David okineltokak Jehová kipaleuiskia, ik non, okitlanili Goliat (1 Sam. 17:45). Jehová sapanoua chikauak uan kineki kinpaleuis akinmej iuan mouikaj (2 Crón. 16:9). ¿Ken uelis tikteititiskej amo san totech titlaneltokaj uan tikneltokaj Jehová techpaleuis? Ma tikitakan eyi tlamantli.

• Nochipa ma timotlatlaujtikan. Amo san xiktlatlaujti Jehová para ma mitstlapojpolui porque itlaj amo kuali otikchi, xikilui ma mitspaleui para amo tikchiuas tlen mitsyoltilana (Mat. 6:12, 13). Amo xiktlatlaujti Jehová para ma kiteochiua tlen tikchiuas, noijki xikilui ma mitspaleui ijkuak ayamo itlaj tikpejpena (Sant. 1:5).

• Nochipa ximomachti Biblia. Mojmostla xiktlajtolti Biblia (Sal. 1:2). Ximokuayejyeko tlen mitsmachtia ken okitekichiuilijkej Jehová yiuejkika sekimej tlakamej uan siuamej uan ken uelis tikchiuas ken yejuan (Sant. 1:23-25). Ximomachti ken moneki titetlapouis uan amo ximokuayejyeko yitikmati ken tikchiuas. Noijki moneki achto ximomachti tlen tikitaskej ijkuak timonechikoskej.

• Xikpaleui ialtepe Jehová. Nochipa xikita tlen technauatia ialtepe Jehová ma tikchiuakan (Núm. 9:17). Noijki xikchiua tlen technauatiaj tlayekankej (Heb. 13:17).

IJKUAK YOTIKITAK VIDEO ¡AMO XIMOMOJTIKAN IJKUAK NAMECHTLAJYOUILTIAJ!, XIKINNANKILI NINMEJ TLAJTLANILMEJ:

• ¿Tleka omomojtiayaj tokniuan tlen motaj itech video?

• ¿Tlen okinpaleui ayakmo ma momojtikan?