Sejse xiuitl miakej moapolaktiaj, ik non, okachi moneki kalmej kanin tikueyichiuaskej Jehová. Itech xiuitl 2020 a tokniuan tlen kijtouaj ken kinchijchiuaskej kalmej kanin timonechikouaj uan katej ipan nochi tlaltikpak, okijtojkej kinchijchiuaskiaj uan kinyektlaliskiaj kanaj 2,700 kalmej kanin timonechikouaj.

 Amo okichijkej nochi nin tekitl porque opejki coronavirus. Akinmej Tlayekanaj ma mochijchiuakan amatlajkuilolmej uan kinyekana Cuerpo Gobernante okijtojkej ayakmo ma kichiuakan nin tekitl porque omonekiaya momaluiskej tokniuan ijkon ken tlanauatiaj tekiuajkej. Pero itech 2020 ijkuak ayamo opeuaya coronavirus, okinchijchijkej uan okinyektlalijkej kanaj 1,700 kalmej kanin tikueyichiuaskej toTajtsin Dios. Itech kalmej Betel okinchijkej kanaj 100 tlatlamantli tekitl tlen okachi omonekiayaj. Ma tikitakan ken okichijkej ome tekitl uan ken kinpaleuia tokniuan.

 Betel tlen kajki Camerún. Betel tlen okatka Duala omonekiaya kiyektlaliskej porque okatka tsikitsin. Akinmej tlayekanaj ma mochijchiuakan amatlajkuilolmej okijtojkej kiyektlaliskiaj, pero kisaskia okachi patio. Noijki okinekiayaj oksekan kichijchiuaskej kali Betel noso kikouaskiaj se kali uan kiyektlaliskiaj, pero amo ueli okichijkej.

 Tokniuan okimatkej tekiuajkej okinekiayaj kitlaposkej ojtli ik norte ompa Duala. Non ojtli panoskia ik kanin kajki kali kanin kinchiuaj uejueyi nechikolmej. Ijkon amo oui ajsiskiaj Betel uan noijki amo oui kipiaskiaj okseki tlamantli tlen omonekiaya. Ik non, akinmej pouij itech Cuerpo Gobernante okijtojkej ma kichijchiuakan kali Betel ik kanin kajki kali kanin kinchiuaj uejueyij nechikolmej.

 Para uelis kichiuaskiaj seki tekitl, tokniuan okintlakejkej sekimej tlakamej para ma kichiuakan non tekitl, ijkon amo omonekiaya miak tomin uan amo okachi ouejkajkej okichijkej. Amo patio okiski nin tekitl: Amo omonek kanaj treinta y nueve millones ochosientos sesenta y cinco mil quinientos setenta y dos pesos (Dos millones de dólares). Tokniuan opanokej itech yankuik kali Betel achto peuaskia kokolistli COVID-19.

 Tokniuan akinmej tlapaleuia itech Betel tlen kajki Camerún okachi kuali katej uan okachi kuali tlapaleuiaj, uan kitaj yankuik Betel ken se tetliokolil tlen okinmakak Jehová. Se tokni uan isiua kijtouaj: “Axkan okachi tikneki titlapaleuiskej porque tikmatokej moneki”.

 Kali kanin tlajtolkopa ika tojolabal (México). Miak xiuitl, tokniuan otlajtolkopayaj ika tlajtoli tojolabal itech Betel tlen kajki Centroamérica (México). Pero tlajtoua tojolabal itech altepetsitsintin Altamirano uan Las Margaritas, Ninmej altepemej katej uejka, katej kanaj 1.000 kilómetros. Tokniuan amo okachi okimatiaya ken tlajtolkopaskej porque amo okinkakiaya oksekimej ken tlajtoua tojolabal. Tokniuan ompa Betel amo okimatiaya ken tlapaleuiskiaj oksekimej tokniuan uan noijki ken kinchiuaskiaj grabaciones ika audio.

 Akinmej tlayekanaj ma moijkuilokan amatlajkuilolmej uan kinyekana Cuerpo Gobernante okijtojkej akinmej tlajtolkopaj ma chantiti kanin tlajtoua tojolabal. Ik non, Betel okiko se kali uan okiyektlali. Tla kichijchiuaskiaj se yankuik noso kimotlaneuiskiaj uan kitlaxtlajtoskiaj, okachi patio kisaskiaj.

 Se tokni akin tlajtolkopa okijto: “Onitlajtolkopkij 10 xiuitl ompa Betel uan amo onikajsik nion se familia tlen tlajtoua tojolabal. Axkan kanin titlajtolkopaj nochtin tlajtouaj tojolabal. Nochipa nimotlapouia iuan akinmej tlajtouaj notlajtol. Nin nechpaleuia para okachi kuali nitlajtolkopas”.

 Itech xiuitl 2021, tla ayakmo panos COVID-19, tikinchijchiuaskej 75 kalmej kanin tlajtolkopaskej uan kanin momachtitiuij. Noijki tikinchiuaskej chikueyi tlatlamantli tekitl itech seki kalmej Betel, seki tekitl tikchiuaskej Rámapo (Nueva york) uan tikinmijkuaniskej kalmej Betel tlen katej Argentina uan Italia. Moneki tikinchijchiuaskej 1.000 kalmej kanin timonechikoskej. Noijki 6.000 kalmej kanin timonechikouaj amo kuali chijchitokej uan moneki tikinpatlaskej uan 4.000 moneki tikinyektlaliskej.

 ¿Ken ueli tikinchijchiuaskej ninmej kalmej? Tokni Lázaro González tlayekana itech Betel Centroamérica, kijtoua ken otikchijkej kanin tlajtolkopaj ika tojolabal, okijto: “Nikan tokniuan amo kipia miak tomin. Tla amo techpaleuiskiaj oksekimej tokniuan tlen chantij itech nochi tlaltikpak, amo uelis tikinchiuaskiaj kalmej kanin uelis tlajtolkopaskiaj tokniuan. Tiktlasojkamatij tomin tlen nankitemakaj ika nochi namoyolo porque ijkon ueli tikintitlanij tokniuan ma chantitij kanin tlajtouaj intlajtol para uelis okachi kuali tlajtolkopaskej. Timechtlasojkamatiliaj porque nantlapaleuiaj ika nanmotomin”. ¿Otikitak? Nochi nin tekitl ueli tikchiuaj porque nankitemakaj tomin ika nochi namoyolo. Miakej kichiuaj itech internet donate.pr418.com.