TLAMACHTIL 17
Jehová techpaleuia ma tikinmixnamikikan amo kuali ejekamej
“Amo timotekilmakatokeh iwan tlakah non kipiah inmesso kemi tejwah, yej iwan espíritus amokualteh non nemih tlakpak, iwa kipiah weletílistli” (EFES. 6:12).
TLAKUIKALI 55 Amo xikinmauili, ¡ne nimitsmaluis!
XIKILNAMIKTO *
1. Ijkon ken kijtoa Efesios 6:10-13, xikijto ken kiteititia Jehová techtlasojtla.
JEHOVÁ kiteititia techtlasojtla porque techpaleuia ma tikinmixnamikikan akinmej techkokoliaj. Techkokolia Satanás uan amo kuali ejekamej. Jehová technejmachtia amo kuali ejekamej tetlajyouiltiaj uan noijki techpaleuia ma tikinmixnamikikan (xiktlajtolti Efesios 6:10-13). Uelis tikinmixnamikiskej tla tikkauiliaj Jehová ma techpaleui uan itech titlaneltokaj. Ma tikijtokan ken tlatitlanil Pablo: “Tla Dios kajki towah, ¿akin weletis itla techtoktis?” (Rom. 8:31).
2. ¿Tlen timomachtiskej?
2 Tejuan akinmej tikchiuaj ken Cristo amo sapanoa techtekipachoa tlen kichiua Satanás uan amo kuali ejekamej. Okachi tiknekij ma techmachti Jehová uan tiknekij tiktekichiuiliskej (Sal. 25:5). Pero moneki tikmatiskej ken tlakajkayaua Satanás. Tla tikmatiskej, amo uelis techkajkayauas (2 Cor. 2:11). Itech nin tlamachtil tikitaskej tlen kitekitiltia Satanás uan amo kuali ejekamej para tlakajkayauaskej. Noijki tikitaskej ken uelis tikintlaniliskej.
¿KEN TLAKAJKAYAUA SATANÁS UAN AMO KUALI EJEKAMEJ?
3. ¿Tlen tlamantli poui itech naualotl?
3 Satanás uan amo kuali ejekamej tlakajkayauaj ika naualotl. Akinmej kichiuaj naualotl kijtoaj kichiuaj miak tlamantli. Sekimej kijtoaj tlachixkej porque kimatij tlen panos satepan uan kitekitiltiaj adivinación. Oksekimej kijtoaj motlapouiaj iuan akinmej yoixpolikej. Noijki oksekimej tetlajchiuiaj uan kitekitiltiaj magia uan miakej kitechiuiliaj miak tlamantli uan ijkon tetlajchiuiaj. *
4. Xikijto kox miakej kineltokaj naualotl.
4 Itech nochi tlaltikpak kitekitiltiaj naualotl. Sekimej ixtlamatkej otlajtlankej itech 18 altepemej tlen pouij Latinoamérica uan Caribe, okijtojkej kinneltokiliaj akinmej kitekitiltiaj magia, tetlajchiuiaj uan miakej okijtojkej uelis motlapouiskej iuan akinmej yoixpolikej. Noijki oksekimej ixtlamatkej otlajtlankej itech 18 altepemej tlen pouij África noijki okijtojkej kinneltokiliaj akinmej tetlajchiuiaj. Maski san kanin tichantij, ma timomaluikan porque Diablo kineki tinochtin techkajkayauas (Apoc. 12:9).
5. ¿Ken kita Jehová naualotl?
5 Jehová ‘kijtoa tlan milák’ (Rom. 3:4). Ye kitlajyaltia naualotl uan nochi tlen itech poui. Jehová okinmilui israelitas: “Amikaj ma yeto akin kinpanoltia ikoneuan ijtik tlitl, tlen kitekitiltia adivinación, tlen kitekitiltia magia, tlen kitemoa akin tlatetsauia, tlen tetlajchiuia, tlen kitechiuilia tlen amo kuali, tlen kitlajtlania se nauali, noso ikaj tlen kijtoa tlen panos satepan nion ikaj tlen motlapouia iuan akinmej yomikej. Jehová kitlajyaltia akin kichiua nochi nin tlamantli” (Deut. 18:10-12). Akinmej tikchiuaj ken Cristo ayakmo tiktlakamatij tlanauatil tlen okinmakakej israelitas. Pero kuali tikmatij Jehová ok kitlajyaltia naualotl (Mal. 3:6).
6. (1) ¿Ken kineki Satanás tlakajkayauas ika naualotl? (2) Ijkon ken kijtoa Eclesiastés 9:5, ¿ken katej akinmej yoixpolikej?
6 Jehová techiluia ma tikixtopeuakan naualotl porque ye kimati Satanás ika tlakajkayaua. Satanás kineki techkajkayauas ijkuak kijtoa akinmej ixpoliuij ok kanaj yoltokej (xiktlajtolti Eclesiastés 9:5). Kitekitiltia non tlamantli para kinmomojtis oksekimej uan ijkon kichiua porque amo kineki ma tlaneltokakan itech toTajtsin Dios. Kineki okachi ma kinneltokilikan amo kuali ejekamej uan amo ma tlaneltokakan itech toTajtsin Dios.
¿KEN TIKINMIXNAMIKISKEJ AMO KUALI EJEKAMEJ?
7. ¿Tlen kineki Jehová ma tikmatikan?
7 Axkan yotimomachtijkej Jehová kineki ma tikmatikan tlen ika tlakajkayaua Satanás uan amo kuali ejekamej. Ma tikitakan tlen uelis techpaleuis ma tikixtopeuakan Satanás uan amo kuali ejekamej.
8. (1) ¿Ken uelis tikinmixnamikiskej amo kuali ejekamej? (2) Ijkon ken kijtoa Salmo 146:4, ¿ken katej akinmej yoixpolikej?
8 Ma tiktlajtoltikan Biblia uan itech ma timokuayejyekokan. Tla ijkon tikchiuaskej, techpaleuis ma tikixtopeuakan tlen ika tlakajkayauaj amo kuali ejekamej. ITlajtol toTajtsin Dios kajki ken se espada tlen sapanoa tlateki uan techpaleuia ma tikixtopeuakan tlen ika tlakajkayaua Satanás (Efes. 6:17). Biblia kijtoa akinmej ixpoliuij ayakmo touan motlapouiaj (xiktlajtolti Salmo 146:4). Noijki techiluia san Jehová uelis kijtos tlen techpanos satepan (Is. 45:21; 46:10). Tla nochipa tiktlajtoltiaj Biblia uan itech timokuayejyekoaj, techpaleuis ma tikixtopeuakan tlen ika tlakajkayauaj amo kuali ejekamej.
9. ¿Tlen tlamantli poui itech naualotl?
9 Amitlaj ma tikchiuakan tlen poui itech naualotl. Tejuan akinmej tikchiuaj ken Cristo, amo tiauij tikitatiuij se nauali nion tiktemoaj ken timotlapouiskej iuan akinmej yoixpolikej. Ijkon ken otimomachtijkej itech okse tlamachtil, tejuan amo tikinmiluichiuiliaj akinmej yoixpolikej uan amo tikneltokaj ok kanaj yoltokej. Noijki amo tiauij tikinmitatiuij tlachixkej nion akinmej kitekitiltiaj adivinación (Is. 8:19). Amo tikchiuaj nion se tlamantli tlen poui itech naualotl. Nochi nin tlamantli teijtlakoa uan kichiuas ma tikpaleuikan Satanás uan amo kuali ejekamej.
Ijkon ken okichijkej itech achto siglo, ma tikpojpolokan nochi tlamantli tlen poui itech naualotl uan amo ika ma timoyolpaktikan. (Xikinmita párrafos 10 a 12).
10, 11. (1) Itech achto siglo, ¿tlen okichijkej akinmej ochantiayaj Éfeso? (2) Ijkon ken kijtoa 1 Corintios 10:21, ¿tleka ma tikchiuakan ken akinmej ochantiayaj Éfeso uan ken uelis tikchiuaskej?
10 Amitlaj ma tikpiakan tlen mouika iuan naualotl. Itech achto siglo sekimej tlen ochantiayaj Éfeso okichiuayaj naualotl. Pero itlaj okichijkej ijkuak okimatkej tlen tlamachtia Biblia. Biblia kijtoa: “Miakeh non otetlajchiwiayah, okwalinwikakeh intlajkuilolwah non intech omomachtiayah para tetlajchiwiskeh iwa teixpa okinchichinojkeh” (Hech. 19:19). San niman okikajkej non tlamantli. Amochmej tlen okintekitiltiayaj okatkaj patiojkej pero okintlatijkej uan amo okintetliokolijkej nion okinnemakakej. Yejuan okinekiayaj kiyolpaktiskej Jehová, ik non, amo okinyolkoko kintlatiskej amochmej.
11 ¿Ken uelis tikchiuaskej ken yejuan okichijkej? Ma tikpojpolokan tla itlaj tikpiaj tlen poui itech naualotl. Sekimej kimopililiaj seki tlamantli uan ijkon amitlaj kinpanos, sekimej itlaj kipiloaj itech tepamitl noso itlaj kitekitiltiaj uan ijkon amo ma kintlajchiuikan (xiktlajtolti 1 Corintios 10:21).
12. ¿Tlen moneki timotlajtlaniskej ijkuak timoyolpaktiskej?
12 Kuali ma tikitakan tlen ika timoyolpaktiaj. Ma timotlajtlanikan: “¿Nikintlajtoltia amochmej, revistas noso niktemoa itech Internet tlen poui itech naualotl? ¿Tlajtoa itech naualotl tlatsotsonali tlen nikkaki, películas tlen nikinmita, tlen kipanoltiaj itech televisión noso videojuegos? ¿Nimoyolpaktia ika tlen poui itech naualotl? ¿Nimoyolpaktia ika tlamantli kanin motaj vampiros, zombis noso kanin mota tlapaleuiaj amo kuali ejekamej? ¿Nimoyolpaktia ika tlamantli kanin mota kitekitiltiaj magia, kanin tetlajchiuiaj, kitechiuiliaj tlen amo kuali uan nin mota amo tlajtlakoli tla tikchiuaskej?”. Pero nin amo kijtosneki nochi cuentos noso okseki tlamantli kipia naualotl. Ik non, ijkuak timoyolpaktiskej, kuali ma tikpejpenakan tlen kiyolpaktia toTajtsin Dios. Tiknekij tikpiaskej chipauak totlalnamikilis ixpan Jehová (Hech. 24:16). *
13. ¿Tlen amo tiknekij tikchiuaskej?
13 Amo ma timotlapouikan itech amo kuali ejekamej. Ma tikchiuakan ken Jesús (1 Ped. 2:21). Ijkuak okatka iluikak, okimatiaya tlen kichiua Satanás uan amo kuali ejekamej. Pero ijkuak ouala tlaltikpak amo otetlapoui itech Satanás uan amo kuali ejekamej. Jesús otetlapoui itech iTajtsin uan amo itech Satanás. Ijkon ken Jesús tejuan amo tikijtojtinemij tlen kichiuaj amo kuali ejekamej. Tejuan tiyolpakij tiktematiltiaj tlen melauak tlamachtia Biblia (Sal. 45:1).
Amo ma techmomojtikan amo kuali ejekamej porque Jehová, Jesús uan ángeles okachi kipiaj chikaualistli. (Xikita párrafo 14 uan 15). *
14. ¿Tleka amo ma techmomojtikan amo kuali ejekamej?
14 Amo ma techmomojtikan amo kuali ejekamej. Axkan uelis itlaj techpanos. Xamo itlaj techpanotikisa, tiualmokokoskej noso tiualixpoliuiskej. Pero ¿intlajtlakol amo kuali ejekamej ijkuak ijkon techpanoa? Biblia kiyekijtoa tinochtin uelis techpanos itlaj tlen amo tikchiaj (Ecl. 9:11). Noijki ma tikilnamiktokan Jehová okachi kipia chikaualistli uan amo yejuan amo kuali ejekamej. Ma tikitakan tlen okipanok Job. Jehová amo okikauili Satanás ma kimikti Job (Job 2:6). Ijkuak okatka Moisés, noijki Jehová okiteititi okachi kipia chikaualistli uan amo yejuan teopixkej tlen okichiuayaj magia ompa Egipto (Éx. 8:18; 9:11). Satepan Jesús okiseli chikaualistli uan okiualtlamotlak Satanás uan amo kuali ejekamej nikan tlaltikpak. Noijki ayakmo miak poliui Jesús kintlamotlas kanin “sentlawejkatlantik” uan ayakmo ikaj kitlajyouiltiskej (Apoc. 12:9; 20:2, 3).
15. ¿Tlen tlamantli kiteititia Jehová kimaluia ialtepe?
15 Noijki Jehová axkan kimaluia ialtepe. Ma tikilnamiktokan titetlapouiaj uan titlamachtiaj itech nochi tlaltikpak (Mat. 28:19, 20, TNM). Tiktematiltiaj nochi tlen Diablo ika tlakajkayaua. Tla ye ueliskia, ayakmo techkauilis ma titetlapouikan. Pero amo uelis ijkon kichiuas. Ik non, amo ma techmomojtikan amo kuali ejekamej. Tikmatij “ixtololouan Jehová tlachixtokej itech nochi tlaltikpak para kinpaleuis akinmej ixpan kipiaj ajsitok inyolo” (2 Crón. 16:9). Amo kuali ejekamej amitlaj uelis techchiuiliskej tla tikatej tiyolmelajkej ixpan Jehová.
JEHOVÁ KINTEOCHIUA AKINMEJ KISELIAJ MA KINPALEUI
16, 17. Xikijto tleka moneki ma tiyetokan tiyolchikauakej.
16 Moneki tiyetoskej tiyolchikauakej uan ijkon tikinmixtopeuaskej amo kuali ejekamej. Nin xamo techpanos ijkuak tokalchanejkauan noso toyolikniuan techiluiskej ma tikchiuakan seki costumbres. Pero Jehová techteochiuas tla tiyetoskej tiyolchikauakej. Ma tikitakan tlen okipanok se tokni itoka Erica tlen chanti Ghana. Okipiaya 21 xiuitl ijkuak opejki momachtia Biblia. Itajtsin otetlajchiuiaya, ik non, ikalchanejkauan okinekiayaj ye noijki ma kikua nakatl tlen itajtsin okinmaniliaya teotsitsintin. Ijkuak Erica okijto amo kikuaskia, ikalchanejkauan okijtojkej okinmixnamikiaya teotsitsintin. Okineltokayaj ninmej teotsitsintin kichiuaskiaj ma mokokokan uan noijki ma tlapolokan.
17 Ikalchanejkauan Erica okinekiayaj ma kichiua non tlamantli. Pero ye amo okinek maski okiluijkej oksekan ma chantiti. Jehová okiteochi Erica ijkuak sekimej tokniuan okiluijkej inmiuan ma chantiti (Mar. 10:29, 30). Ikalchanejkauan okikokoliayaj uan okitlatijkej nochi tlen iaxka. Pero ye amo keman okika Jehová, omoapolakti uan omochi precursora regular. Amo okimomojtijkej amo kuali ejekamej. Okijto: “Nochipa niktlajtlanilia toTajtsin Dios akin sapanoa techtlasojtla ma kinpaleui nokalchanejkauan ma yolpakikan ijkuak kixmatiskej uan ma kitekichiuilikan”.
18. ¿Ken techteochiuas Jehová tla itech titlaneltokaj?
18 Amo tinochtin techpanos ijkon ken Erica. Pero tinochtin moneki tikinmixnamikiskej amo kuali ejekamej uan moneki titlaneltokaskej itech Jehová. Ye techteochiuas tla ijkon tikchiuaskej. Noijki Satanás amo techkajkayauas. Amo techmomojtiskej amo kuali ejekamej uan nochipa tiktekichiuiliskej Jehová. Okachi kuali iuan timouikaskej. Santiago okijkuilo: “Xikmopantikah Dios iwa ximochijchikawakah para amo manomechtlani n amokualitlakatl, iwa ye nomechcholilis. Xiwalmijkuanikah [ximotokikan] inawak Dios, iwa Ye mijkuanis [motokis] nomonawak” (Sant. 4:7, 8).
TLAKUIKALI 150 ¡Jehová mitsmakixtis!
^ párr. 5 Jehová akin sapanoa techtlasojtla technejmachtia amo kuali ejekamej tetlajyouiltiaj uan uelis techijtlakoskej. ¿Ken tlakajkayauaj? ¿Tlen uelis tikchiuaskej uan ijkon amo ma techijtlakokan? Itech nin tlamachtil tikitaskej ken techpaleuia Jehová amo ma techijtlakokan amo kuali ejekamej.
^ párr. 3 TLEN OKACHI IPATI: Itech naualotl poui nochi tlen kichiuaj amo kuali ejekamej. Ma tikitakan seki tlamantli. Miakej kineltokaj uelis motlapouiskej iuan akinmej yoixpolikej uan noijki kineltokaj kinekij inmiuan motlapouiskej. Nin kichiuaj ijkuak yauij kitatiuij nauali. Tlen kichiuaj tlachixkej, akinmej kitekitiltiaj adivinación, akinmej kitekitiltiaj magia, akinmej tetlajchiuiaj, akinmej san tlen amo kineltokaj uan nochi tlen mouika iuan amo kuali ejekamej, nochi nin tlamantli naualotl.
^ párr. 12 Tlayekankej amo uelis technauatiskej tlen ika timoyolpaktiskej. Tejuan moneki kuali tikmachtiskej totlalnamikilis ika Biblia uan ijkon tikpejpenaskej tlen tiktlajtoltiskej, tlen tikitaskej uan tlen ika timauiltiskej. Tetajmej noijki moneki kuali kitaskej inkoneuan ma moyekanakan ika principios bíblicos. Xikalaki itech jw.org® kanin kijtoa ITECH TEJUAN > TLEN MIAKEJ MOTLAJTLANIAJ uan xikita tlamachtil “¿ITlaixpantijkauan Jehová kipiaj se amatl kanin kijtoa tlen películas, tlakuikalmej noso amochmej amo uelis kipiaskej?”.
^ párr. 56 FOTO: Mota Jesús kinyekana miakej ángeles porque ye tekiua uan tlakpak kajki itrono Jehová.
