Axkan ayakmo onka miak atl | ¿tlen kijtoua Biblia?

MA MOKAKI IKA

Para uelis tiyoltoskej moneki tikpiaskej atl chipauak. Pero itech nochi tlaltikpak miakej amo kipiaj atl tlen chipauak. António Guterres ye kajki ken secretario general itech Naciones Unidas, okijto: “Axkan miakej amo kipiaj atl tlen koniskej porque miakej kisokiotijtokej atl”.

Strdel/AFP via Getty Images

¿Se tonal tikpiaskej atl tlen chipauak noso nochipa ijkon tiyetoskej? ¿Tlen kijtoua Biblia?

Tlen kijtoua Biblia mochiuas satepan

Itech Biblia kijtoua satepan tikpiaskej miak atl uan san kanin yetos atl chipauak.

“Uan kanin tlauaki meyas atl uan yetoskej aueyamej kanin tlauaki. Itech tlali kanin tlauaki satepan yetos miak atl kanin selias akatl, noijki kanin tlauaki meyas miak atl” (Isaías 35:6, 7).

Pero ¿uelis tikneltokaskej tlen kijtoua Biblia? Ximokuayejyeko tlen kijtoua Biblia ken kajki tlaltikpak.

Biblia kijtoua ken kajki tlaltikpak uan ken mochipaua atl

“Akin melauak toTajtsin Dios, akin okichijchi tlaltikpak […] amo san okichijchi, okichijchi para itech chantiskiaj” (Isaías 45:18).

ToTajtsin Dios okichijchi tlaltikpak para ipan matichantikan. Para uelis tiyoltoskej, okichi seki tlamantli para atl nochipa mayeto chipauak.

“Ye [toTajtsin Dios] kichiua matlejko atl, kichiua mixtli mamochiua atl uan ijkon satepan mixtli kichiua makiaui ipan nochtin akinmej chantij ipan tlaltikpak” (Job 36:27, 28).

Ninmej versículos techyekiluia ken toTajtsin Dios okichi atl para iselti mamochipaua. Atl tlen kajki ipan tlaltikpak uan aueyatl mochiuaj mixtli uan satepan kichiua makiaui, ijkon atl mochipaua uan satepan ueli tikonij uan noijki yolkamej (Eclesiastés 1:7; Amós 5:8).

“Ne nikchiuas makiaui ijkuak monekis, ijkon tlamochiuas uan nochi kouitl kitemakas itlakilo” (Levítico 26:4).

ToTajtsin Dios okinmilui israelitas ninmej tlajtolmej akinmej otekipanouayaj itech intlal. Okinmilui kiauiskia para kualtsin tlamochiuaskia. ToTajtsin Dios kimati keman moneki kiauis para tlamochiuas.

ToTajtsin Dios okichi tlen okinmilui uan noijki satepan ijkon kichiuas (Isaías 30:23). Axkan okachi miakej altepemej amo kipiaj atl porque amo nochipa kiaui. Pero ¿tlen kijtoua Biblia panos satepan?

Satepan tikpiaskej atl chipauak ¿tleka ijkon tikijtouaj?

Biblia kijtoua san toTajtsin Dios uelis tlayektlalis uan kichiuas nochipa mayeto atl chipauak (Mateo 6:9, 10). Ye yokitlali se tekiua ipan iluikak tlen tlanauatis nikan tlaltikpak, ye iTekiuajkayo toTajtsin Dios (Daniel 2:44; Apocalipsis 11:15). Kichiuas seki tlamantli tlen nion se tekiua ueli kichiua, kipojpolos nochi tlen kichiua amo mayeto atl chipauak.

Ouijkayotl: Axkan sapanoua tona noso sapanoua kiaui non kichiua ayakmo kuali mamochipaua atl. Ikinon axkan tlauaki noso ualeua tlaatemi porque sapanoua kiaui noso mar okachi moskaltia.

Moyektlalis: ITekiuajkayo toTajtsin Dios kichiuas oksepa nochi kuali mayeto ipan tlaltikpak. ToTajtsin Dios okijto: “Ne nochi nikyankuilijtok” (Apocalipsis 21:5). Yetos atl kanin tlauaki uan noijki kanin axkan amikaj chanti (Isaías 41:17-20). Jesucristo kajki ken tekiua itech iTekiuajkayo toTajtsin Dios uan noijki kinauatis nochi tlen onka itech Tlaltikpak.

Ijkuak Jesús okatka tlaltikpak, okitlakaualti ejekatl. Ijkon okiteititi Jehová okimakak chikaualis para kichiuas milagros (Marcos 4:39, 41). Ijkuak peuas tlanauatis itech tlaltikpak ayakmo tlaxixinis. Akinmej nikan chantiskej nochipa moyolseuijtoskej, amikaj kinmomojtis uan nochipa yolpakiskej.

Ouijkayotl: Axkan mar uan aueyatl sapanoua sokiojkej porque miakej san tlaixnekij uan amo kinekij oksekimej makipiakan atl chipauak.

Moyektlalis: ToTajtsin Dios kichipauas tlaltikpak, mar, aueyatl uan ameyalmej. Kiyektlalis tlaltikpak uan kichiuas mayeto se xochitlali. Biblia kijtoua: “Kualtsin yetos kanin tlauaki uan kualtsin tlaxochitis kanin tlakuauak tlali” (Isaías 35:1).

¿Tlen kinpanos akinmej amo kimaluiaj tlaltikpak nion kinmaluiaj oksekimej? Biblia kijtoua toTajtsin Dios kinmixpolos akinmej kijtlakouaj tlaltikpak (Apocalipsis 11:18; Proverbios 2:21, 22).

Ouijkayotl: Miakej amo kimaluiaj atl ikinon san niman tlami uan tlaltikpak amo ueli kichiua san niman mameya atl.

Moyektlalis: ITekiuajkayo toTajtsin Dios kichiuas mamochiua itlanekilis Jehová uan amo tlen kinekij akinmej san tlaixnekij (Mateo 6:9, 10). ITekiuajkayo toTajtsin Dios melauak kinpaleuis akinmej kinnauatis. Isaías 11:9 kijtoua: “Tlaltikpak tentos ika itlamatilis Jehová” a nochtin kuali kimaluiskej tlaltikpak porque kitlasojtlaskej toTajtsin Dios uan ye kuali kinmachtis.

Tla tikneki okachi tikmatis, xikita tlamachtil “¿Tlen kichiuas iTekiuajkayo toTajtsin Dios?”.
¿Mitspaktiskia tikmatis ken yetos xochitlali? Xiktlajtolti tlen kijtoua Biblia itech Isaías capítulo 35.
Tla tikneki tikmatis tlen kichiuas toTajtsin Dios nikan tlaltikpak timitsyoleuaj xikita video tlen itoka ¿Tleka toTajtsin Dios okichijchi tlaltikpak?