Ijkuak okiski video Cuerpo Gobernante techiluia tlen panotok 2020 parte 6, tokni Geoffrey Jackson okijto: “Xamo amo otimokuayejyekojkej kox tikinpiaskiaj amatlajkuilolmej itech dispositivos electrónicos”. Noijki okijto: “Pero ijkuak opejki kokolistli Covid-19 okachi otechpaleui JW Library. Jehová okichi matikpiakan non aplicación para ika timopaleuiskej”.

 ¿Ken otechpaleui Jehová? ¿Tlen okichijkej tokniuan para kichiuaskej aplicación JW Library? ¿Tlen kichiuaj tokniuan para kiyankuilijtoskej?

 Mayo 2013 Cuerpo Gobernante okinmiluijkej tokniuan tlen tlapaleuiaj itech Programación de MEPS makichiuakan se aplicación tlen makipia Biblia Traducción del Nuevo Mundo. Paul Willies akin ompa tlapaleuia okijto: “Amo keman otikchiuayaj se aplicación ken JW Library. Ikinon ayakmo otikchijkej seki tlamantli para uelis titekipanoskiaj iuan oksekimej tokniuan. Otiktlatlaujtijkej Jehová uan otikitakej ken otechpaleui porque san makuili metstli itech nechikol tlen omochi non xiuitl, okiski aplicación”.

 Satepan otikitakej oui porque omonekiaya tiktlaliskej itech aplicación nochi amatlajkuilolmej uan ika miak tlajtolmej. Itech enero 2015 non aplicación yokipiaya amatlajkuilolmej ika inglés uan tlajko xiuitl satepan miakej tokniuan yiuelis kikixtiskiaj amatlajkuilolmej ika intlajtol.

 Tokniuan nochipa kiyankuilijtokej JW Library uan axkan yikipia videos uan ompa uelis timoyektlaliskej para ijkuak timonechikoskej. Noijki kipia amatlajkuilol Tlen ika momachtiaj iTlaixpantijkauan Jehová para tikajsikamatiskej Biblia.

 Sejse metstli kanaj15 millones itech dispositivos kikixtiaj JW Library uan kanaj 8 millones mojmostla kitekitiltiaj. ¿Tlen kichiuaj tokniuan para miakej makitekitiltikan JW Library? Paul Willies okijto: “Nochipa titekipanoua porque non aplicación moneki nochipa tikyankuilijtoskej uan nochi tlen kipia dispositivos electrónicos nochipa mopatlati ikinon moneki tikyankuiliskej JW Library. Axkan nochipa kitlaliaj itech aplicación videos uan okseki tlamantli ikinon tejuan tikyankuiliaj non aplicación”. Itech JW Library katej kanaj 200 mil amatlajkuilolmej uan kanaj 600 mil videos uan audios ika miak tlajtolmej.

 Para uelis tikchiuaskej non tekitl amo san moneki seki tlamantli, ualeua moneki tikkouaskej licencias de software uan tiktlaxtlauaj kanaj 30 mil pesos (noso 1,500 dólares). Departamento de Programación de MEPS itech se xiuitl kitlaxtlauaj kanaj 200 mil pesos (noso 10 mil dólares) ijkuak kikouaj tlatlamantli dispositivos para kitaskej kuali matekipano JW Library itech computadoras, celulares uan tabletas.

 Ayakmo tiktlaxtlauaj miak tomin para tikintitlaniliskej amatlajkuilolmej tokniuan porque yikajki JW Library. Ijkon opanok ika amatlajkuilol Nochipa ma timomachtikan iTlajtol toTajtsin Dios, itech 2013 okinchijchijkej kanaj 12 millones. Pero itech 2020 maski ialtepe Jehová omomiaktili kanaj 700 mil, okinchijchijkej kanaj 5 millones amatlajkuilolmej. Axkan miakej iTlaixpantijkauan Jehová kitlajtoltiaj itech JW Library  a amatlajkuilol Nochipa ma timomachtikan iTlajtol toTajtsin Dios.

 Aplicación JW Library uelis mitspaleuis. Geneviève chanti Canadá ye kijtoua kipaleuia non aplicación para momachtis Biblia. Ye okijto: “Amo nimomachtiskia kualkan tla omonekiaya nikinkixtis miakej amochmej. Pero aplicación sapanoua nechpaleuia porque ompa katej nochi amochmej. San moneki nikxotlaltis notableta. Ken nochipa nimomachtia, axkan okachi nikneltoka uan nimouika iuan Jehová”.

 Maski axkan onka kokolistli COVID-19, miakej yokinpaleui aplicación JW Library. Charlyn tlen chanti Estados Unidos okijto: “COVID-19 okichi amo matikinpiakan okseki amatlajkuilolmej. Pero itech JW Library ueli tikinmita nochi amatlajkuilolmej ikinon niktlasojkamatilia Jehová porque okichi matikpiakan non aplicación”.

 Miakej mokuayejyekouaj ken Faye tlen chanti Filipinas. Ye okijto: “Non aplicación kichiua okachi manimouika iuan Jehová. Mojmostla niktekitiltia para itlaj niktlajtoltis, Ijkuak nitlachipaua, noijki para nimoyektlalis ijkuak nimonechikos uan para niktlajtoltis Biblia. Ijkuak amitlaj nikchiua noso kanaj ninemiti nikinmita videos, niktlajtoltia Biblia uan amatlajkuilolmej. Ikinon ¡sapanoua nikpatioita non aplicación!”.

 JW Library noijki sapanoua tlapaleuia ijkuak titetlapouiaj. Se tokni tlen chanti Camerún sapanoua okipakti se texto ijkuak otetlapouito iuan se tokni. Satepan ye okinekiaya oksepa kitlajtoltis non texto pero amo okilnamikiaya kanin okatka. Ye okijto: “San onikilnamik seki tlajtolmej tlen kipia non texto. Ikinon onikalak itech aplicación, oniktlapo Biblia uan onikijkuilo tlen onikilnamikiaya. Ijkon nikchiua ijkuak nikilkaua se texto”.

 Timechtlasojkamatiliaj porque nankitemakaj namotomin itech donate.pr418.com ijkon ueli tikyankuiliaj JW Library uan tokniuan itech nochi tlaltikpak kinpaleuia mamomachtikan. Sapanoua timechtlasojkamatiliaj porque nankitemakaj namotomin ika nochi namoyolo.

1. Octubre 2013 okiski aplicación uan okipiaya Biblia Traducción del Nuevo Mundo ika inglés.

2. Enero 2015 aplicación okitlalilijkej okseki amatlajkuilolmej ika inglés uan ika okseki tlajtolmej.

3. Noviembre 2015 okitlalilijkej tlen ika kintlapaluiskej texto.

4. Mayo 2016 okitlalilijkej kanin kijtoua “Reuniones”.

5. Mayo 2017 okitlalilijkej kanin tikchiuaskej notas.

6. Diciembre 2017 okitlalilijkej Biblia de estudio ika inglés.

7. Marzo 2019 okichijkej itech aplicación makinkixtikan audios uan videos noijki makinmitakan amatlajkuilolmej tlen katej itech amatlajkuilol Tlen ika momachtiaj iTlaixpantijkauan Jehová.

8. Enero 2021 itech aplicación okajxitilijkej okseki tlamantli para akinmej momachtiaj ika amochtli Tiyoltos uan tiyolpakis.