¿Akinmej moneki kuali tikinseliskej? Nochtin akinmej touan monechikoaj; akinmej yikin monechikoaj uan akinmej yiuejkika tikinmixmatij (Rom. 15:7; Heb. 13:2). Uelis touan monechikos se tokni tlen uits itech okse altepetl noso se tokni tlen ayakmo tetlapouia uan yiuejkika amo monechikoa. ¿Ken timomachiliskia tla ijkon mitspanoskia? ¿Amo mitspaktiskia kuali ma mitsselikan? (Mat. 7:12). Ik non, ijkuak peuaj uan tlamij tonechikoluan, ma timochijchikauakan nochtin ma tikintlajpalokan. Non kichiuas tinochtin kuali ma timomachilikan (Mat. 5:16). Ualeua amo uelis timotlapouiskej iuan nochtin. Pero tla timochijchikauaj, tinochtin kuali timomachiliskej. *

Moneki nochipa kuali ma tikinselikan nochtin uan amo san ken ijkuak tikilnamikij iCena toTeko. Ijkuak akinmej yikin touan monechikoaj kitaj melauak titetlasojtlaj, ijkon kinekiskej kiueyichiuaskej toTajtsin Dios (Juan 13:35).