Tito 2:1-15
2 Pero te nochipa xikijto tlen mouika iuan kuali tlamachtil.
2 Tlakamej tlen yikipiaj miak xiuitl nochi makichiuakan ken moneki, makimatikan ken kichiuaskej inteki, kuali mamokuayejyekokan,* makipiakan chikauak intlaneltokilis, matetlasojtlakan uan matlaxikokan.
3 Noijki siuamej tlen yikipiaj miak xiuitl makitlakaitakan toTajtsin Dios, amo makinteneuakan* oksekimej para amo kuali makinmitakan, amo makonikan miak vino uan matlamachtikan tlen kuali.
4 Ijkon uelis kinyektlapouiskej ichpochmej para makitlasojtlakan innamik uan inkoneuan,
5 kuali mamokuayejyekokan,* mayetokan chipauakej, matekipanokan inchan, mayetokan yolkualmej uan makikauilikan innamik makinyekana. Ijkon amo kiuijuikaltiskej iTlajtol toTajtsin Dios.
6 Noijki nochipa xikinyektlapoui telpochmej uan ijkon kuali mamokuayejyekokan.*
7 Te xikinmititi ken kichiuaskej nochi tlen kuali. Xitlamachti tlen melauak ijkon ken moneki.
8 Xitlamachti ika kuali tlajtoli uan ijkon oksekimej amo uelis mitsteneuaskej.* Ijkon pinauaskej akinmej techixnamikij porque amo kipiaskej tlen ika techteneuaskej.
9 Tlakeualmej nochipa makintlakamatikan* intekouan, makichiuakan tlen kinekij uan amo makinnanankilikan.
10 Noijki amo makintlachtekikan uan makiteititikan uelis kinneltokiliskej. Ijkon kiteititiskej kuajkualtsin tlen tlamachtia toTajtsin Dios akin techmakixtia.
11 Porque toTajtsin Dios yokiteititi kitetliokolia tlen kuali uan non kichiua mamomakixtikan tlatlamantli personas.
12 Non techmachtia amo matikchiuakan tlen amo kuali, amo matechyoltilana tlen onka tlaltikpak, matikpiakan kuali tonemilis, matikchiuakan tlen kuali uan matikueyichiuakan toTajtsin Dios axkan ijkuak tikatej.
13 ToTajtsin Dios tlen kipia chikaualistli uan Jesucristo tlen techmakixtia tikinchixtokej makiteititikan yejuan ueyititokej.
14 Cristo topatka omotemakak uan ijkon techpaleuia amo matikchiuakan tlen amo kuali. Otechchipa para matipouikan itech ialtepe uan ijkon matikchiuakan tlen kuali ika nochi toyolo.
15 Nochipa xitlamachti nin tlamantli, xiteyolchikaua, xikinmititi oksekimej ijkuak kichijtokej itlaj amo kuali porque te omitsnauatijkej ijkon xikchiua. Amikaj mamitstlauelita.
Notas
^ Noso “mamonejneuilikan”.
^ Noso “makinmijtokan”, “makinpojpouakan”.
^ Noso “mamonejneuilikan”.
^ Noso “mamonejneuilikan”.
^ Noso “mitsijtoskej”, “mitspojpouaskej”.
^ Noso “makinuelkakikan”.
