1, 2. (1) ¿Tleka akinmej ochantiayaj Roma okintekipachoaya tlakeualmej uan ken otlanauatiayaj? (2) ¿Tlen okinmilui ikniuan Pablo?

AKINMEJ ochantiayaj Roma omoueyinekiayaj porque okijtoayaj okintlakamatiayaj tlanauatilmej uan okichiuayaj nochi ika melajkayotl. Pero nochi tlen okipiayaj itech inmialtepe, okipiayaj porque okinchiualtiayaj oksekimej ma tekipanokan. Itech nochi altepetl okinpixkej kanaj 30% tlakeualmej. Akinmej ompa ochantiayaj okintekipachoaya tlakeualmej uan ken otlanauatiayaj. Hasta noijki akinmej okichiuayaj ken Cristo okintekipachoaya non tlamantli.

² Tlatitlanil Pablo noijki okijkuilo tlen kijtosneki tikchiuaskej miak tlamantli. Pero ye amo okinekiaya kinpatlas itlanauatiluan tekiuajkej ken miakej okinekiayaj kichiuaskej. Pablo uan oksekimej omochijchikauayaj kinpaleuiskej oksekimej  ma kimatikan iTekiuajkayo toTajtsin Dios uan ma kajsikamatikan tleka topatka omikik Jesús. Okinmilui ikniuan ken okachi yolpakiskiaj. Pablo okijto itech segunda a los Corintios: “Porke n Toteko Ye n Espíritu, iwa kan kajki Iespíritu Toteko ayakmó tiilpitos itech tlajtlákoli” (2 Cor. 3:17).

3. ¿Tlen achto okijto Pablo ijkuak okijkuilo 2 Corintios 3:17?

³ Itech non carta Pablo okijto tlen okipanok Moisés ijkuak okatka ixpan se iángel Jehová ompa itech tepetl Sinaí. Moisés oixpetlantoka. Ijkuak israelitas okitakej, omomojtijkej, ik non, Moisés omoixtlakenti (Éx. 34:29, 30, 33; 2 Cor. 3:7, 13). Pablo okiyekijto ijkuak ikaj mokuepa iuan Jehová yetoskia ken ayakmo ixkimilitok (2 Cor. 3:16). ¿Tlen okinekiaya kijtos?

4. ¿Tleka moneki timouikaskej iuan Jehová?

⁴ Ken otimomachtijkej yichikome, Jehová ye nochi ueli kichiua uan okichijchi nochi tlen onka. Ik non, kanin ye kajki ueli kichiua tlen ye kineki uan noijki kanin kajki iespíritu santo. Uan para tikchiuaskej miak tlamantli moneki timokuepaskej iuan Jehová. Nin kijtosneki iuan timouikaskej. Ijkuak israelitas okatkaj kanin tlauaki amo omokuayejyekojkej ken Jehová. Uelis tikijtoskej inkuayejyekol okatka ken kimilitok uan noijki inyolo. Ik non, san okichiuayaj tlen okinekiayaj (Heb. 3:8-10).

5. (1) ¿Tlen techkauilia ma tikchiuakan iespíritu Jehová? (2) ¿Ken techpaleuia iespíritu Jehová maski titsaktoskej noso techchiualtiskej ma titekitikan ken tlakeualmej? (3) ¿Tlen timomachtiskej?

⁵ Iespíritu Jehová melauak techmakixtia amo ken itlanauatiluan tekiuajkej. Iespíritu Jehová techmakixtia itech tlajtlakoli, mikilistli uan noijki ayakmo techkajkayauaj ika tlaneltokalistli tlen amo melauak uan okseki tlamantli tlen amo kipaktia toTajtsin Dios (Rom. 6:23; 8:2). Uan nin okachi ipati uan techpaleuia. Maski techtsakuaskej noso techchiualtiskej ma titekitikan ken tlakeualmej (Gén. 39:20-23). Ijkon okipanok tokni Harold King ye uejkika otsaktoka porque okitekichiuiliaya Jehová. Uelis tikitas tlen okipanok itech JW Broadcasting kanin kijtoa (VIDEOS > TOKNIUAN KINTLAJTLANIAJ UAN KIJTOAJ TLEN OKINPANOK > KIXNAMIKIJ OUIJKAYOTL). Pero axkan timomachtiskej, ¿ken tikteititiskej tikpatioitaj Jehová techkauilia ma tikchiuakan tlen tiknekij uan ken kuali tikpejpenaskej tlen tikchiuaj?

6. ¿Ken okiteititijkej israelitas amo okipatioitayaj kiueyichiuaskej Jehová?

⁶ Ijkuak ikaj techtliokolia itlaj tlen tikpatioitaj melauak timotlasojkamatij. Ma tikilnamikikan Jehová okinkauili israelitas ma kichiuakan miak tlamantli ijkuak okinkixti Egipto. ¿Pero omotlasojkamatkej? Ijkuak opanok seki metstli, opejki kilnamikij tlen okikuayaj Egipto uan ayakmo okinpaktiaya tlen Jehová okinmakaya. Okinekiayaj mokuepaskej Egipto. Okachi okipatioitayaj kinkuaskej michimej, pepinos, sandías, xonakatl uan ajos uan amo okipatioitayaj kiueyichiuaskej  Jehová. Ik non, okikualanijkej Jehová (Núm. 11:5, 6, 10; 14:3, 4). ¿Amo melauak techmachtia itlaj miak ipati?

7. (1) ¿Ken okichi Pablo tlen okijto itech 2 Corintios 6:1? (2) ¿Ken noijki ijkon tikchiuaskej?

⁷ Tlatitlanil Pablo okinmilui tokniuan ma kipatioitakan Jehová okinkauiliaya ma kichiuakan miak tlamantli porque okitemakak iKone (xiktlajtolti 2 Corintios 6:1, TNM). Ma tikilnamikikan Pablo amo kuali omomachiliaya porque okitlajyouiltiaya tlajtlakoli. Pero ye okichi tlen okijto: “Sanwel Dios weleti ika tlan Cristo Jesús okichiwako. ¡Niktlasojkamati Dios!”. ¿Tleka? Okiyekijto: “Porke itlanawatilis n Espíritu non kitemaka yolílistli por Cristo Jesús onechmakixti imak iweletilis n tlajtlákoli iwa imak iweletilis n mikílistli” (Rom. 7:24, 25; 8:2). Tejuan noijki ma tikpatioitakan Jehová yotechmakixti itech tlajtlakoli uan mikilistli. Uan Jesús otechtlaxtla, ik non, tikueyichiuaj Jehová uan noijki tikpiaj chipauak totlalnamikilis (Sal. 40:8).

8, 9. (1) ¿Tlen okijto Pedro? (2) ¿Tlen kixnamikij telpokamej uan ichpokamej?

⁸ Amo san tiktlasojkamatiliskej Jehová techkauilia ma tikchiuakan tlen tiknekij, noijki moneki kuali tikpejpenaskej tlen tikchiuaskej. Tlatitlanil Pedro otechilui Jehová techkauilia ma tikchiuakan tlen tiknekij pero non amo kijtosneki tikchiuaskej tlen amo kuali (xiktlajtolti 1 Pedro 2:16). Nin techilnamiktia tlen okichijkej israelitas ijkuak okatkaj kanin tlauaki. Tlen okijto Pedro ok techpaleuia. Noijki Satanás uan nochi tlen kiyekana kichiuaj miak tlamantli ma mota kualtsin ken tlakemitl, tlakuali uan tlen ika timoyolpaktiaj. Akinmej tlanemakaj kintekitiltiaj akinmej motaj kuajkualtsitsintin para ma tikneltokakan moneki timotlakouiskej maski amo melauak. Amo oui techkajkayauaskej tla amo timomaluiskej.

⁹ Tlen okijto Pedro noijki techpaleuia itech tonemilis ijkuak tikpejpenaskej kox timomachtiskej noso tlen tekitl tikseliskej. Ma tikilnamikikan telpokamej uan ichpokamej kinmiluiaj ma momachtikan universidad. Kinmiluiaj tla ompa momachtiskej okachi kuali tekitl kipiaskej uan kitlaniskej miak tomin. Uan kinmititiaj kech kitlanij akinmej momachtiaj universidad uan akinmej amo. Uan non kinyoltilana ijkuak moneki kipejpenaskej tlen kichiuaskej. ¿Pero tlen moneki kilnamikiskej yejuan uan intatajuan?

10. ¿Tlen moneki ma tikilnamiktokan ijkuak itlaj tikpejpenaskej?

¹⁰ Xamo sekimej kijtoskej yejuan inteki kipejpenaskej tlen kinekij kichiuaskej tla intlalnamikilis amo kinkuejsoa. Xamo mokuayejyekoaj tlen okinmilui Pablo tokniuan Corintios ijkuak okipejpenayaj tlen tlakuali kikuaskiaj: “¿Tleka amo niweleti nikchiwa tlan ne nikmolia kuali ka, san por ok se kiyejyekolia amokuali?” (1 Cor. 10:29). Maski melauak tejuan tikpejpenaskej tlen timomachtiskej noso tlen tikchiuaskej itech tonemilis, moneki tikilnamiktoskej amo uelis nochi tikchiuaskej tlen tiknekij uan titlajyouiskej tla amo kuali tikpejpenaj tlen tikchiuaj. Ik non, Pablo okijto: “Weletis tikchiwaskeh san tlan tejwah tiknekiskeh pero amo techpalewis para okachi mamochikawa  totlaneltokalis” (1 Cor. 10:23). Ik non, maski tejuan tikpejpenaj tlen tikchiuaskej, amo kijtosneki okachi miak ipati tlen tiknekij.

11. ¿Tleka otechmakixti Jehová?

¹¹ Ijkuak Pedro okijto kuali ma tikpejpenakan tlen tikchiuaskej noijki okijto ken tikpejpenaskej para tiktekichiuiliskej toTajtsin Dios. Uan Jehová yotechmakixti ika imikilis Jesús para ijkon ma tiktekichiuilikan itech nochi tonemilis.

12. ¿Ken techpaleuia tlen okichi Noé uan ikalchanejkauan?

¹² ¿Tlen techpaleuis kuali ma tikpejpenakan tlen tikchiuaskej uan amo ma techyoltilana tlen kiyekana Satanás? Nochipa ma tiktekichiuilijtokan Jehová (Gál. 5:16). Ma tikitakan tlen okipanok Noé uan ikalchanejkauan. Yejuan okatkaj ijkuak miakej sapanoa oauilnemiayaj uan omoteuiayaj pero yejuan amo ijkon okichijkej. ¿Tlen okinpaleui? Okitlakamatkej Jehová ijkuak okinnauati ma kichijchiuakan akali, ma kololokan tlakuali tlen yejuan kikuaskiaj uan para yolkamej. Noijki omonekiaya kinmiluiskej oksekimej atemiskia tlaltikpak. Biblia kijtoa: “Noé okichi nochi tlen okinauati toTajtsin Dios. Ijkon melauak okichi” (Gén. 6:22). Ijkon Noé uan ikalchanejkauan okinmakixtijkej (Heb. 11:7).

13. ¿Tlen otechnauati Jehová ma tikchiuakan?

¹³ ¿Tlen otechnauati Jehová? Akinmej tikchiuaj ken Cristo kuali tikmatij otechnauatijkej ma titetlapouikan (xiktlajtolti Lucas 4:18, 19). Axkan miakej yetoskia ken ixkimilitokej porque Satanás kinkajkayaua ika tlaneltokalistli tlen amo melauak, tomin uan noijki kichiua ma kinekikan ma kinselikan kanin chantij (2 Cor. 4:4). Pero tejuan tikchiuaj ken Jesús okichiuaya noijki tikinpaleuiaj oksekimej  ma kixmatikan Jehová uan ma kitekichiuilikan (Mat. 28:19, 20, TNM). Nin tekitl oui uan miak tlamantli tikixnamikij. Itech seki altepemej miakej kualanij porque amo kinekij kikakiskej iTlajtol toTajtsin Dios. Ik non, ma timotlajtlanikan: “¿Nikpejpenas okachi niktekichiuilis Jehová?”.

14, 15. ¿Tlen yokichijkej miakej tokniuan? (Xikinmita fotos kanin peua tlamachtil).

¹⁴ Sapanoa timoyolchikauaj porque miakej tokniuan yokajsikamatkej yitlamis tlen amo kuali. Ik non, yokikajkej miak tlamantli uan kitekichiuiliaj Jehová ken precursores (1 Cor. 9:19, 23). Sekimej tlapaleuiaj itech intlanechikol uan oksekimej oyajkej kanin okachi moneki tetlapouiskej. Tiknekij timechiluiskej makuili xiuitl tlen yopanok, kanaj 250,000 (doscientos cincuenta mil) tokniuan omochijkej precursores. Uan axkan katej kanaj 1,100,000 (un millón cien mil) precursores. Melauak kuali okipejpenkej kitekichiuiliskej Jehová (Sal. 110:3).

¹⁵ ¿Tlen kinpaleuia tokniuan ijkon ma kichiuakan? Ma tikitakan tlen okichi tokni John uan Judith. Yikanaj treinta xiuitl kitekichiuilijtokej Jehová itech miakej altepemej. Yejuan kilnamikij itech 1977 opejki tlamachtil tlen kiseliaj precursores uan yokinmiluiayaj ma tetlapouitij kanin okachi omonekiaya. John okijto miak uelta okipatlak kanin otekipanoaya para kipias tlen ika mopanoltis uan ijkon okachi tetlapouiskia. Satepan otetlapouitoj itech okse altepetl. ¿Tlen okinpaleui ma momachtikan okse tlajtoli uan ma momatikan? Okitlatlaujtijkej Jehová uan otlaneltokayaj kinpaleuiskia. ¿Ken momachiliaj axkan? John okijto: “Nikita nin tekitl tlen okachi kuali nikchiuaskia. Axkan okachi nimouika iuan Jehová uan nikita ken se teta tlen tetlasojtla. Axkan okachi nikajsikamati tlen kijtosneki Santiago 4:8: ‘Xiwalmijkuanikah [noso ximotokikan] inawak Dios, iwa Ye mijkuanis [noso motokis] nomonawak’. Axkan melauak niyolpaki”.

16. ¿Tlen okichijkej sekimej tokniuan?

¹⁶ Sekimej tokniuan amo miak xiuitl kitekichiuiliaj Jehová ken precursores. Oksekimej ika nochi inyolo yauij kinchijchiuatiuij kalmej kanin monechikoskej tokniuan. Ompa Warwick (Nueva York) otekipanotoj kanaj 27,000 tokniuan. Sekimej otlapaleuitoj kaxtoli tonal, san seki metstli, sekimej se xiuitl noso okachi. Miak tlamantli okikajkej uan otekipanotoj Warwick. Melauak kuali okipejpenkej kiueyichiuaskej Jehová.

17. ¿Tlen techiluia Jehová kichiuas tla kuali tikpejpenaj tlen tikchiuaskej?

¹⁷ Tiktlasojkamatiliaj Jehová porque tikixmatij uan tiyolpakij techkauilia ma tikueyichiuakan. Ijkuak itlaj tikpejpenaskej, ma tikteititikan tikpatioitaj Jehová techkauilia ma tikchiuakan tlen tiknekij. Ma tikpejpenakan tiktekichiuiliskej uan amo ma tikchiuakan tlen amo kuali. Tla ijkon tikchiuaskej, tikseliskej tlateochiualistli tlen ye yokijto: “Porke ajsiki n tonati ijkuak nochi tlan onka itech nin tlaltíkpaktli momakixtis, iwa ayakmó ijtlakawis. Ijkuakó momakixtiskeh ipilwah n Dios iwa ijkó sansikah kipiaskeh weyílistli” (Rom. 8:21).