Sejse xiuitl tiyolpakij pampa tikseliaj tlakuali espiritual itech uejueyij nechikolmej regionales. Tiknekij oksekimej tlaltikpaktlakamej noijki ma kitakan ken tetlasojtla Jehová, ik non, timochijchikauaskej tikinyoleuaskej miakej tlaltikpaktlakamej (Sal. 34:8). Tokniuan tlayekankej kijtoskej ken okachi kuali tikintemakaskej amatsitsintin.

• ¿Keman mochiuas ueyi nechikol regional?

• ¿Keman peuas tikintemakaskej amatsitsintin?

• ¿Keman mochiuaskej nechikolmej pampa akinmej tetlapouiaj?

• ¿Tlen yonimokuayejyeko nikchiuas pampa nikintemakas amatsitsintin?

• ¿Akinmej nikinyoleuas?

Satepan ijkuak yotitetlajpalo, uelis tikijtos:

“Axkan tikchijtokej se tekitl tlen mochijtok itech nochi Tlaltikpak, uan tikinyoleuaj nochtin ma yakan itech se ueyi nechikol tlen miak ipati. Nikan kijtoa kanin, tlen tonal uan tlen hora peuas nin ueyi nechikol. Techpaktiskia touan ximonechiko”.

Maski tiknekij tikinyoleuaskej miakej pampa ueyi nechikol, amo ma tikinkauakan akinmej kinekij okachi kimatiskej.

Sábados uan domingos uelis tiktemakaskej revista iuan yoleualistli.