Kanaj sesenta por ciento akinmej tlajtolkopaj amo katej Betel porque katej itech kalmej kanin tlajtolkopaj. ¿Tleka okachi kuali tlajtolkopaj itech ninmej kalmej? ¿Tlen moneki kipiaskej akinmej tlajtolkopaj? ¿Ken kinpaleuia okachi kuali ma tlajtolkopakan akinmej katej itech kalmej kanin tlajtolkopaj?

 Akinmej katej itech kalmej kanin tlajtolkopaj, uelis yetoskej kanin tlajtouaj intlajtol. Tokni Karin tlajtoua bajo alemán, ye kijtoua: “Ijkuak otiajkej itech kali kanin tlajtolkopaj ompa Cuauhtémoc itech altepetl Chihuahua (México), nochipa titlajtouaj bajo alemán. Amo san timotlapouiaj inmiuan akinmej titlajtolkopaj noso ijkuak titetlapouiaj, noijki ijkuak timotlakouitiuij. Okachi titlajtouaj nin tlajtoli ijkuak tikkakij. Tikkakij miak tlajtoli tlen ayakmo otikkakiayaj. Axkan tikmatij ken nochipa tlajtouaj oksekimej”.

 Tokni James chanti altepetl Ghana uan kinpaleuia akinmej tlajtolkopaj ika tlajtoli Frafra. Ye kijtoua ualeua kinmilnamiki tokniuan tlen katej Betel, pero noijki kijtoua: “Nechpaktia nitlapaleuis itech kali kanin tlajtolkopaj. Nechpaktia nikintlapouis ika intlajtol uan nikita ken ajsi itech inyolo”.

 ¿Ken kimatij tokniuan kanin kichiuaskej se kali kanin tlajtolkopaskej? Joseph kinpaleuia tokniuan tlen kijtouaj ken kinchijchiuaskej kalmej kanin timonechikouaj ompa Warwick (Nueva York), ye kijtoua: “Ualeua oui tikmatiskej kanin tikchiuaskej se kali kanin tlajtolkopaskej, porque kanaj amo onka luz noso atl uan internet amo kuali para kitemouiskej tlen ika tlajtolkopaskej. Ik non, moneki achto tikitaskej kanin miakej tlajtouaj non tlajtoli”.

 Para amo patio ma kisa, kipejpenaj se kali kanin timonechikouaj noso kanin mochiuaj uejueyi nechikolmej noso kanin chantij misioneros, ijkon amo oui tlapaleuitiuij akinmej tlajtolkopaj. Pero tla amo onka, tokniuan tlajtlanij kox uelis kinkouaskej kalmej noso oficinas kanin uelis chantiskej uan tlajtolkopaskej. Ijkon tla tokniuan ayakmo ompa tlajtolkopaskej, uelis kinnemakaskej ninmej kalmej uan ika non tomin okseki tlamantli kichiuaskej.

 Itech xiuitl 2020 para kinmaluiskej kalmej kanin tlajtolkopaj omonek 13 millones de dolares. Akinmej tlajtolkopaj moneki kipiaskej computadoras, programas para tekipanoskej, programas para kichiuaskej grabaciones, Internet uan okseki tlamantli. Para kikouaskej se computadora moneki 750 dolares uan moneki kintlaliliskej programas. Noijki akinmej tlajtolkopaj moneki kipiaskej se programa tlen itoka Watchtower Translation System, non programa kinpaleuia ma kimatikan ken tekipanoskej uan kitaskej tlen moneki kitlajtolkopaskej.

 Tokniuan kintitlaniliaj akinmej tlajtolkopaj seki tlamantli tlen ika kichiuaskej grabaciones itech oficinas. Nin sapanoua otlapaleui ijkuak opejki kokolistli COVID-19, porque akinmej tlajtolkopaj okinuikakej inkalijtik para uelis kichiuaskej grabaciones.

 Noijki tokniuan akinmej ik ompa chanti kitaj kox kuali mokaki tlen tokniuan kitlajtolkopaj uan noijki tlapaleuitiuij para ninmej kalmej kuali ma yetokan. Cirstin tlajtolkopa ika tlajtoli Afrikáans itech Ciudad del Cabo (Sudáfrica), ye kijtoua: “Miakej tokniuan tlen tetlapouiaj uan precursores regulares uelis tlapaleuiskej”.

 Ninmej tokniuan sapanoua yolpakij tlapaleuiskej. Se tokni kijtoua ijkuak tlapaleuia itech kali kanin tlajtolkopaj yetoskia ken ejeka. Oksekimej tokniuan tlapaleuiaj para ma mochiuakan grabaciones. Tokni Juana tlajtolkopa ika tlajtoli totonaco uan chanti Veracruz (México), okijto: “Axkan tichantij kanin tlajtouaj totlajtol, ik non, okachi amo oui uitsej tokniuan para kinchiuaskej grabaciones”.

 Pero ¿kox tlapaleuiaj ninmej kalmej okachi ma moajsikamati tlen tokniuan kitlajtolkopaj? Miakej akinmej kintlajtoltiaj amatlajkuilolmej kijtouaj kema. Tokni Cédric tlajtolkopa ika tlajtoli Congo, ompa Republica Democratica del Congo, ye kijtoua: “Sekimej tokniuan okijtouayaj titlajtolkopaj ‘ika tlajtoli de Betel’, porque yejuan amo ijkon tlajtouaj. Pero axkan kijtouaj kema titlajtolkopaj ken yejuan tlajtouaj”.

 Tokni Andile tlajtolkopa ika tlajtoli xhosa, ye kijtoua ompa Sudáfrica noijki ijkon panoua: “Miakej kijtouaj ayakmo titlajtolkopaj ken achto. Sekimej konemej tlen okitlajtoltiayaj revista AkinTetlapouijtok ika inglés, axkan kitlajtoltiaj ika tlajtoli xhosa uan sapanoua kinpaktia kitlajtoltiskej Traducción del Nuevo Mundo porque kuali kajsikamatij”.

 Ika tomin tlen kitemakaj tokniuan ika nochi inyolo itech nochi tlaltikpak, noijki tlen kitemakaj itech donate.pr418.com. Tlapaleuia para kinyektlaliskej uan kinmaluiskej kalmej kanin tlajtolkopaj uan noijki akinmej ompa tlapaleuiaj.