Romanos 5:1-21
5 Axkan yitechitaj tiyolkualmej porque titlaneltokaj. Matipakikan porque toTeko Jesucristo techpaleuia kuali matimouikakan iuan toTajtsin Dios.
2 Tejuan tikneltokaj Jesús uan non techpaleuia matimotokikan inauak toTajtsin Dios uan techpaleuia matechseli. Matipakikan porque tikchiaj matechueyitlali toTajtsin Dios.
3 Noijki matipakikan ijkuak titlajyouiaj porque non techmachtia matitlaxikokan.
4 ToTajtsin Dios techselia ijkuak titlaxikouaj. Ijkuak toTajtsin Dios techselia, okachi tikchiaj tlen satepan tikseliskej.
5 Tejuan melauak tikneltokaj tlen tikchiaj, porque toTajtsin Dios techmaka iespíritu santo uan ijkon kiteititia techtlasojtla.
6 Ijkuak amikaj otechpaleuiaya, Cristo oixpoliuik inpatka akinmej amo yolkualmej itech tonal tlen omoijto.
7 Oui ikaj motemaktis makimiktikan ipatka se kuali tlakatl, pero xamo ikaj motemaktis makimiktikan ipatka se tlakatl yolkuali.
8 Ijkuak otikatkaj titlajtlakolejkej, Cristo topatka okimiktijkej uan ijkon toTajtsin Dios okiteititi techtlasojtla.
9 Axkan techitaj tiyolkualmej porque Cristo okitemakak ieso, ikinon kuali tikmatij ye techpaleuis matimomakixtikan ijkuak toTajtsin Dios tetlajyouiltis.
10 Maski achto amo otimouikayaj iuan toTajtsin Dios, imikilis iKone techpaleuia iuan matimouikakan. Nin okachi kuali kiteititia imikilis Jesús techpaleuis matimomakixtikan, porque axkan timouikaj iuan toTajtsin Dios.
11 Tejuan noijki tipakij iuan toTajtsin Dios, porque toTeko Jesucristo techpaleuia oksepa matimouikakan iuan toTajtsin Dios.
12 Onka tlajtlakoli ipan tlaltikpak porque se tlakatl otlajtlakolchi uan tlajtlakoli kichiua matimikikan, ikinon tinochtin timikij porque tinochtin titlajtlakolejkej.
13 Porque yokatka tlajtlakoli ipan tlaltikpak ijkuak ayamo okatka iTlanauatil Moisés, pero amikaj uelis kitlajtlakoltiskej tla amo onka tlanauatil.
14 Mikilistli nochtin okinnauatiaya ken se tekiua desde Adán hasta Moisés maski amo otlajtlakolchijkej ken Adán otlajtlakolchi. Adán omotaya ken akin satepan ualaskia.
15 Tlen techtliokolia toTajtsin Dios amo ken itlajtlakol Adán. Miakej oixpolikej porque otlajtlakolchi se tlakatl. Pero okachi miakej okiselijkej iteiknomatilis toTajtsin Dios uan itetliokolil porque Jesucristo kitetliokolia tlen kuali.
16 Amo san se tlamantli kijtosneki itlajtlakol se tlakatl uan itetliokolil toTajtsin Dios. Porque nochtin okintlajtlakoltijkej ijkuak otlajtlakolchi se tlakatl. Pero toTajtsin Dios okitemakak tetliokolil ijkuak miakej otlajtlakolchijkej uan ijkon miakej kinmita yolkualmej.
17 Mikilistli tlanauatia ken se tekiua porque se tlakatl otlajtlakolchi. Pero kuali tikmatij, akinmej okachi kintliokoliaj tlen kuali uan kiseliaj tetliokolil tlen kinpaleuia makinmitakan yolkualmej, kitlasojkamatiliskej Jesucristo uan tlanauatiskej ken tekiuajkej.
18 San se tlajtlakoli okichi nochtin makintlajtlakoltikan, pero san ika se kuali tlamantli miakej kinmitaskej yolkualmej uan yoltoskej.
19 Miakej omochijkej tlajtlakolejkej porque se tlakatl amo otetlakamatki,* pero miakej mochiuaskej yolkualmej porque se tlakatl otetlakamatki.*
20 ToTajtsin Dios okitemakak iTlanauatil Moisés para nochtin makimatikan sapanoua tlajtlakolchiuaj. Pero ijkuak nochtin okachi otlajtlakolchijkej, toTajtsin Dios okachi okitetliokoli tlen kuali.
21 ¿Tleka ijkon okichi? Tlajtlakoli uan mikilistli tlanauatiaj ken tekiuajkej. Itetliokolil toTajtsin Dios tlen kuali noijki tlanauatia ken tekiua para kinmitas yolkualmej oksekimej. Ijkon toTeko Jesucristo kinpaleuis nochipa mayoltokan.
