Romanos 13:1-14
13 Nochtin makintlakamatikan* tekiuajkej, porque amo onka se tekiua tla toTajtsin Dios amo kikauilia mayeto. Nochtin tekiuajkej okintlali toTajtsin Dios uan tlatlamantli tlanauatiaj.
2 Akinmej kinmixnamikij tekiuajkej kijtosneki kixnamikij toTajtsin Dios. Tlajyouiskej akinmej amo kitlakaitaj tlen okitlali toTajtsin Dios.
3 Akinmej kichiuaj tlen kuali amo kinmauiliaj* tekiuajkej. Pero akinmej kichiuaj tlen amo kuali kinmauiliaj* tekiuajkej. Tla amo nankinekij nankinmauiliskej* tekiuajkej, xikchiuakan tlen kuali uan yejuan namechtlakaitaskej.
4 Porque tekiuajkej kichiuaj tlen toTajtsin Dios kineki para namechpaleuiskej. Pero tla nankichiuaj tlen amo kuali, xikinmauilikan* tekiuajkej porque yejuan amo san nenka tlanauatiaj uan uelis namechtlajyouiltiskej. Yejuan kichiuaj tlen toTajtsin Dios kineki uan kintlajyouiltiaj akinmej kichiuaj tlen amo kuali.
5 Moneki xikintlakamatikan* tekiuajkej para nankipiaskej chipauak namotlalnamikilis uan amo porque uelis namechtlajyouiltiskej.
6 Ikinon namejuan nankitlaxtlauaj tlen kitlajtlanij tekiuajkej. Yejuan nochipa kinpaleuiaj oksekimej uan ijkon kichiuaj tlen toTajtsin Dios kineki.
7 Nochtin xikinmakakan tlen kinnamiki. Tla ikaj namechiluia xitlatlaxtlauakan, nochi xitlatlaxtlauakan. Tla ikaj kineki xiktlakamatikan,* xiktlakamatikan.* Tla ikaj kineki xiktlakaitakan, xiktlakaitakan.
8 Amikaj itlaj xikuikilikan, san moneki ximosepantlasojtlakan. Porque akin kintlasojtla oksekimej kichiua tlen kijtoua tlanauatil.
9 Tlanauatil kijtoua: “Amo xiauilnemi,* amo xitemikti, amo xitlachteki, amo xitlaixneki”. Ninmej tlanauatilmej uan okseki tlanauatilmej mochiua san se tlanauatil uan kijtoua: “Xikintlasojtla oksekimej ijkon ken te timotlasojtla”.
10 Akin tetlasojtla amitlaj kintoktia oksekimej. Ikinon akin tetlasojtla kichijtok tlen kijtoua tlanauatil.
11 Moneki ijkon xikchiuakan porque nankimatij yoajsik tonal namijsaskej uan ayakmo nankochiskej. Ijkuak opejki titlaneltokaj amo miak opoliuiaya para techmakixtiskej, pero axkan okachi ayakmo miak poliui.
12 Yipanoti youali uan yitlanestiuits ikinon ayakmo matikchiuakan ken kichiuaj akinmej katej kanin tlayoua. Matikmotlalilikan tepostli tlen monejneki* kanin tlanestok.
13 Matiyeknemikan ken yetoskia tinemij kanin tlanestok. Amo matiakan iluimej kanin kichiuaj tlen amo kuali, amo matitlauanakan, amo matiauilnemikan, amo matikchiuakan tlen kichiuaj akinmej ayakmo pinauaj,* amo matimokualanikan nion amo matichauatikan.
14 Xikchiuakan tlen okichi toTeko Jesucristo uan amo ximokuayejyekojtokan* ken nantlajtlakolchiuaskej.
Notas
^ Noso “makinuelkakikan”.
^ Noso “kinmimakasij”.
^ Noso “kinmimakasij”.
^ Noso “nankinmimakasiskej”.
^ Noso “xikinmimakasikan”.
^ Noso “xikinuelkakikan”.
^ Noso “xikuelkakikan”.
^ Noso “xikuelkakikan”.
^ Noso “amo xikkajkayaua mosiua noso monamik”.
^ Noso “motekitiltia”, “mokui”.
^ Xikita diccionario.
^ Noso “ximonejneuilijtokan”.
