TIKCHIUAJ KEN CRISTO
Ma tikinselikan ika pakilistli
Itech tonal 23, metstli marzo kanaj 12 millones touan monechikoskej pampa tikilnamikiskej imikilis Jesús. Akin kipanoltis tlapoualistli kiyekijtos ken Jehová okitemakak iKone ken se tlaxtlauili tlen tinochtin uelis techpaleuis (Is. 11:6-9; 35:5, 6; 65:21-23; Juan 3:16). Maski akin kipanoltis tlapoualistli tlajtos itech non tlamantli tlen miak ipati. Tinochtin uelis kuali tikinseliskej akinmej touan monechikoskej (Rom. 15:7). Ma tikitakan tlen uelis tikchiuaskej.
-
Kuali ma tikinselikan akinmej touan monechikoskej uan noijki akinmej ayakmo monechikoaj nion ayakmo tetlapouiaj, amo san ma timotlalikan pampa tikchiaskej ma peua nechikol. Xiixuetska uan xikintlakaita akinmej ajsitiuij.
-
Amo inselti xikinkaua akinmej otikinyole, pero noijki kuali xikseli akin ajsiti pampa uelis okiyolejkej ijkuak okimakakej yoleualistli. Iuan ximotlali uan xiktlaneti moBiblia uan moamoch tlen ika titlakuika.
-
Ijkuak tlamis tlapoualistli, xiktlajtlani kox itlaj amo okajsikamatki. Tla moneki nankisaskej totoka pampa kalakis okse tlanechikol, iuan ximokaua pampa okse tonal nanmotlapouiskej. Uelis tiktlajtlanis kox okipakti nechikol uan tiktlajtlanis kanin chanti noso kanin uelis iuan timotlapouis.