Itech okse tlamachtil yotimotlapouijkej itech Diana. Ye sapanoa amo kuali omomachiliaya, ik non, nochipa otlauanaya. Biblia amo kijtoa tlajtlakoli ma tikonikan tepitsin alcohol pero kijtoa: “Amo ximouika iuan akinmej sapanoa konij vino” (Proverbios 23:20). Akinmej tlauanaj mokokoaj, mokajkauaj iuan inkalchanejkauan noso inmiuan mokualaniaj uan miakej mikij ijkuak ok telpokamej noso ichpokamej. Amo ijkon kinpanoskia tla kitlakamatiskiaj tlen kijtoa Biblia.

Ijkon okichi Diana uan okijto: “Maski onitlauanaya ok onimotekipachoaya. Pero oniktlakamatki tlen kijtoa Filipenses 4:6, 7: ‘Amitla manomechtekipacho, yej nochipa xikilikah n Toteko [Jehová, TNM] tlan nonkinekih keman nonmotiotsajtsiliah, xiktlajtlanilikah iwa ximotlasojkamatikah’. Mojmostla ijkuak yinikochiskia onimokuayejyekoaya miak tlamantli, oniktlatlaujtiaya Jehová uan onikiluiaya tlen onikmachiliaya, onikualaniaya, onimoyolkokoaya, amo onikmatiaya tlen nikchiuas... uan oniktlatlaujtiaya ma nechpaleui kuali ma nimokuayejyeko. Mostlatika onimochijchikauaya ayakmo ijkon nimokuayejyekoskia. Ijkuak oniktlatlaujtiaya Jehová onechpaleuiaya ma nikita tlen onikpiaya uan amo tlen amo onikpiaya.  Sapanoa onikpatioitaya nikpias yolseuilistli, ik non, onikijto ayakmo nitlauanaskia”.

Akinmej auilnemij sapanoa tlajyouiaj. Pero Biblia techpaleuia amo ijkon ma titlajyouikan porque techiluia amo ikaj ma tiknonotsakan uan amo ma tikitakan pornografía. Se tlakatl tlen itoka Samuel okijto: “Amo oui ikaj oniknonotsaya... Ualeua akin oniknonotsaya nion onechpaktiaya, pero onikitaya onikpaktiaya uan kualtsin onikmachiliaya”. Nochtin okijtoayaj Samuel miakej ichpokamej okinnonotsaya maski ualeua amo ijkon okinekiaya kichiuas, ik non, opejki miakej kinnonotsa pero amo kuali omomachiliaya. Satepan okijto: “Amo kuali ijkon ma nikchiua, san notech nimotekipachoa”.

Samuel okitlajtolti se tlamachtil para telpokamej uan ichpokamej itech jw.org. Noijki omokuayejyeko itech Proverbios 20:11 kanin kijtoa: “Telpochtli moixmati ika tlen kichiua, tla inemilis chipauak uan melauak”. ¿Ken okipaleui nin tlaxelol? Samuel otlajtlakolchijtoka ijkuak san okinnonotsaya ichpokamej. Ye okijto: “Onikitak akin ijkon kichiua amo kuali yetos iuan inamik ijkuak monamiktis. Onimokuayejyeko ken momachiliskia akin yetos nosiua tla ikaj niknonotsas. Onikitak amo kuali tlen onikchijtoka. Amo oui ikaj niknonotsas pero non amo kijtosneki kuali ijkon nikchiuas”. Samuel okipatlak inemilis uan non okipaleui amo ma auilnemi.

Se tlakatl tlen itoka Antonio sapanoa okitaya pornografía. Maski sapanoa okitlasojtlaya isiua ok okitaya non tlamantli. Kijtoa okipaleui tlen kijtoa 1 Pedro 5:8: “Xiisatokah iwa kuali xitlachixtokah. Porke nomokokolikni n amokualitlakatl kitemojtinemi akin kixpolos, kemi yaskia se lío non kitemojtinemi akin kitlankokototsas iwa kikuas”. Antonio okijto: “San kanin onka tlen poui itech pornografía uan tla tikitaj, san itech timokuayejyekojtoskej. Non tlaxelol onechpaleui ma nikajsikamati akin kineki ma nikita non tlamantli amo kuali. Ijkuak oniknekiaya nimokuayejyekos itech non, onimochijchikauaya nikilnamikis akin kineki ma nikita. Axkan nikmati san Jehová uelis nechpaleuis ma niyeto ixtlamatki uan ma nikmalui nokuayejyekol, noyolo uan kuali ma niyeto iuan nonamik”. Antonio okinek ma kipaleuikan uan ayakmo okitak pornografía. Non okipaleui amo ma tlajyoui.

Ken yotikitakej, tlen kijtoa Biblia techpaleuia amo okachi ma tikpiakan ouijkayotl. Pero ¿tlen tikchiuaskej tla ouijkayotl okachi moueyitilia uan amo ueli tikyektlaliaj? Ma tikitakan ken techpaleuis iTlajtol toTajtsin Dios.