Saiktlami Pascua tlen Jesús kichiuaskia iuan imachtijkauan okatka miak ipati. Ken yomikiskia Jesús inmiuan okichi Pascua uan okinmilui desde ijkuakon kichiuaskiaj iCena toTeko. Ik non, okilui Pedro uan Juan ma kiyektlalikan tlen omonekiaya (Luc. 22:7-13; xikita dibujo itech página 1). Non techilnamiktia moneki timoyektlaliskej para tikilnamikiskej imikilis Jesús itech 27 de marzo. Ijkuakon tlayekankej yikimatoskej akin tlamachtis, akin kiuikas pan uan vino uan okseki tlamantli. ¿Ken moneki timoyektlaliskej para ijkuak ajsis non tonal?

Okachi ma tikpatioitakan imikilis Jesús. Ma timokuayejyekokan tlen tiktlajtoltiskej itech Biblia para tikilnamikiskej imikilis Jesús. Itech amatlajkuilol Nochipa ma timomachtikan iTlajtol toTajtsin Dios kajki tlen moneki tiktlajtoltiskej. Itech Amatlajkuilol tlen mitspaleuis timomachtis iTlajtol toTajtsin Dios onka se programa itech páginas 30 hasta 33, noijki kajki itech Toteki akinmej tikchiuaj ken Cristo tlen okiski itech abril 2020. Tla tiknekij timomachtiskej iuan tofamilia tleka miak ipati Jesús otechmakixtiko, non tikajsiskej itech Índice de las publicaciones Watch Tower uan amatlajkuilol Tlen ika momachtiaj iTlaixpantijkauan Jehová.

Ma tikinyoleuakan oksekimej. Miakej ma tikinyoleuakan touan ma kilnamikikan imikilis Jesús. ¿Akinmej uelis tikinyoleuaskej? Akinmej oksepa tikintlapouitiuij, akinmej youejka otikinmachtiayaj, tofamiliares uan oksekimej akinmej tikinmixmatij. Tlayekankej ma kinyoleuakan akinmej ayakmo tetlapouiaj. Tla ikaj amo chanti ik kanin tichantij, itech jw.org/ncx xiktemo kanin uelis monechikos uan tlen hora mochiuas ik kanin ye chanti. Xikalaki kanin kijtoua ITECH TEJUAN satepan xikalaki kanin kijtoua “Imikilis Jesús”.

¿Ken uelis timoyektlalis para tikilnamikis imikilis Jesús?