Santiago 2:1-26
2 Nokniuan, ¿tleka nanmixeuiaj nantechikoitaj tla nankineltokaj toTeko Jesucristo tlen ueyititok?
2 Matikijtokan ome tlakamej yauij kanin nanmonechikouaj. Se kipia anillos de oro uan itlaken patio pero okse amitlaj kipia uan itlaken sokio.
3 Namejuan okachi nankitlakaitaj akin kipia itlaken patio uan nankiluiaj: “Ximotlali nikan kanin okachi tlakualkan”. Pero akin amitlaj kipia nankiluiaj: “Te ximoketo” noso nankiluiaj: “Ximotlali ompa ik kanin nikinseuia nokxiuan”.
4 Tla ijkon nankichiuaj kijtosneki nankinmitaj sekimej okachi ueyititokej uan oksekimej amo. ¿Amo kijtosneki nanmochiuaj ken jueces tlen amo kuali teixkomakaj?
5 Techkakikan nokniuan tlen namechtlasojtla. ¿Amo toTajtsin Dios okinpejpenki akinmej oksekimej kinmitaj amitlaj inpati para okachi matlaneltokakan? Yejuan okinpejpenki para kinmaxkatilis Tekiuajkayotl tlen okijto kinmakas akinmej kitlasojtlaj.
6 Pero namejuan nakintlauelitaj akinmej amitlaj kipiaj. ¿Amo namechtlajyouiltiaj akinmej kipiaj miak tomin uan namechtilantiuij inmixpan jueces?
7 ¿Amo yejuan kiuijuikaltiaj kuali namotoka tlen toTajtsin Dios onamechmakak?
8 Ikinon tla nankitlakamatij* itlanauatil tekiua kanin iTlajtol toTajtsin Dios kijtoua: “Xikintlasojtla oksekimej ijkon ken te timotlasojtla”, kuali tlen nankichiuaj.
9 Pero nantlajtlakolchiuaj tla ok nantechikoitaj uan tlanauatil kiteititia amo kuali tlen nankichiuaj.
10 Tla ikaj kitlakamati* nochi iTlanauatil Moisés pero motlapololtia uan amo kitlakamati* se tlanauatil, kijtosneki okixnamik nochi iTlanauatil Moisés.
11 Porque akin okijto: “Amo xiauilnemi”,* noijki okijto: “Amo xitemikti”. Tla amo tiauilnemi pero titemiktia kijtosneki otikixnamik tlanauatil.
12 Nochipa xitlajtokan uan xikchiuakan ken kichiuaj akinmej kinmixkomakaskej ika tlanauatil tlen temakixtia.
13 Akin amo teiknomati amo kiknomatiskej ijkuak kixkomakaskej. Porque okachi ipati titeiknomatiskej uan amo titlaixkomakaskej.
14 Nokniuan, ¿tlen ipati tla ikaj kijtoua tlaneltoka pero amo kichiua tlen kuali? Amo momakixtis tla ijkon kichiua.
15 Matikijtokan se tokni amo kipia itlaken nion amo kipia tlen kikuas,
16 pero ikaj kiluia: “Xio uan amo ximotekipacho, ximoyektlakenti uan xiyektlakua”. ¿Tlen ipati tla amo kimaka tlen kipoloua?
17 Noijki tla titlaneltokaj pero amo tikchiuaj tlen kuali kijtosneki totlaneltokilis miktok.
18 Pero ikaj uelis kijtos: “Te titlaneltoka uan ne nikchiua tlen kuali. ¿Ken tikteititis titlaneltoka tla amitlaj tikchiua? Ne nikchiuas tlen kuali uan ijkon nikteititis nitlaneltoka”.
19 ¿Amo melauak te tikneltoka onka san se toTajtsin Dios? Kuali tla ijkon tikchiua. Pero hasta ejekamej* ijkon kineltokaj uan kimauiliaj* toTajtsin Dios.
20 Te tixoxo, ¿amo tikmati amitlaj ipati titlaneltokas tla amo tikchiua tlen kuali?
21 ToTajtsin Dios okitak yolkuali topapa Abrahán porque okichi tlen kuali. Ye okitak yolkuali ijkuak okitlali ikone tlen omotokayotiaya Isaac ipan altar para kimiktiskia.
22 Te tikmati Abrahán otlaneltokaya uan okichiuaya tlen kuali. Tlen okichi okiteititi melauak otlaneltokaya.
23 Ijkon omochi tlen kijtoua iTlajtol toTajtsin Dios: “Abrahán okineltokak Jehová ikinon ye okitak okatka se tlakatl yolkuali”. Jehová okijto Abrahán okatka iyolikni.
24 Namejuan nankimatij ikaj kitaj yolkuali porque kichiua tlen kuali uan amo porque san tlaneltoka.
25 Rahab omonemakaya pero toTajtsin Dios noijki okitak yolkuali porque okichi tlen kuali. Ye kuali okinseli akinmej ichtaka otlachiatoj uan okinpaleui macholokan.
26 Tocuerpo miktok tla amo mijyotia. Noijki totlaneltokilis miktok tla amo tikchiuaj tlen kuali.
Notas
^ Noso “nankiuelkakij”.
^ Noso “kiuelkaki”.
^ Noso “kiuelkaki”.
^ Noso “amo xikkajkayaua mosiua noso monamik”.
^ Noso “demonios”.
^ Noso “kimakasij”.
