelchokas uan kualanis’”.
31 “IKone Tlakatl motlalis ipan ueyi itrono ijkuak ye uits ika ichikaualis inuan nochtin ángeles.
32 Nochtin ixpan kinnechikoskej uan ye kinxexelos ijkon ken se tlajpixki kinxexeloua ichkamej uan tentsomej.
33 Ichkamej kintlalis iyekma pero tentsomej kintlalis iopochma”.
34 “Ijkuakon Tekiua kinmiluis akinmej yetoskej iyekma: ‘Xiualakan namejuan tlen noTajtsin onamechteochi. Xikselikan Tekiuajkayotl tlen onamechyektlalilijkej ijkuak ayamo ikaj okatka.
35 Porque oniapismikiaya uan namejuan onantechtlamakakej. Oniamikiaya uan namejuan onantechmakakej atl. Onantechkauilijkej manimokaua namochan maski amo onantechixmatiayaj.
36 Amo onikpiaya notlaken uan namejuan onantechmakakej notlaken. Onimokokouaya uan onantechmaluijkej. Onitsaktoka uan onantechitakoj’.
37 Ijkuakon akinmej kichiuaj tlen kuali kiluiskej: ‘ToTeko, ¿keman otimitsitakej otiapismikiaya uan otimitstlamakakej, noso keman otiamikiaya uan otimitsmakakej atl?
38 ¿Keman otimitskauilijkej ximokaua tochan maski amo otimitsixmatiayaj? ¿Keman otikitakej amo otikpiaya motlaken uan otimitsmakakej motlaken?
39 ¿Keman otimokoko noso otitsaktoka uan otimitsitatoj?’.
40 Ijkuakon Tekiua kinnankilis: ‘Ne namechiluia, nochi tlen onankinchiuilijkej nokniuan tlen amo okachi ueyititokej, kijtosneki ne onantechchiuilijkej’”.
41 “Akinmej yetoskej iopochma kinmiluis: ‘Xiakan namejuan tlen toTajtsin Dios yokijto nanmikiskej. Xiakan ijtik tlitl tlen sepa teixpoloua, ompa Diablo uan iángeles tlajyouiskej.
42 Porque oniapismikiaya uan namejuan amo onantechtlamakakej. Oniamikiaya uan namejuan amo onantechmakakej atl.
43 Amo onantechkauilijkej manimokaua namochan porque amo onantechixmatiayaj. Amo onikpiaya notlaken uan namejuan amo onantechmakakej notlaken. Onimokokouaya uan onitsaktoka pero amo onantechmaluijkej’.
44 Yejuan noijki kiluiskej: ‘ToTeko, ¿keman otimitsitakej otiapismikiaya, otiamikiaya, amo otimitsixmatkej, amo otikpiaya motlaken, otimokokouaya, otitsaktoka uan amo otimitspaleuijkej?’.
45 Ijkuakon ye kinnankilis: ‘Ne namechiluia, nochi tlen amo onankinchiuilijkej nokniuan tlen amo okachi ueyititokej, kijtosneki noijki amo onantechchiuilijkej’.
46 Ninmej sepa mikiskej, pero akinmej kichiuaj tlen kuali nochipa yoltoskej”.
Notas
^ Noso “talentos”. Se talento tlen okitamachiuayaj griegos okipiaya 20.4 kilos.
