Akinmej pouij itech Naciones Unidas kijtoua:

•   7 hasta 23 de octubre 2023, ijkuak omokualanijkej ompa Gaza uan Israel, okinmiktijkej kanaj 6,400 uan kanaj 15,200 okinkojkojkej, ijkon okinpanok akinmej amo oyajkej ijkuak opejki mokualaniaj. Noijki miakej oksekan omopaleuitoj.

•   Para 24 de septiembre 2023, guerra tlen panotok ompa Rusia uan Ucrania, yokinmiktijkej 9,701 akinmej amo oyajkej guerra uan 17,748 ucranianos okinkojkojkej.

 ¿Itlaj kijtoua Biblia para kinyolchikauas akinmej chantij kanin panotok guerra?

 Biblia kijtoua toTajtsin Dios kitlajtlamis guerra itech nochi tlaltikpak (Salmo 46:9). Para ijkon kichiuas, kinpojpolos nochtin tekiuajkej tlen katej itech tlaltikpak uan kinpatkayotis ika iTekiuajkayo (Daniel 2:44). ITekiuajkayo toTajtsin Dios kinpaleuis nochtin kuali mayetokan.

 ¿Tlen kichiuas Jesucristo ken tekiua itech Tekiuajkayotl?:

•   “Kimakixtis akin amitlaj kipia uan kitlajtlanilia makipaleui, noijki akin moyolkokoua uan akin amo kipia akin kipaleuis. Kiknomatis akin tlajyouia uan akin amitlaj kipia uan kinmakixtis inyolilis akinmej amitlaj kipiaj. Kinpaleuis amo makintlajyouiltikan nion makinteuikan” (Salmo 72:12-14).

 Ika iTekiuajkayo toTajtsin Dios, kitlajtlamis guerra uan tlen amo kuali para ayakmo matitlajyouikan nion matimoyolkokokan.

•   “Ye kinmixayouajuatsas, ayakmo yetos mikilistli, ayakmo ikaj moyolkokos, ayakmo ikaj chokas nion ayakmo ikaj tlajyouis. Yopojpoliuik tlen achto okatka” (Apocalipsis 21:4).

 Ayakmo miak poliui uan iTekiuajkayo toTajtsin Dios kipatlas tlen axkan panotok itech tlaltikpak. ¿Ken tikmatij? Porque Biblia kijtoua tikitaskiaj “guerra itech miakej altepemej” uan axkan ijkon panotok (Mateo 24:6). Nin uan okseki tlamantli kiteititia yitikatej “itlamian tonalmej” ijkuak kinpojpoloskej tekiuajkej (2 Timoteo 3:1).