Romanos 12:1-21
12 Nokniuan, toTajtsin Dios namechiknomati ikinon namechtlatlaujtia xiktemaktikan namocuerpo yoltok ken se tetliokolil chipauak uan toTajtsin Dios kiselis. Noijki kuali ximokuayejyekokan* ken nankitekichiuiliskej.
2 Ayakmo xikchiuakan tlen kichiuaj akinmej chantij tlaltikpak. Xikkauilikan toTajtsin Dios makipatla tlen nanmokuayejyekouaj.* Ijkon namoneuian nankimatiskej teyolpakti, kuali uan ajsitok tlen kimonekiltia toTajtsin Dios.
3 ToTajtsin Dios yonechtliokoli tlen kuali ikinon nannochtin namechiluia amo ximokuayejyekokan* okachi nanueyititokej. Kuali ximokuayejyekokan* porque toTajtsin Dios onamechpaleui xitlaneltokakan.
4 Porque tocuerpo sasalitok ika miak tlamantli pero sejse tlamantli kichiua tlatlamantli tekitl.
5 Tejuan noijki tipouij san itech se cuerpo iuan Cristo maski timiakej. Pero tinochtin tisasalitokej inuan oksekimej.
6 ToTajtsin Dios yolkuali uan techpaleuia matikchiuakan tlatlamantli tekitl miak ipati. Tla moneki tiktematiltiskej tlen kijtoua toTajtsin Dios, matiktematiltikan ijkon ken titlaneltokaj.
7 Tla moneki tikinpaleuiskej oksekimej, matimochijchikauakan matikinpaleuikan. Noijki tla ikaj ueli tlamachtia, matlamachti.
8 Akin kimati teyolchikauas, mateyolchikaua. Akin kitemaka tlen kipia, makitemaka ika nochi iyolo. Akin tlayekana, mamochijchikaua kuali matlayekana. Akin teiknomati, mapaki ijkuak teiknomati.
9 Amo san ik xikchiuakan nanmotlasojtlaj. Xiktlauelitakan nochi tlen amo kuali uan xikchiuakan tlen kuali.
10 Ximotlasojtlakan ken namiknimej. Noijki namejuan achto xitetlakaitakan.
11 Ximochijchikauakan xitekipanokan uan amo xitlatsiuikan. Xikkauilikan espíritu santo manamechmaka chikaualistli. Xiktekichiuilikan Jehová.
12 Xipakikan ika tlen satepan nankiseliskej. Xitlaxikokan ijkuak nantlajyouiaj. Nochipa ximotlatlaujtikan.
13 Xikinmakakan namokniuan tlen kinpoloua. Nochipa kuali xikinselikan oksekimej.
14 Xikiluikan toTajtsin Dios makinteochiua akinmej namechtlajyouiltiaj uan amo xikinuijuikaltikan.
15 Xipakikan inuan akinmej pakij. Xichokakan inuan akinmej chokaj.
16 Xikinmitakan oksekimej ijkon ken namejuan nanmotaj. Xiyetokan nanyolyamankej uan amo ximoueyinekikan. Amo ximomachilikan namixtlamatkej.
17 Amo ximomakopakan tla ikaj itlaj namechtoktia. Xikchiuakan tlen oksekimej kitaj kuali.
18 Kuali ximouikakan inuan oksekimej hasta kanin uelis ijkon nankichiuaskej.
19 Nokniuan, amo ximomakopakan tla ikaj itlaj namechtoktia. Okachi kuali xikkauilikan toTajtsin Dios makiteititi ikualanilis. Porque ijkuilitok: “Jehová kijtoua: ‘Ne nimomakopas uan ne nikintlajyouiltis’”.
20 “Tla apismiki akin mitskokolia, xiktlamaka. Tla amiki, xikmaka itlaj makoni. Ijkon uelis tiktlajtlachialtis uan uelis tikyolyamanis”.
21 Amo xikkauili tlen amo kuali mamitstlani. Xiktlanili tlen amo kuali ika tlen kuali.
Notas
^ Noso “ximonejneuilikan”.
^ Noso “nanmonejneuiliaj”.
^ Noso “ximonejneuilikan”.
^ Noso “ximonejneuilikan”.
