Beth okipiaya anemia ijkuak okatka ichpochtli. Ye okijto: “Amo onikpiaya chikaualistli, san niman onisotlauaya, onechkokouaya noomio uan ijkuak oniknekiaya itlaj nikchiuas, amo ueli onikchiuaya. Tepajti onechilui manikoni seki tlamantli tlen kipia hierro uan noijki opejki okachi kuali nitlakua. Non onechpaleui san niman kuali manimomachili”.

 Miakej mokokouaj ijkon ken omokokouaya Beth. Akinmej pouij itech Organización Mundial de la Salud kijtouaj 2,000 millones kipiaj anemia. Non kijtosneki mokokouaj kanaj 30% tlen chantij ipan nochi tlaltikpak. Itech seki altepemej kanin ayamo kajki miak tlamantli, sekimej siuamej tlen yikipiaskej inkonetsin kipiaj anemia uan kanaj 40% konemej noijki kipiaj non kokolistli.

 Kokolistli anemia uelis sapanoua techtlajyouiltis. Non kokolistli hasta uelis kijtlakos toyolo uan kichiuas amo mamolini ken moneki. Akinmej pouij itech OMS kijtouaj itech seki altepemej “ixpoliuij kanaj 20% siuamej tlen kinpiaj inkoneuan porque okipiayaj anemia”. Miakej siuamej kipiaj anemia porque kinpoloua hierro ikinon tla kipiaskej inkonetsin uelis achto nesis uan yetos amo etik. Noijki konemej tlen kipiaj anemia yolik moskaltiaj uan okachi mokokouaj. Pero ijkuak ikaj kipia anemia porque amo kipia hierro uelis momaluis uan ijkon pajtis. a

Anemia

 Anemia se kokolistli. Non kijtosneki akin kipia anemia amo kuali katej iglóbulos rojos. Pero ualeua okseki tlamantli kichiua makipiakan nin kokolistli. Ixtlamatkej yokitakej kajki anemia kanaj 400 tlamantli. Sekimej tlen kipiaj anemia ok uelij mopajtiaj pero oksekimej ayakmo keman pajtij uan sekimej sapanoua mokokouaj uan oksekimej amo.

¿Tleka ikaj kipia anemia?

 Eyi tlamantli kichiua ikaj makipia anemia:

•   Ijkuak ikaj eskisa ayakmo kinpia miakej glóbulos rojos.

•   Ijkuak ikaj amo momiaktiliaj glóbulos rojos itech icuerpo.

•   Ijkuak ikaj kinpojpoloua glóbulos rojos itech icuerpo.

 Miakej kipiaj anemia porque incuerpo amo kipia miak hierro. Ijkuak ikaj ijkon kipanoua, icuerpo amo kipia hemoglobina ken moneki. Glóbulos rojos kipia hemoglobina uan non kipaleuia makiuika oxígeno itech tocuerpo.

¿Tlen tlamantli kinpanoua akinmej kipiaj anemia porque kinpoloua hierro?

 Ualeua amo uelis ikaj kimatis kox kipia anemia porque amo kimachilis kox itlaj kikokoua. Amo nochtin kinpanoua nin tlamantli pero nin tlen okachi kinpanoua akinmej mokokouaj:

•   Sapanoua sotlauaj.

•   Seseyaj inmauan uan inmikxiuan.

•   Amo kipiaj chikaualistli.

•   Ixkoseuij.

•   Kinkokoua intsonteko uan kouaxouintij.

•   Kinkokoua inmelpa, okachi molinia inyolo uan amo kuali mijyotiaj.

•   Tlapani inmisti.

•   Amo kinekij tlakuaskej pero okachi ijkon kinpanoua konemej.

•   Kinekij kikuaskej setl, almidón noso kinekij kikuaskej tlali.

¿Akinmej okachi uelis kipiaskej anemia?

 Siuamej okachi uelis kinmajsis non kokolistli porque yejuan eskisa sejse metsli. Akinmej yikipiaskej inkonetsin noijki uelis mokokoskej tla intlakual amo kipia miak folato tlen noijki moixmati ken ácido fólico. Non tlamantli noijki vitamina B.

 Konemej tlen nesij ijkuak ayamo kajxitiaj chiknaui metstli noso tlen amo kipiaj kilos tlen moneki uan amo kipiaj hierro tlen kipia ileche inmama.

 Chokotsitsintin uan takotsitsintin tlen san tlen amo kikuaj uan amo kinpaleuia.

 Akinmej amo kikuaj nakatl uan kikuaj tlen amo kipia miak hierro.

 Akinmej kipiaj kokolistli tlen amo ueli mopajtiaj. Ijkon kinpanoua akinmej amo kuali kipiaj inmieso, kipiaj cáncer, akinmej mokokouaj uan amo kuali tlapiasouaj, akinmej kipiaj okseki kokolistli noso tla ikaj yolik ijtik eskisa porque omokoko.

¿Ken uelis mopajtiskej akinmej kipiaj anemia?

 Amo nochtin akinmej kipiaj anemia uelij mopajtiaj. Pero tla mokokouaj porque kinpoloua hierro uan vitaminas uelis pajtiskej tla kikuaj tlakuali tlen kipia nin tlamantli:

 Hierro. Nakatl, etl, lenteja uan kilitl kipiaj hierro. b Sekimej ixtlamatkej kijtouaj noijki tlapaleuia tla tlakualchiuaj itech ollas tlen chijchitokej ika hierro porque ijkon tlakuali okachi kipia hierro.

 Folato. Noijki kichijchiuaj uan moixmati ken ácido fólico. Nin tlamantli moajsi itech tlakilotl, kilitl, chícharos, etl, queso, teksistli, michimej, almendras uan kakauatl. Noijki moajsi itech tlakuali tlen kipia miak vitaminas ken pan, cereales, pasta uan arroz.

 Vitamina B-12. Non moajsi itech nakatl, miak tlamantli tlen chijchitok ika leche, noijki seki tlamantli tlen chijchitok ika soya uan cereales tlen chijchitok ika okseki tlamantli.

 Vitamina C. Nin vitamina moajsi itech tlakilotl tlen xokok, pimientos, brócoli, tomatl, melón uan fresas. Tlakuali tlen kipia vitamina C kipaleuia tocuerpo okachi makiseli hierro.

 Itech okseki altepemej kajki tlatlamantli tlakuali. Ikinon xikita tlen tlakuali uelis mitspaleuis uan kajki ik kanin tichanti. Miak ipati ijkon xikchiua tla tejuatsin yitikpia mokonetsin noso tikneki tikpias. Tla tejuatsin timomaluia kipaleuis mokonetsin amo makipia anemia. c