Tiknekij oksepa tikintlapouitiuij tlaltikpaktlakamej pampa tlen melauak okachi ma ajsi itech inyolo (1 Cor. 3:6). Tla tikajsij ikaj akin okipakti tlen otiktlapouijkej, moneki tikchiuiliskej se tlajtlanilistli tlen tiknankiliskej ijkuak oksepa tiktlapouitiuij. Ijkon kinekis okachi kimatis uan okachi amo oui timoyektlaliskej pampa oksepa tiktlapouitiuij. Ijkuak timokuepaskej, uelis tikiluiskej tiknankiliskej tlajtlanilistli tlen otikchiuilijkej.

• Ijkuak timoyektlalis pampa titetlapouiti, ximokuayejyeko itech se tlajtlanilistli tlen uelis tikchiuilis akin tiktlapouis pampa oksepa tiktlapouiti. Uelis tikpejpenas se tlajtlanilistli tlen kipia amatlajkuilol tlen tiktemakas non tonal noso se tlajtlanilistli tlen monankilia itech se amatlajkuilol tlen ika titlamachtiaj uan xikititi ijkuak oksepa tiktlapouiti.

• Ijkuak tlamis timotlapouis iuan ikaj tlen okachi kineki kimatis, xikilui tikneki iuan timotlapouis okse tonal uan xikchiuili tlajtlanilistli tlen otikpejpenki. Xiktlajtlani ken uelis tikajsis pampa oksepa iuan timotlapouis.

• Tla tikiluia tlen hora timokuepas, xikchiua ijkon ken yotikijto (Mat. 5:37).