Sejse xiuitl, miakej tokniuan tlen tlatlamantli inmialtepe yauij kanin Tlamachtiaj ika Biblia ompa Patterson Nueva York. a Ompa kinmachtiaj ken okachi tlapaleuiskej itech ialtepe Jehová, ijkon kinyolchikauaj tokniuan kuali ma yetokan uan noijki tlapaleuiaj itech okseki kalmej Betel.

 Ompa momachtitiuij miakej tokniuan tlen tlatlamantli inmialtepe. Itech tlamachtil 147 tlen omochi 2019, omomachtitoj 56 tokniuan tlen oualayaj itech 29 altepemej. Sekimej tlen ompa momachtitiuij, tlapaleuiaj Betel, sekimej misioneros, sekimej precursores especiales noso superintendentes de circuito.

 Tokniuan tlen ompa tlapaleuiaj achto peua tlayektlaliaj. Akinmej tekipanouaj itech Departamento de Viajes de la Central Mundial, kinkouiliaj boletos akinmej momachtitiuij. Akinmej oyajkej itech tlamachtil 147 tlen oualayaj itech okseki altepemej, sejse okintlaxtlauilijkej inboleto kanaj 21,000 mil pesos (1,075 dólares). Akinmej oualayaj islas Salomón okinpatlakej naui aviones para oajsitoj Patterson. Ijkuak omokopatoj okinpatlakej eyi aviones. Ijkuak omomachtitoj okichijkej kanaj 35,400 kilómetros. Sejse inboleto okiski kanaj 46,000 mil pesos (2,300 dólares). Akinmej tekipanouaj itech Departamento de Viajes de la Central Mundial kitekitiltiaj se programa para kinmajsiskej boletos tlen amo patiojkej. Ijkuak yokixelojkej se boleto, non programa ok kitemoua amo ma yeto patio non boleto uan uejkaua miak semanas noso miak metstli. Tokniuan noijki kitekitiltiaj créditos tlen kitemaka aerolínea noso millas de viajero tlen oksekimej kitetliokoliaj.

 Miakej tlen momachtitiuij moneki kipiaskej visa para ajsitiuij Estados Unidos. Ik non, tokniuan tlen tlapaleuiaj itech Departamento de Asuntos Legales de la Central Mundial, kinpaleuiaj ma kipiakan visa. Nochi tlen kichiuaj para kipaleuiskej se tokni kisa kanaj 10,000 pesos (510 dólares).

 ¿Ken techpaleuia ijkuak yauij momachtitiuij tokniuan? Tokni Hendra Gunawan tlapaleuia ken tlayekanki itech tlanechikol Sureste Asiático. Itech non tlanechikol kajki se tokni iuan isiua tlen omomachtitoj Galaad. Tokni Hendra Gunawan okijto: “Itech totlanechikol amo okatkaj precursores. Pero ijkuak oajsiko tokni iuan isiua, okinpaleuijkej oksekimej ma mochiuakan precursores. Satepan se tokni tlen touan omonechikouaya omomachtito kanin kinmachtiaj para ma tetlapouikan iTekiuajkayo toTajtsin Dios”.

 Itech kali Betel tlen kajki Sureste Asiático tekipanoua tokni Sergio Panjaitan iuan sekimej tokniuan tlen omomachtito Galaad. Tokni Sergio Panjaitan okijto: “Tlen omomachtijkej nonmej tokniuan amo san yejuan kinpaleuia noijki tejuan techpaleuia. Yejuan kinmiluiaj oksekimej tlen omomachtijkej uan amo moueyinekij maski miak omomachtijkej. Non techyolchikaua uan ijkon noijki tikinyolchikauaj oksekimej”.

 ¿Ken kitlaxtlauaj nochi tlen kitekitiltiaj ijkuak momachtitiuij? Motlaxtlaua ika tomin tlen miakej kitemakaj ika nochi inyolo. Miakej kitemakaj intomin itech donate.pr418.com. Timechtlasojkamatiliaj porque nankitemakaj namotomin ika nochi namoyolo. Non tomin kinpaleuia miakej tokniuan ma momachtiti.