Romanos 8:1-39
-
Espíritu santo techpaleuia matiyoltokan uan techmakixtia (1-11)
-
“Iespíritu toTajtsin Dios techmatiltia tejuan tiikoneuan toTajtsin Dios” (12-17)
-
“Nochi tlen onka san kichixtok mamonextikan ikoneuan toTajtsin Dios” (18-25)
-
Espíritu santo topatka motlatlaujtia (26, 27)
-
ToTajtsin Dios okijto kinpejpenaskia sekimej (28-30)
-
Titlatlanij porque toTajtsin Dios techtlasojtla (31-39)
8 Ikinon amo kintlajtlakoltiskej akinmej katej iuan Cristo Jesús.
2 Porque itlanauatil espíritu santo tlen kichiua matiyoltokan iuan Cristo Jesús, otechmakixti imak itlanauatil tlajtlakoli uan mikilistli.
3 ITlanauatil Moisés amo uelis techmakixtis porque amo tichikauakej uan titlajtlakolejkej. Pero toTajtsin Dios uelis techmakixtis porque okiualtitlanki iKone ken se tlakatl* para makipojpoloki tlajtlakoli. Ijkon okitlajtlakolti totlajtlakol
4 para matikchiuakan tlen kuali ken kijtoua iTlanauatil Moisés. Ijkon tikchiuaj ijkuak amo tikkauiliaj tocuerpo tlajtlakole matechnauati. Tejuan tikkauiliaj iespíritu toTajtsin Dios matechnauati.
5 Akinmej kichiuaj tlen kineki incuerpo tlajtlakole, mokuayejyekouaj* kichiuaskej tlen amo kuali. Pero akinmej kichiuaj tlen kineki espíritu santo, mokuayejyekouaj* tlen kineki espíritu santo.
6 Tiixpoliuiskej tla san timokuayejyekouaj* tlen amo kuali. Pero tiyoltoskej uan tikpiaskej yolseuilistli tla timokuayejyekouaj* tlen kineki espíritu santo.
7 Amo timouikaskej iuan toTajtsin Dios tla tikkauiliskej tocuerpo tlajtlakole makinauati tlen timokuayejyekouaj.* Tocuerpo tlajtlakole amo kitlakamati* itlanauatil toTajtsin Dios nion amo uelis kitlakamatis.*
8 Ikinon amo ueli kiyolpaktiaj toTajtsin Dios akinmej kichiuaj tlen kineki incuerpo tlajtlakole.
9 Nokniuan, namejuan amo nankichiuaj tlen kineki namocuerpo tlajtlakole. Tla nankipiaj iespíritu toTajtsin Dios, nankichiuaj tlen kineki espíritu santo. Pero akin amo mokuayejyekoua* ken Cristo kijtosneki amo iuan kajki.
10 Pero tla Cristo namouan kajki, espíritu santo kichiua xiyoltokan porque nankichiuaj tlen kuali maski tlajtlakoli yokimikti namocuerpo.
11 Tla nankipiaj iespíritu toTajtsin Dios tlen okiyoliti Jesús, toTajtsin Dios ika iespíritu noijki kichiuas mayolto namocuerpo.*
12 Ikinon nokniuan, tejuan amo moneki tiktlakamatiskej* tocuerpo tlajtlakole.
13 Namejuan nanmikiskej tla nankichiuaj tlen namocuerpo kineki. Pero nanyoltoskej tla nankikauiliskej espíritu santo manamechpaleui ayakmo xikchiuakan tlen kineki namocuerpo.
14 Nochtin akinmej kinyekana espíritu santo, yejuan ikoneuan toTajtsin Dios.
15 Porque amo onankiselijkej se espíritu tlen kichiua xiyetokan tlakeualmej uan oksepa ximomojtikan. Onankiselijkej se espíritu tlen kichiua xiyetokan ikoneuan toTajtsin Dios. Non espíritu techyolinia chikauak matikijtokan: “¡Abba,* noTajtsin!”.
16 Iespíritu toTajtsin Dios techmatiltia tejuan tiikoneuan toTajtsin Dios.
17 Ikinon tla tejuan tiikoneuan toTajtsin Dios tikseliskej tlen ye kineki techmakas. Ye noijki techmakas tlen kimakas Cristo. Noijki techueyitlalis ken Cristo kiueyitlalia tla titlajyouiskej ken ye otlajyoui.
18 Ne nikmati amitlaj ipati tlen axkan techtlajyouiltia tla tikitaskej tlen toTajtsin Dios techititis uan techmakas.
19 Nochi tlen onka san kichixtok mamonextikan ikoneuan toTajtsin Dios.
20 Porque nochi tlen onka oijtlakauik pero amo iselti oijtlakauik. ToTajtsin Dios okitekauili maijtlakaui. Pero okijto oksepa moyektlaliskia
21 porque nochi tlen onka kimakixtiskej imak tlajtlakoli uan mikilistli. Ijkon mochiuaskej ikoneuan toTajtsin Dios uan tetlajtlachialti yetos ijkuak kinmakixtiskej.
22 Tikmatij nochi tlen onka moyolkokoua uan tlajyouia hasta axkan.
23 Pero tejuan noijki timoyolkokouaj ijkuak tikchiaj toTajtsin Dios matechseli ken tiikoneuan, maski yotikselijkej espíritu santo uan satepan tikseliskej okachi miak tlamantli. Ye techselis porque Cristo otlatlaxtla* para techmakixtis itech tocuerpo.
24 Porque otechmakixtijkej ika non tlen tikchiaj. Pero tla yomochi tlen tikchiaj kijtosneki ayakmo tikchiaj. ¿Ken uelis itlaj tikchiaskej tla yomochi?
25 Pero tla tikchiaj tlen amo tikitaj, matikchiakan ika nochi toyolo uan amo matimosotlauakan.
26 Noijki espíritu santo techpaleuia ijkuak amo tichikauakej. Xamo ualeua amo tikmatij tlen tiktlajtlaniskej ijkuak timotlatlaujtiaj, pero espíritu santo topatka motlatlaujtia ijkuak amo tikmatij tlen tikijtoskej.
27 ToTajtsin Dios kita tlen tikpiaj toyolipan uan kimati tlen kineki kijtos espíritu santo, porque ye motlatlaujtia inpatka akinmej yolchipauakej ijkon ken kineki toTajtsin Dios.
28 Tejuan tikmatij toTajtsin Dios kichiua san sekan matekiti nochi tlen kichiua para kinpaleuis akinmej kitlasojtlaj. Ye okinpejpenki porque ijkon okinek kichiuas.
29 ToTajtsin Dios desde achto okinxelo uan okijto yejuan yetoskiaj ken iKone. Ijkon iKone yetoskia okachi ueyi innauak miakej ikniuan.
30 Okinnotski akinmej achto okinpejpenki. Noijki okinmitak yolkualmej akinmej okinnotski. Satepan okinueyitlali akinmej okinmitak yolkualmej.
31 ¿Tlen uelis tikijtoskej ika nochi nin tlamantli? ¿Akin uelis techixnamikis tla toTajtsin Dios touan kajki?
32 Tla ye okitekauili matlajyoui iKone uan okitemakti topatka mamikiki, ¿amo techmakas okseki tlamantli porque techtlasojtla?
33 ¿Akin kinteluis akinmej toTajtsin Dios yokinpejpenki? Porque toTajtsin Dios kinmita yolkualmej.
34 ¿Akin kintlajtlakoltis? Amikaj. Cristo Jesús inpatka oixpoliuik uan toTajtsin Dios okiyoliti. Axkan ye kajki iyekma toTajtsin Dios uan topatka motlatlaujtia.
35 ¿Akin techxelos itech itlasojtlalis Cristo? ¿Ijkuak titlajyouiaj? ¿Ijkuak timotekipachouaj? ¿Ijkuak techtlajyouiltiaj? ¿Ijkuak tiapismikij? ¿Ijkuak amo tikpiaj tlen tikonakiskej?* ¿Ijkuak itlaj techpanos? ¿Ijkuak ikaj kinekis techmiktis?
36 ITlajtol toTajtsin Dios kijtoua: “Nochipa kinekij techmiktiskej porque tipouij itech moaltepe. Yejuan techitaj ken ichkamej tlen kinuikaj kanin tlamiktiaj”.
37 Pero tejuan titlatlanij porque techmaka chikaualistli akin techtlasojtla.
38 Porque ne nikmati amikaj uelis techxelos itech itlasojtlalis toTajtsin Dios. Nion mikilistli, nion yolilistli, nion ángeles, nion tekiuajkej, nion tlen axkan onka, nion tlen satepan yetos, nion chikaualistli,
39 nion tlen onka tlakpak, nion tlen onka tlauejkatlan, nion okse tlamantli tlen onka uelis techxelos itech itlasojtlalis toTajtsin Dios tlen ye kiteititia ika toTeko Cristo Jesús.
Notas
^ Noso “ken tejuan tlen titlajtlakolejkej”.
^ Noso “monejneuiliaj”.
^ Noso “monejneuiliaj”.
^ Noso “timonejneuiliaj”.
^ Noso “timonejneuiliaj”.
^ Noso “timonejneuiliaj”.
^ Noso “kiuelkaki”.
^ Noso “kiuelkakis”.
^ Noso “monejneuilia”.
^ Ika griego moijtoua “namocuerpo tlen ixpoliui”.
^ Noso “tikuelkakiskej”.
^ Nin tlajtoli kajki ika hebreo noso arameo uan kijtosneki “notajtsin”. Konemej ijkon okinnotsayaj inpapanuan.
^ Xikita diccionario kanin kijtoua okitlaxtla.
^ Noso “tiktlaliskej”, “tikmokentiskej”.
