Sapanoua miakej chantij itech Latinoamérica uan miakej chantij itech altepetsitsintin, yejuan tlatlamantli tlajtouaj uan kipiaj tlatlamantli costumbres. Miakej tokniuan ompa chantij. Para tikinmachtiskej ika Biblia, tikintlajtolkopaj uan tikintemakaj amatlajkuilolmej ika kanaj 130 tlajtolmej itech nochi Latinoamérica. a Maski tokniuan kinpaktia ompa chantiskej, kintlajyouiltiaj porque kitekichiuiliaj Jehová uan amo kichiuaj tlen ye amo kipaktia. ¿Ken tikinpaleuiaj ika tomin tlen tokniuan kitemakaj ika nochi inyolo?

 Itech tepemej kajki se altepetsintli kanin tlajtouaj huichol, ompa Jalisco (México), tokniuan amo okinekej iluichiuaskej porque Biblia amo ijkon tlamachtia. b Pero sekimej tlen ompa chantij amo okinpakti uan okualankej. 4 de diciembre xiuitl 2017, okinteuitoj tokniuan uan akinmej inmiuan okatkaj. Okinkixtijkej itech non altepetsintli, okixixinijkej tlen okipiayaj uan okinmiluijkej tla ikaj mokopas ompa kimiktiskiaj.

 Tokniuan akinmej chantij ik ompa okinselijkej uan okinmakakej nochi tlen okinpolouaya. Pero ¿ken uelis tikinpaleuiskiaj para oksepa ma mokopakan inkalijtik? Se tokni tlen itoka Agustín okijto: “Amo otikpiayaj tomin para tiktlaxtlauiskiaj se abogado para ma techpaleui uan amo otikmatiayaj akin tikiluiskej ma techpaleui”.

 Amo okinekiayaj kinkauiliskej tokniuan ma kichiuakan tlen kineltokaj, ik non, akinmej tlapaleuiaj Betel san niman okinpaleuijkej. Achto, okinmiluijkej tekiuajkej ma kitakan tlen okintoktijkej tokniuan. Satepan, tokniuan akinmej tlayekanaj okijtojkej san sekan ma tekipanokan: Departamento de Asuntos Legales tlen kajki itech Betel kanin kinyekanaj iTlaixpantijkauan Jehová uan tokniuan itech Betel, tlen kajki México para ma kinpaleuikan tokniuan akinmej tlajtouaj huichol. Satepan okinuikakej ixpan Suprema Corte de Justicia de la Nación itech altepetl México.

 Sekimej abogados tlen okatkaj itech okseki altepemej okijtojkej moneki ma kintlakaitakan akinmej chantij itech altepetsitsintin, pero noijki akinmej chantij itech ninmej altepetsitsintin noijki moneki motlakaitaskej. Nochtin moneki motlakaitaskej maski san kanin chantij.

 8 de julio xiuitl 2020, Suprema Corte de Justicia amitlaj okajsik para kintlajtlakoltiskej iTlaixpantijkauan Jehová, ik non, tekiuajkej otlanauatijkej ma mokopakan inmialtepe. Agustín, noijki okijto: “Sapanoua tiyolpakij uan tikintlasojkamatiliaj tokniuan porque otechpaleuijkej. Amo tikmatij tlen tikchiuaskiaj tla amo techpaleuiskiaj”.

 Itech altepetl Ecuador, noijki ijkon okinpanok tokniuan tlen chanti San Juan de Iluman, se altepetsintli tlen kajki Otavalo ompa chantij akinmej kipiaj okse tlajtol. Itech xiuitl 2014, tekiuajkej okinkauilijkej tokniuan ma kichiuakan kali kanin monechikoskej, pero se teopixki okinnechiko kanaj 100 tlakamej uan okinchiualti tokniuan ayakmo ma tekipanokan. Noijki akinmej ompa chantij okinnauatijkej tokniuan ayakmo ma monechikokan.

 Departamentos de Asuntos Legales tlen kajki Betel ompa Ecuador uan kali Betel kanin kinyekanaj tokniuan itech nochi tlaltikpak, san sekan otekipanojkej para kinpaleuiskej tokniuan ma kiueyichiuakan Jehová. Tokniuan oyajkej ixpan tekiuajkej uan ijkon akinmej ompa chantij itech non altepetl ayakmo itlaj okinchiuilijkej uan okinkauilijkej ma monechikokan uan ma kichiuakan kali kanin monechikoskej. Pero tokniuan abogados okinpaleuijkej para ayakmo itlaj ma kinchiuilikan uan okintlajtlanijkej tekiuajkej: ¿akinmej chantij itech altepetsitsintin noijki moneki kintlakamatiskej tlanauatilmej tlen katej para nochtin?

 Itech julio 16 xiuitl 2020, Corte constitucional tlen okachi tlanauatia ompa Ecuador okinpaleui. Sekimej tokniuan tlen otlapaleuijkej ken abogados chantij ompa Ecuador. Noijki otlapaleuijkej naui tokniuan abogados uan yejuan kimatij ken kinpaleuiskej akinmej kintlajyouiltiaj itech okseki altepemej. Nochtin tokniuan omonechikojkej inmiuan tekiuajkej ika videoconferencia porque onka kokolistli COVID-19. Amo keman ijkon opanouaya porque axkan tekiuajkej okinkauilijkej tokniuan ma monechikokan ika videoconferencia para motlapouiskej uan kiyektlaliskej tlen opanotoka. c Tokniuan tlen tekipanouaj ken abogados okinmiluijkej tekiuajkej maski san kanin tichantiskej noso tlatlamantli totlajtol nochi tlanauatilmej tlen katej techpaleuiaj tinochtin, maski tichantij itech se altepetsintli.

 Tokniuan tlen chantij altpetsintli Valle de Otavalo kichixtokej tlen kijtoskej nonmej tekiuajkej uan kitlasojkamatij nochi tlen tokniuan okichijkej. Tokni Cesar, tlayekanki itech tlanechikol Iluman Quichua, kijtoua: “Jehová kiyolinia ialtepe para ma kinpaleuikan tokniuan maski amo miakej”.

 Nochtin abogados akinmej okinpaleuijkej tokniuan okatkaj iTlaixpantijkauan Jehová uan oyolpakiayaj porque otlapaleuijkej uan amo okinekej ma kintlaxtlauikan. Para kinpaleuiskej tokniuan omonekiaya miak tomin, noijki omonekiaya majxiliskej uan momachtiskej, ijkon kimatiskej tlen kijtoskej inmixpan tekiuajkej. Tokniuan abogados uan oksekimej omomachtijkej kanaj 380 horas para kinpaleuiskej tokniuan tlen chantij altepetl México uan kanaj 240 horas okitlajtolkopkej seki amamej. Noijki kanaj 40 abogados tlen chantij itech nochi tlaltikpak omomachtijkej sapanoua miak horas para kinpaleuiskej toknuian tlen chantij Ecuador. ¿Kanin kisa nochi tomin para tikinpaleuiskej tokniuan? Ika tomin tlen nankitemakaj ika nochi namoyolo noso nankititlanij itech donate.pr418.com. Melauak timechtlasojkamatiliaj.