Mateo 5:1-48
-
JESÚS OTLAMACHTI ITECH TEPETL (1-48)
-
Jesús opejki tlamachtia (1, 2)
-
Chiknaui tlamantli tlen kichiua matipakikan (3-12)
-
Istatl uan tlauili (13-16)
-
Jesús okichiuako tlen kijtoua iTlanauatil Moisés (17-20)
-
Otlamachti ken tikyektlaliskej ouijkayotl (21-26), amo matiauilnemikan (27-30), amo matikkauakan tosiua noso tonamik (31, 32), matikchiuakan tlen tikijtouaj (33-37), amo matimomakopakan (38-42), matikintlasojtlakan akinmej techkokoliaj (43-48)
-
5 Jesús otlejkok ipan se tepetl ijkuak okinmitak miakej omonechikojkej. Ompa omotlali uan inauak omotokijkej idiscípulos.
2 Ye opejki kinmachtia uan okinmilui:
3 “Pakij akinmej kimatij moneki kixmatiskej toTajtsin Dios, porque yejuan inmiaxka Tekiuajkayotl tlen kajki iluikak”.
4 “Pakij akinmej moyolkokouaj porque yejuan kinyolseuiskej”.
5 “Pakij akinmej yolyamankej porque kinmaxkatiliskej tlaltikpak”.
6 “Pakij akinmej kinekij nochi kuali mamochiua, porque toTajtsin Dios kinmakas tlen kitlajtlanij”.
7 “Pakij akinmej teiknomatij porque yejuan noijki kinmiknomatiskej”.
8 “Pakij akinmej yolchipauakej, porque yejuan kuali kixmatiskej toTajtsin Dios”.
9 “Pakij akinmej kichiuaj mayeto yolseuilistli, porque yejuan kinnotsaskej ikoneuan toTajtsin Dios”.
10 “Pakij akinmej kintlajyouiltiaj porque kichiuaj tlen kuali. Yejuan inmiaxka Tekiuajkayotl tlen kajki iluikak”.
11 “Xipakikan namejuan ijkuak namechuijuikaltiaj, ijkuak namechtlajyouiltiaj uan ijkuak kijtojtinemij amo kuali tlen nankichiuaj porque nantechneltokaj.
12 Xipakikan porque toTajtsin Dios namechteochiuas. Yiuejkika profetas noijki okintlajyouiltijkej ijkon ken namejuan”.
13 “Namejuan nankatej ken istatl itech tlaltikpak. Pero tla istatl ayakmo poyek, ¿kox uelis oksepa tlapoyelis? Kitlamotlaskej uan ipan tlajtlaksaskej* porque ayakmo kuali”.
14 “Namejuan nankatej ken tlauili itech tlaltikpak. Amo uelis motlatis se altepetl tlen kajki ipan se tepetl.
15 Amikaj kixotlaltia se tlauili uan satepan kitsakua ika se chikiuitl.* Ye kitlalia kanin kintlauilis nochtin tlen katej kalijtik.
16 Noijki ijkon xikintlauilikan oksekimej. Makitakan tlen kuali nankichiuaj uan ijkon kiueyichiuaskej toTajtsin Dios tlen kajki iluikak”.
17 “Amo ximokuayejyekokan* onikpojpoloko iTlanauatil Moisés uan tlen okijkuilojkej profetas. Ne onikchiuako tlen ompa kijtoua uan amo onikpojpoloko.
18 Ne namechiluia, amo pojpoliuis se letra tsikitsin nion se pedazo letra tlen ijkuilitok itech iTlanauatil Moisés hasta nochi mamochiua. Ijkon ken iluikak uan tlaltikpak amo uelis pojpoliuiskej.
19 Ikinon akin amo kitlakamati* se tlanauatil maski tsikitsin uan kinmachtia oksekimej ijkon makichiuakan, kitaskej amitlaj ipati itech Tekiuajkayotl tlen kajki iluikak. Pero akin kitlakamati* uan kinmachtia oksekimej ijkon makichiuakan, kitaskej ueyititok itech Tekiuajkayotl tlen kajki iluikak.
20 Tla nankichiuaj ken akinmej tlamachtiaj tlanauatil uan ken fariseos, amo keman nankalakiskej itech Tekiuajkayotl tlen kajki iluikak”.
21 “Namejuan nankimatij namouejkatatajuan okinmiluijkej: ‘Amo xitemikti uan akin temiktis kiuikaskej ixpan juez’.
22 Pero ne namechiluia, akin kikokolis ikni, kiuikaskej ixpan juez. Akin kiuijuikaltis ikni, kiuikaskej inmixpan jueces. Pero akin kiluis ikni: ‘Tixoxo uan amitlaj mopati’, uelis yas ijtik Gehena* kanin milintok tlitl”.
23 “Ikinon tla tikuika motetliokolil kanin kajki altar uan ompa tikilnamiki otimokualani iuan se mokni,
24 ompa ixpan altar xikkajteua motetliokolil uan xio. Achto ximotlapojpoluiti iuan mokni uan satepan xiktemakati motetliokolil”.
25 “Tla ikaj mitsteluia ixpan tekiua, san niman xikyektlalikan ouijkayotl ijkuak ayamo namonajsij kanin kajki tekiua. Tlamo ye mitstemaktis ixpan juez uan juez tlanauatis mamitsakuakan.
26 Xikmato amo tikisas hasta ijkuak tiktlaxtlauas nochi tlen mitstlajtlaniliskej”.
27 “Namejuan nankimatij yiuejkika omoijto: ‘Amo xiauilnemi’.*
28 Pero ne namechiluia, akin kiuelita se siuatl uan kineki iuan motekas, kijtosneki iyolipan yotlajtlakolchi.
29 Tla moixtololo tlen kajki moyekma kichiua xitlajtlakolchiua, xikmokixtili uan uejka xiktlamotla. Okachi kuali xikpolo itlaj tlen kipia mocuerpo uan amo nochi mocuerpo makitlamotlakan ijtik Gehena.*
30 Noijki tla moyekma kichiua xitlajtlakolchiua, xikmotekili uan uejka xiktlamotla. Okachi kuali xikpolo itlaj tlen kipia mocuerpo uan amo nochi mocuerpo makitlamotlakan ijtik Gehena”.*
31 “Noijki yiuejkika omoijto: ‘Tla se tlakatl kikauas isiua, makimaka se amatl kanin kijtoua kikaua’.
32 Pero ne namechiluia, tla se tlakatl kikauas isiua maski isiua amo oauilnenki,* yetos itlajtlakol tla isiua auilnemis.* Uan tla se tlakatl monamiktis iuan non siuatl, noijki auilnemis”.*
33 “Noijki nankimatij namouejkatatajuan okinmiluijkej: ‘Amo xikijto itlaj tikchiuas tla amo tikchiuas. Xikchiua nochi tlen tikiluia Jehová’.
34 Pero ne namechiluia, amo san xikijtokan itlaj nankichiuaskej. Amo xikteneuakan iluikak ijkuak nankijtoskej itlaj nankichiuaskej, porque ompa kajki itrono toTajtsin Dios.
35 Amo xikteneuakan tlaltikpak ijkuak nankijtoskej itlaj nankichiuaskej, porque toTajtsin Dios ipan kinseuia ikxiuan. Nion amo xikteneuakan Jerusalén, porque non altepetl iaxka ueyi Tekiua.*
36 Amo xikteneua motsonteko ijkuak tikijtos itlaj tikchiuas, porque amo uelis tikchiuas maistaya noso matlileua nion se motsonkal.
37 Tla nankijtoskej: ‘Kema’, ijkon xikchiuakan, pero tla nankijtoskej: ‘Amo’, amo xikchiuakan. Porque tla amo nankichiuaj tlen nankijtouaj, kijtosneki nankichijtokej tlen kineki Satanás”.
38 “Namejuan nankimatij yiuejkika omoijto: ‘Tla ikaj mitsixtololokopina noijki makixtololokopinakan. Tla ikaj mitstlantepeua noijki makitlantepeuakan’.
39 Pero ne namechiluia, amo ximomakopakan tla ikaj itlaj namechtoktia. Tla ikaj mitsixtlatsinia, ximixkopa para oksekan mamitsixtlatsini.
40 Tla ikaj mitsteluis ixpan tekiua porque kineki kimokauis se motlaken, xikmaka noijki tlen tikonakijtok.*
41 Tla se tekiua mitsnauatia xitekipano se hora, te xitekipano ome hora.
42 Tla ikaj itlaj mitstlajtlanilis, xikmaka. Noijki tla ikaj itlaj mitstlaneuilis, xiktlaneti”.
43 “Namejuan nankimatij yiuejkika omoijto: ‘Xiktlasojtla mokni uan xikkokoli akin mitskokolia’.
44 Pero ne namechiluia, xikintlasojtlakan akinmej namechkokoliaj uan ximotlatlaujtikan inpatka akinmej namechtlajyouiltiaj.
45 Ijkon nankiteititiskej namejuan nanikoneuan toTajtsin Dios tlen kajki iluikak. Porque ye kichiua matlaui tonaltsin inpan akinmej kichiuaj tlen kuali uan akinmej kichiuaj tlen amo kuali. Noijki kichiua makiaui inpan yolkualmej uan akinmej amo yolkualmej.
46 ¿Tlen nankitlaniskej tla nankintlasojtlaj san akinmej namechtlasojtlaj? ¿Amo noijki ijkon kichiuaj tominololojkej?
47 ¿Kox okachi ipati tla san nankintlajpalouaj namokniuan? ¿Amo noijki ijkon kichiuaj akinmej chantij itech okseki altepemej?
48 Ikinon nochipa xikchiuakan ken toTajtsin Dios tlen kajki iluikak”.
Notas
^ Noso “mokejketsaskej”.
^ Nin chikiuitl ika otlatamachiuayaj.
^ Noso “ximonejneuilikan”.
^ Noso “kiuelkaki”.
^ Noso “kiuelkaki”.
^ Xikita diccionario.
^ Noso “amo xikkajkayaua mosiua noso monamik”.
^ Xikita diccionario.
^ Xikita diccionario.
^ Ika griego moijtoua pornéia. Xikita diccionario kanin kijtoua auilnemi.
^ Noso “kikajkayauas iuan okse tlakatl”.
^ Noso “kikajkayauas iuan okse siuatl”.
^ Kijtosneki toTajtsin Dios.
^ Noso “tiktlalijtok”, “tikkentok”.
