Romanos 3:1-31
3 ¿Ken kipaleuia se tlakatl mayeto judío? ¿Ken kipaleuia se tlakatl makimochiuili circuncisión?
2 Sapanoua tlapaleuia. Achto, judíos okiselijkej iTlajtol toTajtsin Dios.
3 Pero tla sekimej judíos amo tlaneltokaj, ¿kijtosneki toTajtsin Dios amo kichiuas tlen kijtoua?
4 ¡Amo! ToTajtsin Dios amo tlakajkayauas maski nochtin tlakamej matlakajkayauakan. Ijkon ken ijkuilitok: “Tlen tikijtoua kiteititis tiyolkuali uan titlatlanis ijkuak mitsixkomakaskej”.
5 Pero tla ijkuak tikchiuaj tlen amo kuali kiteititia toTajtsin Dios kichiua tlen kuali, ¿tlen tikijtoskej? ¿Kijtosneki toTajtsin Dios amo yolkuali ijkuak techtlajyouiltia? (Ijkon kijtouaj sekimej).
6 ¡Amo! ToTajtsin Dios yolkuali. ¿Ken uelis tlaixkomakas tla amo ijkon kichiuaskia?
7 Tla ne nitlakajkayaua uan non kiteititia toTajtsin Dios kijtoua tlen melauak uan kichiua makiueyichiuakan, ¿tleka ye nechita nitlajtlakole?
8 ¿Tleka amo tikijtouaj: “Matikchiuakan tlen amo kuali para mauiki tlen kuali” ijkon ken sekimej techteluiaj? Yejuan kintlajyouiltiskej ken moneki.
9 ¿Uelis tikijtoskej tejuan okachi kuali tikatej porque tijudíos? ¡Amo! Porque yotikteititijkej nochtin tlajtlakolejkej maski judíos noso griegos.
10 Ijkon ken ijkuilitok: “Amo onka nion se tlakatl yolkuali.
11 Amo onka nion se ixtlamatki uan amikaj kitemoua toTajtsin Dios.
12 Nochtin okikajkej uan nochtin amitlaj inpati. Amikaj kichiua tlen kuali”.
13 “Tlen kijtouaj yetoskia ken temiktiaj uan ika innenepil tlakajkayauaj”. “Itech inte kipixtokej veneno ken se kouatl”.
14 “Inkamak tentok ika tlen amo kuali uan san kualantokej”.
15 “Yejuan motlalouaj temiktitiuij”.
16 “Yejuan kinyolkokouaj oksekimej uan kintlajyouiltiaj.
17 Noijki amo kimatij kuali mouikaskej inuan oksekimej”.
18 “Yejuan amo kimauiliaj toTajtsin Dios”.
19 Tejuan tikmatij akinmej katej imak iTlanauatil Moisés, moneki kichiuaskej nochi tlen kijtoua non Tlanauatil. Ijkon amikaj kijtos amitlaj okichi uan moteititis nochtin tlajtlakolejkej ixpan toTajtsin Dios uan moneki tlajyouiskej.
20 Amikaj uelis kijtos ye yolkuali ixpan toTajtsin Dios porque kichiua tlen kijtoua tlanauatil, porque tlanauatil techpaleuia kuali matikmatikan tlen kijtosneki tlajtlakoli.
21 Pero axkan yomoteititi toTajtsin Dios uelis techitas tiyolkualmej maski amo tiktlakamatij* tlanauatil. Ijkon kijtoua iTlanauatil Moisés uan ijkon okijtojkej profetas.
22 ToTajtsin Dios uelis kitas yolkuali akin kineltoka Jesucristo maski san kanin oneski.*
23 Porque nochtin otlajtlakolchijkej uan amo ueli kiteititiaj iueyitilis toTajtsin Dios.
24 Pero toTajtsin Dios kinmita yolkualmej porque Cristo Jesús okintlaxtla* uan ijkon okinmakixti. ToTajtsin Dios okinmakixti porque kintliokolia tlen kuali.
25 ToTajtsin Dios techkauilia oksepa iuan matimouikakan tla tikneltokaj Jesús okitemakak ieso. Ijkon okiteititi ye kichiua tlen kuali, okiteititi kimati mochias uan okintlapojpolui akinmej yiuejkika otlajtlakolchijkej.
26 Axkan noijki kiteititia kichiua tlen kuali ijkuak kita yolkuali akin kineltoka Jesús.
27 ¿Moneki timoueyinekiskej? Amo. ¿Tlen tlanauatil amo techkauilia matimoueyinekikan? ¿Tlanauatil tlen techiluia tlen tikchiuaskej? Amo. Tlanauatil tlen techiluia matitlaneltokakan amo techkauilia ijkon matikchiuakan.
28 Yotikitakej, se tlakatl mochiua yolkuali ijkuak tlaneltoka uan amo ijkuak kitlakamati* tlanauatil.
29 ¿Kox toTajtsin Dios san inDios judíos? ¿Amo noijki inDios akinmej chantij itech okseki altepemej? Ye noijki inDios akinmej chantij itech okseki altepemej.
30 Onka san se toTajtsin Dios. Ye kinmitas yolkualmej akinmej tlaneltokaj maski okimochiuilijkej circuncisión noso amo.
31 ¿Kijtosneki amo tikpatioitaj tlanauatil porque titlaneltokaj? ¡Amo! Tejuan tikteititiaj tlanauatil miak ipati.
Notas
^ Noso “tikuelkakij”.
^ Noso “otlakatki”.
^ Xikita diccionario kanin kijtoua okitlaxtla.
^ Noso “kiuelkaki”.
