Videos tlen tikinmitaj itech uejueyij nechikolmej ajsij itech toyolo uan techpaleuiaj okachi ma tikajsikamatikan Biblia. Itech ueyi nechikol regional 2020 tlen itoka “¡Nochipa xiyolpakikan!”, otikinmitakej 114 videos uan 43 tlamachtilmej tlen okinpanoltijkej tokniuan tlen pouij itech Cuerpo Gobernante uan akinmej kinpaleuiaj. ¿Yotimotlajtlani kox uejkauaj kinchiuaj videos uan kox miak tomin kitekitiltiaj?

 Kanaj 900 tokniuan tlen katej ipan nochi tlaltikpak okichijkej tekitl tlen otikitakej itech ueyi nechikol. Nin tekitl okichijkej ipan ome xiuitl uan otekipanojkej kanaj 100,000 horas. 70,000 horas okitekitiltijkej ijkuak okichijkej se drama tlen uejkaua 76 minutos uan itoka Nehemías: “Jehová techpaleuia ma tiyolpakikan uan non techyolchikaua”.

 Miak tomin omonekiaya para kinmaluiskej tokniuan, tlayektlaliskej kanin tekipanoskiaj uan okseki tlamantli tlen kitekitiltiskiaj.

 Tokni Jared Gossman tlen tlapaleuia itech Servicios de Audio uan Video, okijto: “Akinmej kiyekanaj tlamachtil tlen kipia Cuerpo Gobernante, kinekij itech videos ma kisakan tlatlamantli altepemej uan noijki tlen kichiuaj. Ijkon motas tikinpiaj tokniuan itech tlatlamantli altepemej, ik non, san sekan otekipanojkej 24 grupos tlen pouij itech 11 altepemej. Omonekiaya miak tomin, omonekiaya kitaskej ken tekipanoskej uan ijkon tokniuan san sekan tekipanoskiaj”.

 Miakej videos tlen okinchijkej omonekiaya okachi tlayektlaliskej. Ijkon opanok ijkuak okichijkej drama tlen itoka Nehemías: “Jehová techpaleuia ma tiyolpakikan uan non techyolchikaua”. Kuali otlayektlalijkej kanin okinchijkej grabaciones ompa Mount Ebo tlen kajki ik Patterson (Nueva York). Tokniuan amo oui otlayektlalijkej uan ijkon okichijkej ken okatka tepamitl itech altepetl Jerusalén. Ijkon amo san kauiltiskiaj tomin tlen kitemakaj uan kichiuaskiaj ijkon ken melauak opanok. Sejse tepamitl okipiaya 6 metros ik uejkapan. Okipiaya kuauitl uan okseki tlamantli tlen omotaya ken tetl. Nin tepamitl ueli okitokiayaj uan ijkon okichiuayaj okseki tlamantli. Ijkon amo omonekiaya miak tlayektlaliskej. Okitekitiltijkej kanaj dos millones de pesos (100,000 dólares). a

 Okachi tikpatioitaj nin ueyi nechikol regional ijkuak tikmatij ken omochi. Nochi tlen omochi tikmatij kinpaleuis oksekimej ipan nochi tlaltikpak ma kiueyichiuakan Jehová. Timechtlasojkamatiliaj porque nankitemakaj namotomin ika nochi namoyolo. Miakej kitemakaj intomin itech donate.pr418.com uan itech okseki tlamantli.