1, 2. (1) Ijkon ken kijtoua Proverbios 16:31, ¿ken moneki tikinmitaskej tokniuan tlen yikipiaj miak xiuitl? (2) ¿Tlen tiknankiliskej?

 IJKUAK diamantes ayamo kinchipauaj amo petlanij nion motaj kualtsitsintin. Ik non, tla ikaj kinmitas amo kimatis kox diamantes.

² Tokniuan tlen yikipiaj miak xiuitl, se kualtsin tetliokolil yetoskia ken nonmej diamantes. Biblia kijtoua akinmej yokuaistayakej motaj kualtsitsintin (xiktlajtolti Proverbios 16:31; 20:29). Pero xamo oui tikinpatioitaskej. Telpokamej uan ichpokamej kinpaleuis miak tla kajsikamatij moneki kinpatioitaskej nonmej tokniuan. Itech nin tlamachtil tikinnankiliskej eyi tlajtlanilmej. ¿Tleka Jehová kinmita se tetliokolil tokniuan tlen yikipiaj miak xiuitl? ¿Tleka kinpatioitaj itech ialtepe Jehová? ¿Ken uelis noijki ijkon tikchiuaskej?

3. Ijkon ken kijtoua Salmo 92:12-15, ¿tleka Jehová kipatioita tlen kichiuaj tokniuan tlen yikipiaj miak xiuitl?

³ Jehová kinpatioita tokniuan tlen yikipiaj miak xiuitl. Kuali kinmixmati uan kinpatioita porque kipiaj kuali inyelis. Yolpaki porque kita kinmiluiaj telpokamej uan ichpokamej ken yokitekichiuilijkej (Job 12:12; Prov. 1:1-4). Noijki kinpatioita porque yotlaxikojkej miak xiuitl (Mal. 3:16). Maski yokipixkej miak ouijkayotl yokiteititijkej  nochipa tlaneltokaj itech Jehová. Axkan okachi kineltokaj tlen ye yokijto kichiuas. Uan Jehová kintlasojtla porque nochipa tetlapouiaj para oksekimej ma kixmatikan itoka (xiktlajtolti Salmo 92:12-15).

4. ¿Tlen kinyolchikauas tokniuan tlen yikipiaj miak xiuitl?

⁴ Tla tejuatsin yitikpia miak xiuitl, xikmato Jehová kilnamiki yotiktekichiuili miak xiuitl (Heb. 6:10). Nochipa titetlapouia ika pakilistli uan non kiyolpaktia Jehová. Yotikxiko miak tlamantli tlen omitsyolkoko, nochipa tikchiua tlen kijtoua Biblia, yotikchi miak tlamantli itech ialtepe Jehová uan yotikinmachti oksekimej. Timochijchikaua tikchiua ken ialtepe Jehová axkan kijtoua ma tikchiuakan. Noijki yotikinyolchika akinmej okachi kitekichiuiliaj Jehová. Ik non, ye mitstlasojtla uan amo keman mitskauas porque nochipa tiktlakamati uan nochipa mitspaleuis (Sal. 37:28). Maski yotikokoxkatik noso yotiueuejtik ye noijki mitsiluia nochipa mitsmaluis (Is. 46:4). Amo ximokuayejyeko ken yitikpia miak xiuitl, ayakmo ipati tlen tikchiua itech ialtepe Jehová. ¡Tlen tikchiua miak ipati!

5. ¿Tlen moneki kilnamikiskej tokniuan tlen yikipiaj miak xiuitl?

⁵ Tokniuan tlen yikipiaj miak xiuitl ok uelis tlapaleuiskej itech ialtepe Jehová. Maski ayakmo chikauakej, kimatij kichiuaskej miak tlamantli. Jehová ok uelis kinmakas tekitl. Nikan tikitaskej ken okinmakak tekitl sekimej itekipanojkauan tlen yokipiayaj miak xiuitl uan noijki tikitaskej axkan noijki kinmaka itekipanojkauan.

6, 7. Xikijto ken Jehová okinteochi sekimej itekipanojkauan tlen yokipiayaj miak xiuitl.

⁶ Biblia kijtoua sekimej itekipanojkauan Jehová maski yokipiayaj miak xiuitl nochipa okitekichiuilijkej. Ijkuak Moisés yokipiaya kanaj 80 xiuitl Jehová okichi profeta uan okinauati ma kinyekana israelitas. Okse itekipanojka omotokayotiaya Daniel, maski yokipiaya 90 xiuitl ok okatka iprofeta Jehová. Okse  okatka apóstol tlen omotokayotiaya Juan, ijkuak yokipiaya kanaj 90 xiuitl okijkuilo amochtli Apocalipsis.

⁷ Miakej itekipanojkauan Jehová amo okachi okinmixmatiayaj uan xamo oksekimej amo okipatioitayaj tlen yejuan okichiuayaj. Pero Jehová kema okipatioitak tlen yejuan okichijkej uan okinteochi porque nochipa okitekichiuilijkej. Ma tikitakan ken okichi. Itech Biblia amo okachi techtlapouia itech se tlakatl tlen omotokayotiaya Simeón. Ye okatka “yolmilajka iwa miak okimopantiaya Dios” uan ye kuali okixmatiaya, okikauili ma kita Jesús ijkuak okatka konetl uan okijto tlen kipanoskia ye uan inantsin (Luc. 2:22, 25-35). Noijki se profetisa tlen omotokayotiaya Ana uan okipiaya 84 xiuitl, oixpoliuik inamik, pero ye nochipa oyaya teokali. Uan Jehová okiteochi porque nochipa okitlakamatiaya, okikauili ma kita Jesús ijkuak okatka konetl. Jehová okintlasojtlaya Ana uan Simeón (Luc. 2:36-38).

8, 9. ¿Tlen kichiuaj tokniuan tlen oixpoliuik innamik?

⁸ Axkan miakej tokniuan yikipiaj miak xiuitl kitekichiuiliaj Jehová uan non uelis kinpaleuis telpokamej uan ichpokamej. Ma tikitakan tlen okichi se tokni tlen itoka Lois Didur. Ijkuak okipiaya 21 xiuitl omochi precursora especial ompa Canadá. Satepan ye uan inamik tlen omotokayotiaya John opejkej kintlajpalouaj tokniuan itech circuito. Noijki otlapaleuijkej kanaj 20 xiuitl itech Betel tlen kajki ompa Canadá. Ijkuak Lois okipiaya 58 xiuitl, ye uan inamik okinyolejkej ma tlapaleuitij altepetl Ucrania. ¿Tlen okichijkej? ¿Omokuayejyekojkej yokipiayaj miak xiuitl uan amo uelis ompa yaskiaj? Yejuan oyajkej, John okiluijkej tlapaleuiskia iuan akinmej otlayekanayaj itech kali Betel. Opanok chikome xiuitl uan oixpoliuik pero Louis ok ompa otlapaleui. Maski axkan yikipia 81 xiuitl ok kitekichiuilijtok Jehová ompa Betel tlen kajki Ucrania uan tokniuan tlen ompa tlapaleuiaj sapanoua kitlasojtlaj.

⁹ Xamo sekimej tokniuan yokinpanok ijkon ken Lois, oixpoliuik innamik uan amo okachi kinpatioitaj pero Jehová kema kinpatioita. Ijkon kichiua porque kimati miak xiuitl okipaleuijkej innamik ma kitekichiuilikan uan yejuan ok kitekichiuilijtokej (1 Tim. 5:3). Non kinyolchikaua telpokamej uan ichpokamej.

10. ¿Tlen techmachtia tlen okichi se tokni tlen itoka Tony?

¹⁰ Miakej tokniuan tlen katej inkalijtik maski yikipiaj miak xiuitl, yejuan se tetliokolil. Ma tikitakan tlen okichi se tokni tlen itoka Tony. Ijkuak okipiaya 20 xiuitl omoapolakti itech agosto 1942, ompa  Pensilvania Estados Unidos. Satepan ye amo okinek mochiuas soldado, ik non, ome xiuitl uan tlajko okitsakej. Ye uan isiua tlen omotokayotiaya Hilda okinmachtijkej inkoneuan tlen kijtoua Biblia. Tony miak xiuitl okinyekanaya tlayekankej uan noijki okatka tlayekanki itech circuito. Otlamachtiaya itech tlanechikol uan okintlapouiaya akinmej otsaktokaj. Maski Tony yikipia 98 xiuitl, mochijchikaua nochipa kitekichiuilis Jehová uan kinpaleuia tokniuan tlen inmiuan monechikoua.

11. ¿Ken uelis tikintlasojtlaskej tokniuan tlen yikipiaj miak xiuitl?

¹¹ ¿Ken uelis tikintlasojtlaskej tokniuan tlen katej inkalijtik uan yikipiaj miak xiuitl? Tlayekankej moneki mochijchikauskej kinpaleuiskej ma tetlapouikan, ma monechikokan noso ma kikakikan tlen ompa timomachtiaj. Tejuan noijki uelis tikintlajpalotiuij noso tikinnotsaskej ika videollamada. Moneki okachi ijkon tikchiuaskej iuan tokniuan tlen uejka chantij. Nochipa ma tikitakan ken tikinpaleuiskej. Sekimej tokniuan oui kitaj techtlapouiskej tlen kinpanoua noso mokuayejyekouaj amo kuali ijkon kichiuaskej. Pero techpaleuis tla tikinkakij ijkuak techiluiskej ken sapanoua yolpakij yokitekichiuilijkej Jehová.

12. ¿Tlen uelis tikmatiskej itech tokniuan tlen inmiuan timonechikouaj?

¹² Xamo kanin timonechikouaj katej tokniuan tlen yikipiaj miak xiuitl kitekichiuiliaj Jehová. Se tokni siuatl tlen chanti Estados Unidos uan itoka Harriette, yimiak xiuitl yokitekichiuili Jehová kanin omonechikouaya ompa Nueva Jersey. Satepan ochantito iuan ichpoch uan ompa opejki monechikoua. Tokniuan opejkej iuan mouikaj uan okitakej ken se tetliokolil. Ye okinyolchika nonmej tokniuan porque okintlapoui ken opejki momachtia Biblia kanaj itech 1925. Ijkuakon otetlapouiaya uan nochipa okiuikaya icepillo tlen ika omotlanpakaya porque omokuayejyekouaya xamo uelis kitsakuaskiaj. Itech 1933 ome uelta se semana okitsakej. Ijkuakon inamik amo okatka iTlaixpantijka Jehová pero okipaleui, okinmalui eyi ikoneuan. Ijkon ken Harriette, tokniuan tlen yikipiaj miak xiuitl uan yokitekichiuilijkej Jehová moneki tikinpatioitaskej.

13. ¿Tlen techmachtia ialtepe Jehová kinpatioita tokniuan tlen yikipiaj miak xiuitl?

¹³ Ialtepe Jehová kinpatioita tokniuan tlen yikipiaj miak xiuitl. Yokitakej Jehová sapanoua yokiteochi yejuan uan ialtepe. Maski omotlapololtijkej itech seki tlamantli non okinmachti uan ayakmo ijkon okichijkej. Ik non, ma tikinmitakan yejuan ixtlamatkej uan ma tikitakan ken techpaleuis tlen yejuan okichijkej (Prov. 18:4). Tla okachi tikinmixmatij, uelis timomachtiskej miak tlamantli uan okachi titlaneltokaskej itech Jehová.

14. Ijkon ken kijtoua Deuteronomio 32:7, ¿tlen moneki kichiuaskej telpokamej uan ichpokamej?

¹⁴ Ma timotlapouikan iuan tokniuan tlen yikipiaj miak xiuitl (xiktlajtolti Deuteronomio 32:7). Xamo ayakmo okachi tlachiaj, yolik nejnemij uan ayakmo chikauak tlajtouaj. Pero ok mochijchikauaj kitekichiuiliskej Jehová uan yokichijkej tlen ye kipaktia (Ecl. 7:1). Ma tikilnamiktokan tleka Jehová kinpatioitaj uan noijki ma tikintlakaitakan.  Ma tikchiuakan ijkon ken Eliseo. Ijkuak okatka iuan Elías okilui iuan yetoskia uan eyi uelta okilui: “Amo nimitskauas” (2 Rey. 2:2, 4, 6).

15. ¿Tlen uelis tikintlajtlaniskej tokniuan tlen yikipiaj miak xiuitl?

¹⁵ Ma tikteititikan techtekipachouaj tokniuan tlen yikipiaj miak xiuitl ijkuak itlaj tikintlajtlaniskej (Prov. 1:5; 20:5; 1 Tim. 5:1, 2). Ma tikijtokan tikintlajtlaniaj: “Ijkuak tejuatsin ayamo otikpiaya miak xiuitl, ¿tlen omitspaleui xikneltoka tlen kijtoua Biblia?”, “¿tlen yomitspaleui okachi ximouika iuan Jehová?”, “¿tlen yomitspaleui xiyolpaki tiktekichiuilis Jehová?” (1 Tim. 6:6-8). Satepan kuali ma tikkakikan tlen techiluiskej.

16. ¿Ken kinpaleuia telpokamej uan ichpokamej uan tokniuan tlen yikipiaj miak xiuitl ijkuak motlapouiaj?

¹⁶ Ijkuak telpokamej uan ichpokamej motlapouiaj iuan tokniuan tlen yikipiaj miak xiuitl ome moyolchikauaj (Rom. 1:12). Ijkon telpokamej uan ichpokamej okachi kineltokaskej Jehová nochipa kinmaluia itekipanojkauan. Tokniuan tlen yikipiaj miak xiuitl kitaskej melauak kintlasojtlaj uan non kinpaleuis ma kijtokan ken yokinpaleui Jehová.

17. ¿Tleka tikijtouaj Jehová kinmita okachi kualtsitsintin tokniuan tlen yikipiaj miak xiuitl?

¹⁷ Maski tokniuan yokokoxkatikej Jehová okachi kinmita okachi kualtsitsintin ijkuak panoua okachi xiuitl (1 Tes. 1:2, 3). ¿Tleka ijkon tikijtouaj? Porque miak xiuitl yokikauilijkej ma kinyekana Jehová uan ma kinyektlali. Ik non, ijkuak okachi tikinmixmatij, okachi timomachtiaj miak tlamantli uan ijkon techpaleuia ma tikinmitakan ken se kualtsin tetliokolil.

18. ¿Tlen tikitaskej itech okse tlamachtil?

¹⁸ Tokniuan tlen inmiuan timonechikouaj okachi moyolchikauaj ijkuak kinmitaj telpokamej uan ichpokamej kinpatioitaj tokniuan tlen yikipiaj miak xiuitl uan noijki ijkuak yejuan kinpatioitaj. Itech okse tlamachtil tikitaskej ken uelis tokniuan tlen yikipiaj miak xiuitl kinpatioitaskej telpokamej uan ichpokamej tlen inmiuan monechikouaj.