1, 2. ¿Tleka Jesús sapanoa omotekipachoaya?

JESÚS okixnamik ouijkayotl ijkuak yikimiktiskiaj. Okimatiaya sapanoa kitlajyouiltiskiaj akinmej okikokoliayaj. Pero okachi okitekipachoaya okse tlamantli. Ye okachi okinekiaya kiyolpaktis iTajtsin porque sapanoa kitlasojtla. Tlapaleuiskia ma mochipaua itoka toTajtsin Dios tla ye yetoskia yolmelajki ijkuak tlajyouiskia. Kuali okimatoka tla yetoskia yolmelajki maski kimiktiskiaj, techpaleuiskia ma tikpiakan yolilistli tlen amo keman tlamis.

² Jesús okipiaya yolseuilistli maski otlajyoui. Itlatitlaniluan yokinmiluijka: “Noyolsewilis nomechmaka” (Juan 14:27). Okipiaya “iyolsewilis Dios”. Ijkuak ikaj kipia iyolseuilis toTajtsin Dios, kijtosneki kuali iuan mouika. Ik non, Jesús kuali omomachili (Filip. 4:6, 7).

3. ¿Tlen timomachtiskej?

³ Tejuan amo titlajyouiskej ken Jesús. Pero tikixnamikiskej ouijkayotl porque tikchiuaj ken ye (Mat. 16:24, 25; Juan 15:20). Xamo timotekipachoskej ken ye. ¿Tlen tikchiuaskej para amo nochipa ma timotekipachojtokan uan ma tikpiakan yolseuilistli? Axkan tikitaskej eyi tlamantli tlen Jesús okipaleui ijkuak otetlapoui. Noijki tikitaskej ken tikchiuaskej ken ye maski tikixnamikij ouijkayotl.

4. Ijkon ken kijtoa 1 Tesalonicenses 5:17, ¿ken tikmatij Jesús nochipa omotlatlaujti ijkuak okatka nikan tlaltikpak?

⁴ (Xiktlajtolti 1 Tesalonicenses 5:17). Ye nochipa omotlatlaujti ijkuak yikimiktiskiaj. Ijkuak Jesús okinmachti imachtijkauan ken kilnamikiskiaj imikilis, omotlatlaujti ijkuak yikikuaskiaj pan uan ijkuak yikoniskiaj vino (1 Cor. 11:23-25). Noijki inmiuan omotlatlaujti ijkuak ok okatkaj kanin okichijkej Pascua (Juan 17:1-26). Jesús noijki omotlatlaujti ijkuak oajsitoj ompa Getsemaní (Mat. 26:36-39, 42, 44). Ijkuak yimikiskia noijki omotlatlaujti ixpan iTajtsin (Luc. 23:46). Nochi nin techititia Jesús nochipa omotlatlaujti porque okinekiaya nochi ma kimati iTajtsin tlen okipanoaya.

5. ¿Tleka itlatitlaniluan Jesús omomojtijkej?

⁵ Jesús nochipa otlaxiko porque nochipa okiluiaya Jehová ma kipaleui. Pero se yoak, itlatitlaniluan amo ijkon okichijkej uan omomojtijkej ijkuak okikitskijkej Jesús (Mat. 26:40, 41, 43, 45, 56). ¿Tlen techmachtia tlen okichijkej? Uelis tiyetoskej tiyolmelajkej tla timotlatlaujtiaj ken Jesús okichi. Pero ¿tlen moneki tiktlajtlaniliskej Jehová?

6. ¿Tleka techpaleuis totlaneltokilis ma tikpiakan yolseuilistli?

⁶ Ma tikiluikan Jehová ma techpaleui okachi ma titlaneltokakan (Luc. 17:5; Juan 14:1). Moneki tikiluiskej Jehová ma techpaleui porque Satanás techtlajyouiltia akinmej tiimachtijkauan Jesús (Luc. 22:31). Tla okachi titlaneltokaskej, tikpiaskej yolseuilistli maski tikixnamikiskej  ouijkayotl. ¿Tleka? Porque tla yotikchijkej nochi tlen moneki para ma moyektlali ouijkayotl, satepan tikkauiliskej Jehová ma kiyektlali. Ma tikneltokakan Jehová techpaleuis uan non kichiuas ma tikpiakan yolseuilistli (1 Ped. 5:6, 7).

7. ¿Tlen techmachtia tlen okijto tokni Robert?

⁷ Tla tiktlatlaujtiskej Jehová, techpaleuis ma tikpiakan yolseuilistli maski tikixnamikiskej ouijkayotl. Ma tikitakan tlen okipanok Robert, ye tlayekanki uan yikipia kanaj ochenta xiuitl. Ye okijto tlen okipaleui ma kipia yolseuilistli. Okijto: “Tlen kijtoa Filipenses 4:6, 7 nochipa nechpaleuia ma nikixnamiki ouijkayotl. Ualeua amo nikpia tomin uan noijki yiuejkika ayakmo onikatka nitlayekanki”. Noijki okijto: “Niktlatlaujtia toTajtsin Dios ma nechpaleui ijkuak peua nimotekipachoa. Okachi nikpia yolseuilistli tla okachi nimotlatlaujtia”.

8. Ijkon ken kijtoa Juan 8:29, ¿tlen okse tlamantli okipaleui Jesús ma kipia yolseuilistli?

⁸ (Xiktlajtolti Juan 8:29). Jesús okipiaya yolseuilistli maski okitlajyouiltijkej. ¿Tleka? Porque ye okimatiaya okiyolpaktijtoka iTajtsin. Nochipa okitlakamatki iTajtsin. Okitekichiuili Jehová porque okitlasojtlaya. Jesús yokatka inauak toTajtsin Dios “ken se kuali itekipanojka” achto ualaskia nikan tlaltikpak (Prov. 8:30). Ijkuak yokatka nikan tlaltikpak, oyolpakik ijkuak okinmachti oksekimej itech  iTajtsin (Mat. 6:9; Juan 5:17). Sapanoa oyolpakik ijkuak ijkon okichi (Juan 4:34-36).

9. ¿Tleka tikpiaj yolseuilistli ijkuak titetlapouiaj?

⁹ Tikchiuaj ken Jesús tla tiktlakamatij Jehová uan ‘tikmopantiah iteki n Toteko’ (1 Cor. 15:58). Tla timochijchikauaj nochipa titetlapouiskej amo san techtekipachojtos ouijkayotl tlen tikixnamikij (Hech. 18:5). Tejuan amo tikatej ken akinmej tikintlapouiaj porque yejuan okachi miak tlamantli kixnamikij. Pero ijkuak peuaj kitlasojtlaj Jehová, innemilis mopatla uan yolpakij. Ijkuak tikitaj melauak ijkon panoa, okachi tikneltokaj Jehová techmaluis. Non techpaleuia ma tikpiakan yolseuilistli. Se tokni kijtoa melauak kipaleuia ma kipia yolseuilistli porque ye yimiak xiuitl moyolkokoa uan momachilia amitlaj ipati. Okijto: “Ijkuak nitetlapouia, ayakmo okachi nimoyolkokoa uan niyolpaki. Nikneltoka non nechpaleuia okachi ma nimouika iuan Jehová”.

10. ¿Tlen techmachtia tlen okijto Brenda?

¹⁰ Ma tikitakan tlen kipanoa tokni Brenda. Ye uan ichpoch sapanoa mokokoaj. Brenda kiuikatinemij ika silla de ruedas porque amo tlaxikoa. Ijkuak kuali momachilia kiuikaj tokniuan ma tetlapouiti. Pero okachi kinmijkuiloa cartas uan ijkon ueli tetlapouia. Okijto: “Onikajsikamatki axkan amo nipajtis, onimoyolchika uan okachi niktekichiuilia Jehová. Ayakmo nimotekipachoa ijkuak nitetlapouia. Nimochijchikaua nikinpaleuis oksekimej ma kixmatikan Jehová. Noijki nochipa nikilnamiktok tlen kichiuas toTajtsin Dios”.

11-13. (1) ¿Ken okiteititijkej tlatitlanilmej uan oksekimej kuali omouikayaj iuan Jesús? (2) ¿Ken okipaleui Jesús porque omouikaya iuan oksekimej?

¹¹ Jesús okixnamik miak ouijkayotl ijkuak otetlapoui. Pero itlatitlaniluan okiteititijkej melauak okinekiayaj kipaleuiskej. Okichijkej ken kijtoa Proverbios 18:24: “Onka se toyolikni tlen okachi kuali iuan timouikaj uan amo ken iuan se tokni”. Jesús sapanoa okintlasojtlak itlatitlaniluan. Kuali tikmatij ikniuan Jesús amitlaj okineltokiliayaj (Juan 7:3-5). Sekimej ikalchanejkauan okijtojkej Jesús otlapoloaya (Mar. 3:21). Pero itlatitlaniluan amo ijkon okijtojkej. Se yoak ijkuak yikimiktiskiaj, okinmilui itlatitlaniluan: “Nomejwah nochipa nontlaijyowijtinemih nowa” (Luc. 22:28).

¹² Ualeua tlatitlanilmej okiyolkokojkej Jesús. Pero ye amo san okitak tlen amo kuali okichiuayaj. Jesús okitak yejuan otlaneltokayaj (Mat. 26:40; Mar. 10:13, 14; Juan 6:66-69). Se yoak, ijkuak yikimiktiskiaj okatka iuan ninmej tlakamej yolmelajkej uan okinmilui: “Nomechnotsas notlakaikniwah, porke yonomechmatilti nochi tlan Notajtsi onechili” (Juan 15:15). Melauak okiyolchikajkej iyolikniuan. Jesús oyolpakik ijkuak okipaleuijkej itlatitlaniluan (Luc. 10:17, 21).

¹³ Pero amo san itlatitlaniluan okipaleuijkej. Noijki iyolikniuan iuan otetlapouijkej. Sekimej okinpanoltiayaj inkalijtik ma tlakuakan (Luc. 10:38-42; Juan 12:1, 2). Oksekimej iuan otetlapouitoj uan okimakakej tlen okipoloaya Jesús (Luc. 8:3). ¿Tleka  Jesús kuali omouikaya iuan iyolikniuan? Porque ye okipiaya kuali iyelis. Noijki okinpaleui uan amo okinmilui ma kitlaxtlauikan. Jesús okintlasojkamatili maski yejuan okatkaj tlajtlakolejkej. Ijkon okipaleuijkej ma kipia yolseuilistli.

14. ¿Ken uelis timouikaskej iuan oksekimej?

¹⁴ Toyolikniuan techpaleuiskej amo keman ma tikkauakan Jehová. Pero moneki ma tikpiakan kuali toyelis uan ijkon touan mouikaskej (Mat. 7:12). Ma tikitakan ken uelis tikteititiskej tikpiaj kuali toyelis. Biblia kijtoa ma tikinpaleuikan oksekimej ijkuak itlaj kinpanoa (Efes. 4:28). Xamo moneki ma tikinpaleuikan tokniuan tlen inmiuan timonechikoaj. Xamo onka se tokni tlen amo ueli kanaj yaui. Ma tiktlajtlanikan kox kineki ma tiktlakouitij. Ma tikinuikilikan tlakuali tokniuan tlen amo kipiaj tlen ika mopanoltiskej. Tla tikmatij tiktekitiltiskej jw.org^® uan JW Library^® ma tikinmititikan tokniuan ken kitekitiltiskej uan ijkon ika ma momachtikan. Okachi tiyolpakiskej tla tikinpaleuiskej tokniuan (Hech. 20:35, TNM).

15. ¿Ken uelis techpaleuiskej toyolikniuan?

¹⁵ Toyolikniuan techpaleuiskej ijkuak tikixnamikiskej ouijkayotl. Noijki techpaleuiskej ma tikpiakan yolseuilistli. Elihú okikak Job ijkuak okitlapoui tlen okitekipachoaya. Tejuan noijki techkakiskej toyolikniuan ijkuak tikintlapouiskej tlen techtekipachoa (Job 32:4). Pero amo ma tikchiakan yejuan ma techiluikan tlen tikchiuaskej.  Moneki kuali ma tikinkakikan ijkuak techiluiaj ken techpaleuia tlen kijtoa Biblia (Prov. 15:22). Noijki ma tikinkauilikan ma techpaleuikan ijkuak monekis uan amo ma timoueyinekikan (2 Sam. 17:27-29). Tikitaj se tlateochiualistli tikinpiaj toyolikniuan (Sant. 1:17).

16. Ijkon ken kijtoa Filipenses 4:6, 7, xikijto ken tikpiaskej yolseuilistli.

¹⁶ (Xiktlajtolti Filipenses 4:6, 7). ¿Tleka Jehová techiluia tikpiaskej yolseuilistli san ika Jesús? Porque tla tiknekij tikpiaskej yolseuilistli, moneki tikajsikamatiskej ken tlapaleuia Jesús ma mochiua tlen iTajtsin kineki uan noijki itech ma titlaneltokakan. Techyolseuia tikmatij toTajtsin Dios techtlapojpoluia porque Jesús topatka omotemakak (1 Juan 2:12). Noijki ye kiyekana iTekiuajkayo toTajtsin Dios uan kitlajtlamis nochi tlen kiyekana Satanás (Is. 65:17; 1 Juan 3:8; Apoc. 21:3, 4). Kuali tikmatij Jesús techpaleuis ma tiktekichiuilikan Jehová itlamian ninmej tonalmej (Mat. 28:19, 20, TNM). Sapanoa techpaleuia ma tikmatikan tlen kichiuas toTajtsin Dios, ma tiyetokan tiyolchikauakej uan ijkon tikpiaskej yolseuilistli.

17. (1) ¿Ken uelis nochipa tikpiaskej yolseuilistli? (2) Ijkon ken kijtoa Juan 16:33, ¿ken techpaleuis tla tikpiaskej iyolseuilis toTajtsin Dios?

¹⁷ Pero ¿ken tikpiaskej yolseuilistli ijkuak tikixnamikiskej ouijkayotl? Ma tikchiuakan ken Jesús. Achto nochipa ma timotlatlaujtikan. Ma tiktlakamatikan Jehová uan ma tiyolpakikan ijkuak titetlapouiaj maski tikixnamikij ouijkayotl. Ma tikinkauilikan toyolikniuan ma techpaleuikan. Ijkon iyolseuilis toTajtsin Dios kimaluis tokuayejyekol uan toyolo. Non techpaleuis ma tikixnamikikan ouijkayotl ijkon ken okichi Jesús (xiktlajtolti Juan 16:33).