1. Ijkuak ikaj kikixtiaj itech tlanechikol, ¿ken momachilia ifamilia?

 IJKUAK ikaj kikixtiaj itech tlanechikol, ifamilia sapanoua moyolkokoua. Se tokni tlen itoka Hilda * okijto: “Nonamik nochipa okitekichiuili Jehová, san sekan otikatkaj 41 xiuitl, ijkuak oixpoliuik onimokuayejyeko sapanoua amo kuali tlen onechpanotoka. Pero ijkuak notelpoch uan nochi ifamilia ayakmo okitekichiuilijkej Jehová non okachi onechyolkoko”.

2, 3. Ijkon ken kijtoua Salmo 78:40, 41, ¿ken momachilia Jehová ijkuak ikaj ayakmo kitechiuilia?

² Ma timokuayejyekokan ken Jehová sapanoua omoyolkoko ijkuak miakej ángeles ayakmo okitlakamatkej (Judas 6). ¿Timokuayejyekouaj ken sapanoua omoyolkoko ijkuak israelitas miak uelta amo okitlakamatkej? (xiktlajtolti Salmo 78:40, 41). Tla okikixtijkej itech tlanechikol akin tejuatsin tiktlasojtla, xikmato toTajtsin Jehová kiyolkokoua. Ye kajsikamati tlen tejuatsin tikmachilia. Mitsiknomatis uan mitspaleuis ijkuak monekis.

³ Itech nin tlamachtil tikitaskej tlen moneki tikchiuaskej tla tiknekij Jehová ma techpaleui ijkuak kikixtiaj itech tlanechikol akin tiktlasojtlaj. Noijki tikitaskej ken uelis tikinpaleuiskej tokniuan tlen inmiuan timonechikouaj tlen noijki ijkon kinpanotok. Pero achto tikitaskej tlen amo moneki timokuayejyekoskej.

4. ¿Ken momachiliaj tetajmej ijkuak se inkone ayakmo kitechiuilia Jehová?

⁴ Ijkuak se telpochtli noso ichpochtli ayakmo kitekichiuilia  Jehová, xamo intatajuan motlajtlaniaj kox itlaj uelis kichiuaskiaj para kitekichiuiliskia Jehová. Se tokni tlen itoka Luke itelpoch okikixtijkej itech tlanechikol, ye okijto: “Onimotlajtlakoltiaya uan amo kuali onimomachiliaya. Onichokaya porque sapanoua onimoyolkokouaya”. Se tokni tlen itoka Elizabeth noijki ijkon okipanok, ye nochipa omokuayejyekouaya: “¿Amo onikchi tlen omonekiaya? Onimokuayejyekouaya amo onikpaleui nokone okachi ma kitlasojtla Jehová”.

5. ¿Akin itlajtlakol tla ikaj ayakmo kitekichiuilia Jehová?

⁵ Ma tikilnamiktokan Jehová techkauilia ma tikpejpenakan tlen tikchiuaskej. Ik non, sejse tikpejpenaskej tla tiktlakamatiskej noso amo. Sekimej telpokamej uan ichpokamej amo okinmiskaltijkej ken omonekiaya pero yejuan okipejpenkej kitekichiuiliskej Jehová. Sejse tejuan tikpejpenaskej tla tiktekichiuiliskej noso amo (Jos. 24:15). Ik non, tetajmej tla namokone ayakmo kitekichiuilia Jehová, amo xikijtokan namejuan namotlajtlakol.

6. ¿Ken uelis momachilis se telpochtli noso se ichpochtli ijkuak itajtsin noso inantsin ayakmo kitekichiuilia Jehová?

⁶ Ualeua tlakatl noso siuatl akin ayakmo kitekichiuilia Jehová uan xamo hasta kikajteua ifamilia (Sal. 27:10). Uelis sapanoua kinyolkokoua inkoneuan porque yejuan okinmitayaj intatajuan kuali tlen okichiuayaj. Se tokni tlen itoka Esther techiluia tlen okimachili ijkuak okikixtijkej itajtsin itech tlanechikol: “Nochipa onichokaya porque onikajsikamatki amo yolik okikajtiaj tlen kijtoua Biblia, ye okipejpenki ayakmo kitekichiuilis Jehová. Sapanoua niktlasojtla notajtsin, ik non, ijkuak okikixtijkej itech tlanechikol, nochipa onechtekipachouaya ken okatka. Uan hasta sapanoua onimomojtiaya”.

7. ¿Ken momachilia Jehová ijkuak intatajuan se ichpochtli noso se telpochtli kinkixtiaj itech tlanechikol?

⁷ Tla titelpochtli noso tiichpochtli, xikmato noijki techyolkokoua tla motajtsin noso monantsin kikixtiaj itech tlanechikol. Jehová kajsikamati ken nanmomachiliaj. Ye namechtlasojtla uan yolpaki porque ok nochipa nankitekichiuiliaj. Uan tejuan noijki ijkon tikmachiliaj. Xikilnamiktokan namejuan amo namotlajtlakol tlen okipejpenkej namotajuan. Ken yotikitakej Jehová techkauilia ma tikpejpenakan tla tiktekichiuiliskej noso amo. Sejse tlen yotimoapolaktijkej tiktemakaskej “cuenta inawak Dios de tlan se kichiwa” (Gál. 6:5, Itlajtol totajtzin Dios [NHY]).

8. ¿Tlen uelis kichiuaskej familias ijkuak ok kichixtokej se infamiliar oksepa ma kitekichiuili Jehová? (Xikita recuadro “ Jehová kineki oksepa xiktekichiuili”).

⁸ Ijkuak ikaj akin tiktlasojtlaj ayakmo kitekichiuilia Jehová, timokuayejyekouaj satepan oksepa kitekichiuilis. ¿Tlen moneki tikchiuaskej? Ma timochijchikauakan tikpiaskej okachi chikauak totlaneltokilis. Tla ijkon tikchiuaj, kinpaleuis oksekimej tlen poui itech tofamilia uan noijki akin ayakmo kitekichiuilia Jehová. Noijki non techpaleuis amo okachi ma timoyolkokokan. Ma tikitakan tlen techpaleuis ma tikpiakan chikauak totlaneltokilis.

9. ¿Tlen uelis techpaleuis tikpiaskej chikauak totlaneltokilis? (Xikita recuadro “ Textos tlen techyolchikauas tla se tofamiliar ayakmo kitekichiuilia Jehová”).

⁹ Ma timochijchikauakan ma tikpiakan okachi chikauak totlaneltokilis. Ma tikinpaleuikan oksekimej tlen pouij itech tofamilia ma mouikakan iuan Jehová. ¿Ken uelis ijkon tikchiuaskej? Techpaleuis tla mojmostla tiktlajtoltiskej Biblia uan timonechikouaj. Ma tikitakan tlen okipanok se tokni tlen itoka Joanna, itajtsin uan ikni ayakmo okitekichiuilijkej Jehová. Ye okijto: “Ijkuak niktlajtoltia tlen okichijkej yiuejkika sekimej itekipanojkauan Jehová: Abigaíl, Ester, Job, José uan Jesús, nechpaleuia ma nimokuayejyeko tlen kuali uan nechyolchikaua. Noijki tlatsotsonali tlen kisa itech JW Broadcasting, sapanoua nechyolchikaua”.

10. Ijkon ken kijtoua Salmo 32:6-8, ¿tlen uelis tikchiuaskej tla timoyolkokouaj?

¹⁰ Ma tikiluikan Jehová tlen techtekipachoua. Ma tiktlatlaujtikan ijkuak sapanoua timoyolkokouaj. Ma tikiluikan Jehová ma techpaleui, ma tikitakan tlen techpanotok ijkon ken ye kita, noijki ma tiyetokan tiixtlamatkej uan ma tikmatikan tlen tikchiuaskej (xiktlajtolti Salmo 32:6-8). Xamo sapanoua techyolkokos ijkuak tikiluiskej Jehová ken timomachiliaj pero ye kuali techajsikamati. Ye sapanoua techtlasojtla uan kineki ma tikiluikan ken timomachiliaj (Éx. 34:6; Sal. 62:7, 8).

11. Ijkon ken kijtoua Hebreos 12:11, ¿tleka moneki kuali tikitaskej ijkuak Jehová ika kiyektlalia? (Noijki xikita recuadro “ Jehová kititia kitlasojtla akin kikixtiaj itech tlanechikol”).

¹¹ Ma tiktlakaitakan tlen kipejpenaj tlayekankej. Jehová kijtoua ijkuak ikaj tlajtlakolchiua moneki kikixtiskej itech tlanechikol (xiktlajtolti Hebreos 12:11). Xamo  sekimej kijtoskej tlayekankej omotlapololtijkej uan amo omonekiaya kikixtiskiaj. Pero ma tikilnamiktokan akinmej ijkon mokuayejyekouaj amo keman kijtoskej otlajtlakolchi akin okikixtijkej. Noijki ma tikilnamikikan amo tikmatij nochi tlen opanok. Ik non, ma tikneltokakan tlayekankej tlen otlapaleuijkej itech comité judicial okichijkej ijkon ken kijtouaj principios bíblicos uan ijkon ken Jehová kineki (2 Crón. 19:6).

12. ¿Ken yokinpaleui sekimej porque okitlakamatkej Jehová ijkuak ikaj okikixtijkej itech tlanechikol?

¹² Tla tejuatsin titetlakamatis ijkuak se mofamiliar kikixtiaj itech tlanechikol, xamo tikpaleuis oksepa ma kineki kitekichiuilis Jehová. Tokni Elizabeth tlen itech yotimotlapouijkej itech párrafo 4 kijtoua: “Sapanoua otitlajyouijkej ijkuak ayakmo otimouikayaj iuan tokone. Pero ijkuak oksepa opejki kitekichiuilia Jehová okijto kuali okikixtijkej itech tlanechikol uan satepan okijto tlen okipanok okimachti miak tlamantli. Non okichi ma nikpatioita ijkuak Jehová ika kiyektlalia”. Inamik tlen itoka Mark okijto: “Seki xiuitl satepan tokone okipejpenki oksepa kitekichiuilis Jehová porque noijki amo iuan otimouikayaj. Niktlasojkamatilia Jehová porque otechpaleui ma tiktlakamatikan”.

13. ¿Tlen mitspaleuis iuan ijkon amo sapanoua timoyolkokos?

¹³ Ximotlapoui iuan tokniuan tlen teajsikamatij. Ximouika iuan tokniuan tlen kipiaj chikauak intlaneltokilis, yejuan mitspaleuiskej ximokuayejyeko ken moneki (Prov. 12:25; 17:17). Tokni Joanna tlen itech yotimotlapouijkej itech párrafo 9 okijto: “Noselti onimomachiliaya. Pero onechpaleui nimotlapouis iuan noyolikniuan”. Pero ¿tlen uelis tikchiuas tla se tokni sapanoua mitsyolkokoua?

14. ¿Tleka moneki tikinxikoskej tokniuan uan tikintlapojpoluiskej?

¹⁴ Amo san niman xikualani iuan tokniuan. Ma tikilnamiktokan amo nochtin kuali techtlapouiskej (Sant. 3:2). Tinochtin titlajtlakolejkej, ik non, amo ma techtlajtlachialti ijkuak ikaj amo kimatis tlen techiluis noso techiluia itlaj tlen techyolkokoua. Ma tikilnamikikan tlen okijto apóstol Pablo: “Xitexikokah iwa ximotlapojpolwikah. Iwa tla se nomokni onomechchiwili itla amo kuali, xiktlapojpolwikah” (Col. 3:13). Se tokni tlen kipia se ifamiliar tlen okikixtijkej itech tlanechikol okijto: “Tokniuan okinekiayaj nechiluiskej tlen kuali pero ken noijki tlajtlakolejkej amo okijtouayaj tlen omonekiaya pero Jehová onechpaleui ma nikintlapojpolui”. Axkan ma tikitakan tlen uelis kichiuaskej tokniuan tlen monechikouaj iuan tokniuan tlen okikixtijkej se infamiliar.

15. ¿Ken uelis tikinpaleuiskej tokniuan tlen okikixtijkej se infamiliar?

¹⁵ Ma tikintlasojtlakan tokniuan tlen kitlakamatij Jehová ijkuak okikixtijkej se  infamiliar. Se tokni tlen itoka Míriam okijto omomojtiaya monechikoti ijkuak ikni okikixtijkej itech tlanechikol. Ye okijto: “Onimomojtiaya tlen uelis kijtoskiaj oksekimej tokniuan. Pero toyolikniuan noijki omoyolkokouayaj uan amo okijtouayaj tlen amo kuali. Ik non, amo onimomachili noselti”. Okse tokni okijto: “Ijkuak okikixtijkej tokone, otechyolchikauakoj tokniuan. Sekimej otechiluijkej amo okimatiayaj tlen techiluiskej. Sekimej touan ochokakej uan otechtlajkuililijkej itlaj tlen otechyolchika. Tlen okichijkej sapanoua otechpaleui”.

16. ¿Tokniuan tlen inmiuan timonechikouaj ken uelis tikinpaleuiskej ijkuak se infamiliar kikixtiaj itech tlanechikol?

¹⁶ Ma tikinpaleuijtokan tokniuan tlen kitlakamatij Jehová. Moneki tikintlasojtlaskej uan tikinyolchikauaskej (Heb. 10:24, 25). Ualeua oksekimej ayakmo kintlapouiaj tokniuan tlen kipiaj se infamiliar tlen okikixtijkej itech tlanechikol. ¡Amo keman ijkon ma tikinchiuilikan! Tla okinkixtijkej intajtsin noso inantsin telpokamej uan ichpokamej, tejuan moneki tikinyolchikauaskej. Se tokni tlen itoka María okijto tlen opanok ijkuak inamik okikixtijkej itech tlanechikol uan okinkajtej, ye okijto: “Sekimej tokniuan otechtlajpalokoj, nouan otlakualchijkej uan onechpaleuijkej ma nikinmachti nokoneuan. Onechajsikamatkej onitlajyouijtoka uan nouan ochokakej. Noijki onechpaleuijkej ijkuak oksekimej onechtenejkej. Tokniuan sapanoua onechyolchikajkej” (Rom. 12:13, 15).

17. ¿Tlen uelis kichiuaskej tlayekankej para kinyolseuiskej akinmej tlajyouiaj?

¹⁷ Tokniuan tlayekankej xikinyolchikauakan tokniuan tlen kitlakamatij Jehová ijkuak kikixtiaj se infamiliar. Namejuan moneki nankinyolseuiskej nonmej tokniuan (1 Tes. 5:14). Ijkuak ayamo peua tlanechikol, inmiuan ximotlapouikan iuan xikinyolchikauakan uan ijkuak ayamo tlami noijki xikinyolchikauakan. Xikintlajpalotij uan inmiuan ximotlatlaujtikan. Inmiuan xitetlapouikan uan xikinyoleuakan ijkuak nanmomachtiaj iuan namofamilia. Tlayekankej moneki kinmititiskej kintlasojtlaj, kinmiknomatij uan ma kinmititikan kinekij kinpaleuiskej akinmej moyolkokouaj porque infamiliar okikixtijkej itech tlanechikol (1 Tes. 2:7, 8).

18. Ijkon ken kijtoua 2 Pedro 3:9, ¿tlen kineki Jehová ma kichiuakan akinmej ayakmo kitekichiuiliaj?

¹⁸ Jehová “amo kineki aka mamoixpolo yej tinochteh matimoyolpatlakah inawak” (xiktlajtolti 2 Pedro 3:9). Maski ikaj tlajtlakolchiua toTajtsin Dios ok kipatioita. Xikilnamiki ye okitemakak iKone para topatka ma ixpoliui. ToTajtsin Dios kita ken kinpaleuis oksepa ma kitekichiuilikan akinmej ayakmo kichiuaj. Uan kineki ijkon ma kichiuakan porque ijkon kiteititia tlen okijto Jesús itech telpochtli tlen okauilti itomin (Luc. 15:11-32). Sekimej tlen ayakmo okitekichiuiliayaj toTajtsin Jehová oksepa opejkej kitekichiuiliaj uan tokniuan tlen inmiuan monechikouaj kuali okinselijkej. Elizabeth tlen itech yotimotlapouijkej, sapanoua oyolpakik ijkuak itelpoch oksepa opejki kitekichiuilia Jehová, ye okijto: “Nikintlasojkamatilia nochtin tokniuan tlen otechyolchikajkej uan otechiluijkej amo ma timosotlauakan”.

19. ¿Tleka ok uelis titlaneltokaskej itech Jehová?

¹⁹ Nochipa uelis titlaneltokaskej itech Jehová. Ye amo keman techiluia ma tikchiuakan tlen techtlajyouiltis. Techiknomati uan kitemaka tlen kipia, tinochtin sapanoua techtlasojtla uan tikueyichiuaj. Ma tikilnamiktokan Jehová techpaleuis ijkuak titlajyouiaj (Heb. 13:5, 6). Mark tlen itech yotimotlapouijkej itech párrafo 12, okijto: “Jehová nochipa okiteititi touan okatka. Ye nochipa techpaleuia ijkuak titlajyouiaj”. Ye nochipa techpaleuia uan techmaka ichikaualis para ma titlaxikokan (2 Cor. 4:7). Ok uelis titlaneltokaskej itech Jehová maski ikaj akin tiktlasojtlaj ayakmo kitekichiuilia.