TIKCHIUAJ KEN CRISTO
Amo xikchiua nin tlamantli ijkuak titlamachtia
Amo xitlajto miak. Amo ximokuayejyeko tejuatsin moneki nochi tikyekijtos. Jesús okinchiuiliaya tlajtlanilmej tlaltikpaktlakamej uan okinpaleuiaya ma kajsikamatikan tlen melauak (Mat. 17:24-27). Tla tiktlajtlanis kipaleuis uan tikitas tlen kineltoka akin tikmachtia uan kox kajsikamati (be-S pág. 253 párrs. 3, 4). Ijkuak itlaj tiktlajtlanis, xikchia ma tlanankili. Tla amo kimati tlanankilis, amo te xitlanankili, okachi kuali xikinchiuili okseki tlajtlanilmej iuan ijkon tikpaleuis ma tlanankili (be-S pág. 238 párrs. 1, 2). San yolik xiktlapoui, non kipaleuis tlaltikpaktlakatl ma kajsikamati tlen tikmachtia (be-S pág. 230 párr. 4).
Amo oui xikchiua tlen tikyekiluis. Ximochijchikaua amo tikyekiluis nochi tlen yitikmati itech non tlamachtil (Juan 16:12). Xikmachti tlen okachi ipati itech non párrafo (be-S pág. 226 párrs. 4, 5). Tla tiktlapouis itech miak tlamantli, maski ipati, non kichiuas amo ma kajsikamati tlamantli tlen okachi ipati (be-S pág. 235 párr. 3). Tla akin tikmachtia yokajsikamatki tlen okachi ipati, ximomachtikan okse párrafo.
Amo miak xikmachti. Amo moneki san tiktlajtoltiskej tlamachtil, moneki ma ajsi itech iyolo (Luc. 24:32). Kuali xiktekitilti iTlajtol toTajtsin Dios, ximomachtikan tlaxelolmej tlen kipaleuiaj tlamachtil (2 Cor. 10:4; Heb. 4:12; be-S pág. 144 párrs. 1-3). Xikintekitilti neskayomej tlen amo oui (be-S pág. 245 párrs. 2-4). Xikilnamiki tlen ouijkayotl kipia akin tikmachtia uan tlen kineltoka, xikititi ken uelis kipaleuis tlen tikmachtijtok. Xiktlajtlani: “¿Ken tikita tlen otimomachti axkan? ¿Tlen techmachtia itech Jehová? ¿Ken mitspaleuis tla tiktlakamatis nin tlanauatil?” (be-S pág. 238 párrs. 3-5; pág. 259 párr. 1).