¡XIMOMALUIJTOKAN!
Mokualaniaj tekiuajkej | ¿Tlen kijtoua Biblia?
Ipan nochi tlaltikpak miak tlamantli kimotoktiaj tekiuajkej.
Ompa México okinmiktijkej 39 tlakamej tlen okinekiayaj yetoskej tekiuajkej uan nin tlamantli amo keman ijkon opanouaya. 2023 uan 2024 okimotoktijkej miak tlamantli ijkuak okinpejpenkej tekiuajkej.
Ompa Europa noijki kimotoktiaj miak tlamantli tekiuajkej. 15 de mayo 2024 okinekiayaj kimiktiskej se tlakatl tlen tlayekana ompa Eslovaquia.
13 de julio 2024 ompa Estados Unidos miakej omomojtijkej porque okinekiayaj kimiktiskej Donald Trump tlen yokatka tekiua.
¿Tleka tekiuajkej kimotoktiaj miak tlamantli? ¿Se tonal ayakmo ijkon kichiuaskej? ¿Tlen kijtoua Biblia?
Biblia kijtoua tekiuajkej kimotoktiskiaj miak tlamantli
Biblia kijtoua “itlamian tonalmej” miakej tetlajyouiltiskiaj uan amitlaj kinpaktiskia.
“Pero moneki tikmatis itlamian tonalmej yetos oui uan oui kixikoskej. Porque miakej san yejuan motlasojtlaskej, [...]amo motlasojkamatiskej uan ayakmo mouikaskej inuan oksekimej [...] amo teajsikamatiskej [...] tetlajyouiltiskej [...] tekajkayauaskej, amo mokuayejyekoskej tlen kichiuaskej [uan] sapanoua moueyinekiskej” (2 Timoteo 3:1-4).
Biblia noijki kijtoua ninmej tonalmej tekiuajkej mokualaniskiaj uan miak tlamantli kimotoktiskiaj (Lucas 21:9). Pero amo nochipa ijkon mokualanijtoskej.
Ayakmo yetoskej tekiuajkej
Biblia kijtoua toTajtsin Dios kinpatkayotis tekiuajkej ika iTekiuajkayo tlen kajki iluikak.
“ToTajtsin Dios tlen kajki iluikak kitlalis se tekiuajkayotl tlen [...] kintlajtlamis uan kinmachiuas nochi ninmej tekiuajkayomej uan ye nochipa yetos” (Daniel 2:44).
ITekiuajkayo toTajtsin Dios techpaleuis kuali matiyetokan uan tinochtin matimouikakan.
Jesucristo yetos tekiua uan moixmati ken “Tekiua tlen kitemaka Yolseuilistli”. Ye techpaleuis tinochtin kuali matiyetokan (Isaías 9:6, 7).
Akinmej kipaleuiaj iTekiuajkayo toTajtsin Dios momachtijtokej ken kuali yetoskej. Biblia kijtoua tlen ayakmo kichiuaskej. Kijtoua: “Kinkopaskej inmiespadas tlen ika tlameuaskej uan inlanzas kinkopaskej tlen ika kitekiskej xiuitl. Ayakmo moteuiskej ika espadas se ueyi altepetl iuan okse, nion momachtiskej guerra” (Isaías 2:3, 4).
Tla tikneki tikmatis okachi, xiktlajtolti tlamachtil “¿Tlen kichiuas iTekiuajkayo toTajtsin Dios?” uan noijki xikita video ¿Tlen iTekiuajkayo toTajtsin Dios?