Akinmej tlapaleuiaj itech Guardian, okijtojkej: “Axkan okachi ijtlakaui tlaltikpak uan satepan ayakmo uelis ipan tichantiskej”.

 Intlajtlakol personas ijtlakaui tlaltikpak. Ixtlamatkej kijtouaj ipan tlaltikpak sapanoua tlatotonia porque miakej kichiuaj tlen amo kipaleuia. Sapanoua tlatotonia ikinon tlaltikpak ayakmo kuali kajki uan panoua miak tlamantli tetlajyouilti. Matikitakan seki tlamantli tlen panotok:

•   Axkan okachi tlatotonia, tlauaki, ejekiaui uan okseki tlamantli tlen kichiua matlatemi uan matlatla tepeyo.

•   Pati hielo tlen kajki Ártico uan noijki tepetsitsintin tlen chijchitokej ika hielo.

•   Mar okachi moskaltia.

 Axkan okachi yoijtlakauik tlaltikpak. Akinmej kichiuaj periódico New York Times, okijtojkej tlen panotok itech 193 altepemej. Yejuan okijtojkej: “Tlaltikpak yetoskia ken techtsajtsilia matikpaleuikan”. Axkan miakej ixpoliuij uan tlajyouiaj porque tlaltikpak kipanoua miak tlamantli. Ikinon akinmej tlapaleuiaj itech Organización Mundial de la Salud, okijtojkej: “Uelis itlaj techpanos porque axkan panotok miak tlamantli ipan tlaltikpak”.

 Maski axkan panotok miak tlamantli uelis tikneltokaskej satepan kuali tiyetoskej. Biblia yokijtojka panoskia tlen axkan tikitaj. Noijki kijtoua toTajtsin Dios itlaj kichiuas uan satepan kuali tiyetoskej.

 Kema. Axkan okachi tlatotonia porque ijtlakaui tlaltikpak uan Biblia yokijtojka ijkon panoskia.

 Profecía: “Itlamian tonalmej yetos oui uan oui kixikoskej. Porque miakej san yejuan motlasojtlaskej, kixnekiskej tomin, [...] ayakmo mouikaskej inuan oksekimej, [...] amo teajsikamatiskej [...] tekajkayauaskej, amo mokuayejyekoskej tlen kichiuaskej” (2 Timoteo 3:1-4).

 Biblia okijto ken kipiaskiaj inyelis miakej uan tlen kichiuaskej kijtlakoskia tlaltikpak. Tekiuajkej uan akinmej kinpiaj empresas okachi kixnekij tomin uan amo inteki tlen kinpanoua oksekimej. Noijki amo kintekipachoua ken yetoskej akinmej yikin nesiskej.

 Nin profecía techititia amo matikchiakan nochtin personas makipatlakan inyelis uan makimaluikan tlaltikpak. Biblia kijtoua “okachi kichiuaskej tlen amo kuali” (2 Timoteo 3:13).

 Biblia kijtoua Jehová a kitekipachoua tlaltikpak uan noijki akinmej ipan tichantij. Matikitakan eyi versículos tlen kijtouaj tlen kichiuas toTajtsin Dios.

1.  1. ToTajtsin Dios “akin okichijchi tlaltikpak uan okitlali ken moneki, amo san okichijchi, okichijchi para itech chantiskiaj” (Isaías 45:18).

    ToTajtsin Dios kichiuas tlen yokijto (Isaías 55:11). Amo kitekauilis ikaj makipojpolo tlaltikpak uan amikaj uelis kichiuas ayakmo itech matichantikan.

2.  2. “Pero akinmej yolkualmej kinmakaskej tlaltikpak uan melauak yolpakiskej porque yetos miak yolseuilistli. Yolmelauakej yetoskej tlaltikpak uan nochipa itech chantiskej” (Salmo 37:11, 29).

    ToTajtsin Dios kijtoua uelis nochipa tichantiskej ipan tlaltikpak uan kuali tiyetoskej.

3.  3. “Akinmej amo yolkualmej kinmixpoloskej itech tlaltikpak” (Proverbios 2:22).

    ToTajtsin Dios kijtoua kinmixpolos akinmej kichiuaj tlen amo kuali uan noijki akinmej kijtlakouaj tlaltikpak.

 ¿Ken tlayektlalis toTajtsin Dios ijkon ken yokijto? Ye tlayektlalis ika iTekiuajkayo ipan nochi tlaltikpak (Mateo 6:10). Non Tekiuajkayotl ualtlanauatis desde iluikak. ToTajtsin Dios amo motlapouis inuan tekiuajkej para kitaskej ken kiyektlaliskej tlaltikpak porque iTekiuajkayo kinpatkayotis nochtin tekiuajkej (Daniel 2:44).

 Techyolchikaua tlen kichiuas toTajtsin Dios uan noijki techyolchikaua kiyektlalis tlaltikpak (Salmo 96:10-13). Xikita tlen kichiuas iTekiuajkayo toTajtsin Dios:

•   Kiyektlalis tlaltikpak

   Biblia kijtoua: “Kualtsin yetos kanin tlauaki uan kualtsin tlaxochitis kanin tlakuauak tlali” (Isaías 35:1).

   ¿Ken techpaleuis? Jehová kichipauas tlaltikpak uan nochi tlen yotikijtlakojkej.

•   Ayakmo sapanoua tlatotonias nion sapanoua seuas

   Biblia kijtoua: “[Jehová] kitlakaualtia ejekatl uan san mokaua atl tlen kajki ijtik mar” (Salmo 107:29).

   ¿Ken techpaleuis? Jehová kipia chikaualistli para kinauatis nochi tlen onka tlaltikpak. Ikinon ayakmo ikaj tlajyouis porque sapanoua tlatotonia noso sapanoua seua.

•   Techititis ken moneki tikmaluiskej tlaltikpak

   Biblia kijtoua: “Nimitsmakas ixtlamatilistli uan nimitsmachtis xikchiua tlen kuali” (Salmo 32:8).

   ¿Ken techpaleuis? Jehová otlanauati matikmaluikan tlaltikpak (Génesis 1:28; 2:15). Ye techititis ken moneki tikmaluiskej tlaltikpak. Techmachtis ken moneki tikmaluiskej nochi tlen okichijchi uan ijkon ayakmo tikijtlakoskej.