1. ¿Tleka Pablo okinmilui tokniuan hebreos okachi omonekiaya moyolchikauaskej?

AXKAN okachi moneki timoyolchikauaskej. ¿Tleka? Ijkuak tlatitlanil Pablo okintlajkuilili hebreos okinmilui: “Matiktemolikah kenijki timosepampapalewiskeh, matimotlasojtlakah iwa matikchiwakah tlan kuali. Yika, nochipa matimololokah iwan oksikimeh tokniwah, amo matikchiwakah kemi sikimeh yomomatkeh amo kinekih mololoskeh. Tejwah moneki matimosepanyolchikawakah, iwa axa okachi por ya tikitah n tonati ijkuak Toteko wits ya walajsi” (Heb. 10:24, 25). Makuili xiuitl satepan kitaskiaj iueyi tonal Jehová ualaskia ipan Jerusalén. Ijkuakon okajsikamatkej tlen okijto Jesús omochijtoka uan omonekiaya choloskej (Hech. 2:19, 20; Luc. 21:20-22). Itech xiuitl 70 romanos okipojpolojkej Jerusalén.

2. ¿Tleka moneki tikmatiskej keman tikinyolchikauaskej tokniuan?

 ² Axkan noijki ijkon techpanotok porque yiuits iueyi tonal Jehová tlen temomojti (Joel 2:11). Noijki tlen okijto Sofonías axkan panotok: “Iueyi tonal Jehová amo uejka kajki. Amo uejka kajki uan sapanoa totoka uits” (Sof. 1:14). Ik non, Pablo techiluia: “Matiktemolikah kenijki timosepampapalewiskeh, matimotlasojtlakah iwa matikchiwakah tlan kuali” (Heb. 10:24). Nin kijtosneki para ijkon tikchiuaskej moneki tikmatiskej keman tikinyolchikauaskej tokniuan.

3. ¿Tlen okichi Pablo ijkuak okijto ma titeyolchikauakan? (Xikita dibujo kanin peua tlamachtil).

³ Biblia kijtoa: “Tlen kineki se tlakatl non tlen kitekipachojtok, pero se kuali tlajtoli non tlen kiyolchikaua” (Prov. 12:25). Ik non, ualeua moneki ikaj ma techyolchikaua. Pablo okijto akin teyolchikaua noijki moneki ma kiyolchikauakan. Akinmej ochantiayaj Roma okintlajkuilili: “Nikneki nomechitas iwa nomechtiochiwas ika n Espíritu para ijkó okachi ximochikawakah. Ijkí nomechilia para matimoyolchikawakah tosepah itech totlaneltokalis non tiksepampixtokeh” (Rom. 1:11, 12). Ken tikitaj hasta Pablo noijki omonekiaya ma kiyolchikauakan (xiktlajtolti Romanos 15:30-32).

4, 5. ¿Akinmej moneki tikinyolchikauaskej uan tleka?

⁴ Moneki tikinyolchikauaskej akinmej mochijchikauaj kitekichiuiliskej Jehová. Ken tokniuan precursores, misioneros, betelitas, tlayekankej itech circuito uan insiuauan uan tokniuan tlen tlajtolkuepaj desde inmialtepe. Nochtin ninmej tokniuan moneki tikinyolchikauaskej. Noijki ma tikinyolchikauakan tokniuan tlen okachi omochijchikajkej okitekichiuilijkej Jehová uan axkan ayakmo uelij.

⁵ ¿Akinmej noijki moneki tikinyolchikauaskej? Tokniuan tlen ayamo monamiktiaj porque yejuan kitlakamatij itlanauatil Jehová para monamiktiskej iuan akin “kineltoka Toteko Dios” (1 Cor. 7:39). Tlakamej xikinmiluikan namosiuauan nankintlasojtlaj uan xikintlasojkamatilikan nochi tlen kichiuaj (Prov. 31:28, 31). Uan amo ma tikilkauakan moneki tikinyolchikauaskej tokniuan yolmelajkej tlen kintojtokaj noso mokokoaj (2 Tes. 1:3-5). Jehová uan Jesús kinyolchikauaj nochtin ninmej tokniuan yolmelajkej (xiktlajtolti 2 Tesalonicenses 2:16, 17).

6. Ijkon ken kijtoa Isaías 32:1, 2, ¿tlen tekitl kipiaj tlayekankej?

⁶ (Xiktlajtolti Isaías 32:1, 2). Axkan tikixnamikij miak ouijkayotl, ik non, timoyolkokoaj noso tisotlauaj. Jesucristo para techyolchikauas kintekitiltia tokniuan tlapejpenalmej uan tlayekankej. Uan tlayekankej ‘amo kinekih technajnawatiskeh kenomi tikpiaskeh tlaneltokálistli’. Yejuan kinekij techpaleuiskej ma tiyolpakikan uan ma tiyetokan tiyolmelajkej (2 Cor. 1:24).

7, 8. ¿Ken teyolchikauaskej tlayekankej?

⁷ Tlayekankej kinpaleuis tla kichiuaskej ken Pablo okichi. Ye okintlajkuilili tokniuan tlen ochantiayaj Tesalónica uan okintojtokayaj: “Kemi satlawel tomechtlasojtlah, yika otiknekiah tomechmaktiliskeh amo sanwel itlajtol Dios, yej asta toyolilis. ¡Porke satlawel tomechtlasojtlah!” (1 Tes. 2:8).

⁸ Pablo amo san okijto moneki titeyolchikauaskej. Okinmilui tokniuan tlen  otlayekanayaj Éfeso tlen omonekiaya kichiuaskej: “Moneki nankinpaleuiskej akinmej moneki ma kinpaleuikan, uan moneki nankilnamiktoskej tlen okijto toTeko Jesús, ijkuak okijto: ‘Okachi yolpaki akin itlaj kitemaka uan amo akin kiselia’” (Hech. 20:35, TNM). Pablo amo san oteyolchikauaya ika tlen okijtoaya noijki okitechiuiliaya okseki tlamantli (2 Cor. 12:15). Noijki tlayekankej amo san ma teyolchikauakan ika tlen kijtoaj, moneki kiteititiskej melauak motekipachoaj intech oksekimej (1 Cor. 14:3).

9. ¿Tlen kinpaleuis tlayekankej kuali ma teyolchikauakan?

⁹ Para kinyolchikauaskej tokniuan, ualeua moneki kinnojnotsaskej noso kinyektlaliskej. Tla kinekij kuali teyolchikauaskej moneki kilnamiktoskej tlen tlamachtia Biblia. Ijkuak okiyolitijkej Jesús ijkon okinyektlali seki tlanechikolmej tlen okatkaj Asia Menor. Uan tlanechikol Éfeso, Pérgamo uan Tiatira achto okinyolchika uan satepan okinyektlali (Apoc. 2:1-5, 12, 13, 18, 19). Tlanechikol Laodicea okilui: “Akimeh Ne nikintlasojtla, nikinnonotsa iwa nikintlaijyowiltia. Yika, ximochijchikawa techweyili ika nochi moyolo, iwa ximoyolpatla nonawak” (Apoc. 3:19). Tlayekankej noijki ijkon kichiuaj ijkuak technojnotsaj noso techyektlaliaj.

10. ¿Ken uelis tinochtin timoyolchikauaskej?

¹⁰ Amo san tlayekankej moneki teyolchikauaskej. Pablo otechnauati tinochtin akinmej tikchiuaj ken Cristo ‘yej matikktenewakah kuali tlájtoli tlan ika kinyolchikawas, kimpalewis iwa kintiochiwas akimeh kikakih non tlájtoli’ (Efes. 4:29). Tinochtin ma timotekipachokan intech tokniuan uan ma tikitakan tlen kinpoloa. Pablo okinmilui tokniuan hebreos: “Xikonanakah chikawálistli, nomomawah amo san machapantokah, iwa nomokxiwah amo san makuijkuitlaxiwikah. Xiktemokah  n ojtli milaktik. Ijkó, nomokxi non omonekuilo, pajtis iwa ayakmó oksepa monekuilos” (Heb. 12:12, 13). Noijki telpokamej uan ichpokamej uelis kinyolchikauaskej tokniuan.

11. ¿Ken okipaleuijkej se tokni ijkuak omoyolkokoaya?

¹¹ Ma tikitakan tlen okipanok tokni Marthe, * ye omoyolkokoaya. Uan okijkuilo: “Se tonal oniktlatlaujtijtoka Jehová ma nechpaleui uan satepan oniknamik se tokni tlen yokipiaya miak xiuitl. Ijkuakon okiteititi onechtlasojtlaya uan onechiknomatki. Noijki onechilui ijkon okipanok uan ayakmo noselti onimomachili”. Xamo tokni tlen yokipiaya miak xiuitl amo omokuayejyeko ken sapanoa okipaleui tlen okilui Marthe.

12, 13. ¿Ken tiktlakamatiskej Filipenses 2:1-4?

¹² Pablo okinnojnotski tokniuan tlen okatkaj itech tlanechikol Filipos: “Tla Cristo nomechyolchikajtok, tla itlasojtlalis nomechyolsewia, tla Iespíritu nomechyakantinemi, tla milák nontetlasojtlah iwa nonteiknomatih, xikchiwakah maniyolpaki. Ximoyekwikakah non nochteh. Ximosepantlasojtlakah, iwa ximokuanamikikah keman itla nonkichiwaskeh. Amitla xikchiwakah san por aka nonkinekih nonkixpanawiskeh, noso para manomechweyilikah, yej ximoiknomatikah tenawak, iwa xikinmitakah n oksikimeh kemi okachi weyijkatitokeh. Amaka makimotemoli san tlan ye kipalewia, yej makitemo tlan ika weletis kimpalewis oksikimeh” (Filip. 2:1-4).

¹³ Tlen okijto Pablo techmachtia moneki tikitaskej keman moneki tikinyolchikauaskej tokniuan. Uan ijkon tikchiuaskej tla tikintlasojtlaj, tikinmiknomatij uan tla timotlapouiaj itech totlaneltokilis.

14. ¿Ken titeyolchikauaskej?

¹⁴ Tiyolpakij ijkuak tikmatij akinmej yiuejkika otikinpaleuijkej axkan ok kitekichiuilijtokej Jehová. Tlatitlanil Juan okijkuilo: “Amo nikpia okachi pakílistli, keman nikkaki nopilwah kitlakitah itlamachtilis Dios” (3 Juan 4). Miakej precursores kijtoaj kinyolchikaua ijkuak akin okimachtijkej ok kitekichiuilijtok Jehová noso noijki omochi precursor. Tla tiknekij tikpaleuiskej se precursor, moneki ma tikilnamiktikan ken okinpaleui oksekimej.

15. ¿Ken tikinyolchikauaskej akinmej okachi kitekichiuiliaj Jehová ika yolmelajkayotl?

¹⁵ Miakej tlayekankej itech circuito uan insiuauan kijtoaj kuali momachiliaj ijkuak kinmakaj se amatsintli kanin kijtoa kintlasojkamatiliaj porque okitlajpalotoj se tlanechikol. Noijki ijkon momachiliaj tlayekankej, misioneros, precursores uan betelitas ijkuak tikintlasojkamatiliaj kitekichiuiliaj Jehová ika yolmelajkayotl.

16. ¿Moneki tikchiuaskej miak tlamantli para titeyolchikauaskej?

¹⁶ Tla amo okachi titlajtoaj, amo ma timokuayejyekokan amo uelis tikinyolchikauaskej tokniuan. Amo ma timotekipachokan porque amo oui tikinyolchikauaskej. Ma tiixuetskatokan ijkuak tikintlajpaloaj tokniuan. Tla yejuan amo ixuetskaj xamo itlaj kintekipachojtok noso moneki ikaj iuan motlapouiskej. Kuali momachiliskej tla tikinkakiskej (Sant. 1:19).

17. ¿Ken okipaleuijkej Henri?

¹⁷ Ma tikitakan tlen okipanok se telpochtli itoka Henri. Sapanoa omoyolkokoaya  porque sekimej ikalchanejkauan ayakmo okitekichiuiliayaj Jehová ken itajtsin akin okatka tlayekanki uan nochtin okitlakaitayaj. Se tlayekanki itech circuito okinekiaya kiyolchikauas Henri, ik non, okonitoj café uan okikak ijkuak opejki kitlapouia ken omomachiliaya. Henri okajsikamatki tla okinekiaya ma mokuepakan iuan Jehová, omonekiaya yetos yolmelajki ixpan Jehová. Noijki okipaleui tlen kijtoa Salmo 46, Sofonías 3:17 uan Marcos 10:29, 30.

18. (1) ¿Tlen okijto ueyi tekiua Salomón? (2) ¿Tlen okijto Pablo ma tikchiuakan?

¹⁸ ¿Tlen techmachtia tlen okipanok Marthe uan Henri? Tinochtin uelis titeyolchikauaskej ijkuak moneki. Ueyi tekiua Salomón okijkuilo: “Ijkuak moijtoa se tlajtoli ijkuak moneki, ¡melauak teyolchikaua!”. Noijki okijto: “Teyolpakti akin petlantokej ixtololouan uan se kuali tlajtoli teyolchikaua” (Prov. 15:23, 30). Tla tikitaj ikaj moyolkokoa, ¿ken tikyolchikauaskej? Ma tiktlajtoltilikan se revista Akin Tetlapouijtok noso tlen tikpiaj itech jw.org. Noijki Pablo okijkuilo: “Ximosepannonotsakah iwa ximosepanyekuikakah ika kuali ixtlamatílistli. Xiktlakuikilikah Dios ika nochi nomoyolo ika salmos iwa ika tlakuíkalteh non kiweyiliah, iwa ika tlakuíkalteh non tlatiochiwah” (Col. 3:16; Hech. 16:25). Tejuan noijki kuali timomachiliskej tla tiktlakuikiliskej Jehová ken okichi Pablo.

19. ¿Tleka axkan okachi moneki ma timoyolchikauakan uan ken tikchiuaskej?

¹⁹ Axkan ok tikchixtokej iueyi tonal Jehová, ik non, moneki ma timoyolchikauakan (Heb. 10:25). Noijki ma tiktlakamatikan tlen otechnejmachti Pablo ijkuak okijto: “Ximosepanyolchikawakah iwa ximochikawakah ijkó kemi ya nonkichijtiwitseh” (1 Tes. 5:11).