Santiago 3:1-18
3 Nokniuan, amo nannochtin moneki nantlamachtiskej porque nankimatij okachi techixkomakaskej.
2 Porque tinochtin miak uelta timotlapololtiaj. Akin amo motlapololtia ijkuak tlajtoua kijtosneki amo tlajtlakole uan kimati kinauatis nochi icuerpo.
3 Ijkuak se caballo tiktlaliliaj freno ikamak, techtlakamati* uan noijki tikyekanaj nochi icuerpo.
4 Noijki xikinmitakan barcos. Maski se barco ueyi uan molinia ika chikauak ejekatl, kiyekanaj ika se kouitl tsikitsin uan yaui san kanin kiuika akin kiyekana.
5 Ijkon kipanoua tonenepil. Tonenepil kajki itech tocuerpo uan amo ueyi pero san tlen amo kijtoua. ¿Amo melauak san tepitsin tlitl uelis kitlatis ueyi kojyo?
6 Tonenepil yetoskia ken tlitl. Tonenepil kajki itech tocuerpo uan kisokiotia tocuerpo porque kichiua miak tlamantli amo kuali. Uelis kijtlakos toyolilis uan yetoskia ken Gehena* porque teixpoloua.
7 Porque personas uelis kinmansojtiliskej nochtin tekuanimej, totomej, yolkamej tlen motilanaj uan yolkamej tlen katej ijtik atl uan yejuan yokinmansojtilijkej.
8 Pero amikaj ueli kitlakaualtia inenepil. Tonenepil amo ueli tiknauatiaj, teyolkokoua uan tentok ika veneno tlen temiktia.
9 Ika tonenepil tikueyichiuaj toTajtsin Jehová. Pero noijki ika tonenepil tikinuijuikaltiaj oksekimej tlen “toTajtsin Dios okinchijchi ken ye”.
10 Noijki ika tokamak titlauijuikaltiaj uan tikueyichiuaj toTajtsin Dios.
Nokniuan, amo kuali ijkon matikchiuakan.
11 Itech se ameyali amo uelis kisas atl tsopelik uan atl chichik.
12 Nokniuan, higoskouitl amo uelis kitemakas aceitunas nion uvajkouitl amo uelis kitemakas higo. Noijki atl poyek amo uelis mokopas atl tsopelik.
13 ¿Namouan kajki ikaj ixtlamatki tlen nochi kajsikamati? Makichiua tlen kuali uan ijkon kiteititis ye ixtlamatki porque nochi kichiua ika yolyamanilistli.
14 Pero tla sapanoua nanchauatij uan namoyolipan san nankinekij nanmokualaniskej, amo ximoueyinekikan nion amo xitlakajkayauakan.
15 Non ixtlamatilistli amo uits iluikak. Non inmixtlamatilis akinmej chantij tlaltikpak, yolkamej uan ejekamej.*
16 Porque tla ikaj chauati uan san kineki mokualanis, amitlaj kuali yetos uan panos miak tlamantli amo kuali.
17 Pero ixtlamatilistli tlen uits iluikak achto kichiua ikaj makipia chipauak iyolo. Satepan kichiua mamoyekuika inuan oksekimej, mateajsikamati, makineki tetlakamatis,* mateiknomati, makichiua tlen kuali, amo matechikoita uan amo makipia ome ixko.
18 Akinmej moyekuikaj inuan oksekimej tlapaleuiaj kuali mayetokan uan kichiuaj tlen kuali.
