1. ¿Tlen tikchiuaj ijkuak tiknekij ikaj iuan timouikaskej?

IJKUAK tiknekij ikaj iuan timouikaskej, peua iuan timotlapouiaj tlen timokuayejyekouaj, tlen tikmachiliaj uan tlen techpanoua. Pero xamo oui tikitaj timouikaskej iuan Jesús. Ma tikitakan tleka ijkon tikijtouaj.

2. ¿Tleka oui tikitaj timouikaskej iuan Jesús?

² Achto, tejuan amo ueli tikitaj Jesús. Sekimej tokniuan tlen okatkaj achto siglo ijkon okinpanok. Pero tlatitlanil Pedro okinmilui: “Nomejwah nonkitlasojtlah n Cristo, iwa nonkineltokah maya amo nonkitah” (1 Ped. 1:8). Non techititia uelis timouikaskej iuan Jesús maski amo tikitaj.

3. ¿Tleka amo ueli timotlapouiaj iuan Jesús?

³ Noijki amo ueli timotlapouiaj iuan Jesús. Porque ijkuak timotlatlaujtiaj timotlapouiaj iuan Jehová. Tiktlatlaujtiaj Jehová ika itoka Jesús pero amo ye iuan timotlapouiaj. Jesús amo kineki ma tiktlatlaujtikan porque ijkuak timotlatlaujtiaj tikueyichiuaj Jehová (Mat. 4:10). Pero uelis tikteititiskej tiktlasojtlaj Jesús.

4. (1) ¿Tlen uelis tikchiuaskej maski amo tikatej iuan Jesús? (2) ¿Tlen timomachtiskej?

⁴ Noijki amo tikatej iuan Jesús porque ye chanti iluikak.  Pero uelis tikixmatiskej maski amo iuan tikatej. Axkan tikitaskej naui tlamantli tlen techpaleuis ma timouikakan iuan Jesús. Achto ma tikitakan tleka miak ipati iuan ma timouikakan.

5. ¿Tleka moneki ma timouikakan iuan Jesús? (Xikita recuadro “ Timouikaskej iuan Jehová tla timouikaj iuan Jesús” uan “ Ma tiktlasojtlakan Jesús ken moneki”).

⁵ Moneki kuali timouikaskej iuan Jesús tla tiknekij timouikaskej iuan Jehová. ¿Tleka? Ma tikitakan ome tlamantli. Jesús okinmilui imachtijkauan: “Notajtsi inewia nomechtlasojtla porke nomejwah nonnechtlasojtlah” (Juan 16:27). Noijki okinmilui: “Sanwel akin nechtlakita weletis kalakiti inawak Notajtsi” (Juan 14:6). Amo uelis tikijtoskej san timouikaskej iuan Jehová uan amo timouikaskej iuan Jesús. Porque yetoskia ken tiknekij tikalakiskej itech se kali pero amo tipanoskej kanin kajki puerta. Jesús noijki okijto se neskayotl: “Ne n kaltentli kan ik kalakih n ichkameh” (Juan 10:7). Jesús noijki okiteititi ken kipia iyelis iTajtsin. Okinmilui imachtijkauan: “Akin yonechitak kijtosneki yokitak Notajtsi” (Juan 14:9). Moneki tikixmatiskej Jesús tla tiknekij tikixmatiskej Jehová. Okachi tiktlasojtlaskej tla timomachtiskej ken kipia iyelis. Tla timouikaskej iuan Jesús okachi tiktlasojtlaskej Jehová.

6. Xikijto tleka moneki timouikaskej iuan Jesús.

⁶ Moneki ma timouikakan iuan Jesús tla tiknekij ma technankili toTajtsin Dios ijkuak tiktlatlaujtiaj. Nin kijtosneki amo san ma tikijtokan itoka Jesús  ijkuak tlami timotlatlaujtiaj. Moneki ma tikajsikamatikan ken kitekitiltia Jehová iKone para technankilis ijkuak tiktlatlaujtiaj. Jesús okinmilui itlatitlaniluan: “Nochi tlan nonkitlajtlaniliskeh Notajtsi ika Notoka, Ne nikchiwas” (Juan 14:13). Jehová techkaki ijkuak tiktlatlaujtiaj uan technankilia pero iKone okitlali ma kichiua tlen ye kijtoua (Mat. 28:18). Jehová achto kita kox tiktlakamatij tlen okijto Jesús: “Tla nomejwah nonkintlapojpolwiah non nomechtoktiah tlan amo kuali, Nomotajtsi non kajki ilwikak noiwa nomechtlapojpolwis. Pero tla amo nonkintlapojpolwiah n tlakah, noiwa Nomotajtsi amo nomechtlapojpolwis” (Mat. 6:14, 15). Nin kiteititia ma tikintlasojtlakan oksekimej ijkon ken Jehová uan Jesús techtlasojtlaj.

7. ¿Tlen moneki tikchiuaskej tla tiknekij ma techpaleui ijkuak Jesús topatka omotemakak?

⁷ San akinmej kuali mouikaj iuan Jesús kinpaleuis ijkuak topatka omotemakak. ¿Ken tikmatij? Jesús okijto motemakaskia “makimiktikah ipatka itlakaikniwah” (Juan 15:13). Itekipanojkauan toTajtsin Dios tlen yiuejkika okatkaj kixmatiskej Jesús uan kitlasojtlaskej. Tlakamej uan siuamej ken Abrahán, Sara, Moisés uan Rahab kinyolitiskej pero moneki mouikaskej iuan Jesús tla kinekiskej nochipa yoltoskej (Juan 17:3; Hech. 24:15; Heb. 11:8-12, 24-26, 31).

8, 9. Ijkon ken kijtoua Juan 15:4, 5, ¿tlen uelis tikchiuaskej tla timouikaj iuan Jesús uan tleka moneki nochipa iuan ma timouikakan?

⁸ Se tlateochiuali tikpaleuiaj Jesús ijkuak titetlapouiaj uan titlamachtiaj kuali tlajtolmej itech Tekiuajkayotl. Ijkuak Jesús okatka nikan tlaltikpak okinmachti oksekimej akin iTajtsin. Maski oyajki iluikak, ok kiyekana tetlapouilistli uan kita ma titlamachtikan. Ye kita uan kipatioita timochijchikauaj tikinpaleuiskej oksekimej ma kixmatikan uan noijki iTajtsin. San Jehová uan Jesús uelis techpaleuiskej ma titetlapouikan uan ma titlamachtikan (xiktlajtolti Juan 15:4, 5).

⁹ Biblia kijtoua moneki tiktlasojtlaskej Jesús tla tiknekij tikyolpaktiskej Jehová. Ik non, axkan ma tikitakan naui tlamantli tlen techpaleuis ma timouikakan iuan Jesús.

10. ¿Tlen moneki tikchiuaskej tla tiknekij timouikaskej iuan Jesús?

¹⁰ Ma tikixmatikan Jesús. Ik non, ma tiktlajtoltikan amochtli Mateo, Marcos, Lucas uan Juan. Ninmej amochmej techpaleuiskej ma timokuayejyekokan Jesús okintlasojtlak oksekimej. Non techpaleuis ma tiktlasojtlakan uan ma tiktlakaitakan. Ma tikitakan tlen okichi. Ye amo keman okinmitak imachtijkauan ken itlakeualuan maski ye okinmachtiaya. Ye inmiuan omouikaya, okinmilui tlen omokuayejyekouaya uan tlen okimachiliaya (Juan 15:15). Okimachiliaya tlen okinpanouaya uan inmiuan ochokaya (Juan 11:32-36). Akinmej okikokoliayaj Jesús okitakej omouikaya iuan akinmej okiseliayaj tlen otlamachtiaya (Mat. 11:19). Ma tikchiuakan ken Jesús okichi. Ijkon kuali timouikaskej iuan oksekimej, tiyolpakiskej,  tiktlasojtlaskej Jesús uan okachi tiktlakaitaskej.

11. ¿Tlen okse tlamantli techpaleuis ma timouikakan iuan Jesús uan tleka miak ipati?

¹¹ Ma timokuayejyekokan ken Jesús uan ma tikchiuakan ken ye. Okachi timouikaskej iuan Jesús tla okachi tikixmatiskej uan timokuayejyekoskej ken ye (1 Cor. 2:16). ¿Ken uelis tikchiuaskej ken ye? Ma tikitakan tlen techpaleuis. Jesús okinpaleuiaya oksekimej uan amo san omoyolpaktiaya (Mat. 20:28; Rom. 15:1-3). Ye okimatoka omonekiaya mochijchikauas kinpaleuis oksekimej uan noijki okintlapojpoluiaya. Amo san niman okualaniaya ijkuak oksekimej okiteneuayaj (Juan 1:46, 47). Amo san okilnamiktoka tlen oksekimej amo kuali okichiuayaj (1 Tim. 1:12-14). Miak ipati ma tikchiuakan ken ye okichi. Ye okijto: “Tla nomejwah nonmosepantlasojtlah, nochteh n tlaltikpaktlakah nomechitaskeh nomejwah de milajka notlamachtijkawah” (Juan 13:35). Ik non, ma timotlajtlanikan: “¿Nimouika iuan nokniuan ika yolseuilistli ijkon ken okichi Jesús?”.

12. ¿Tlen okse tlamantli techpaleuis ma timouikakan iuan Jesús uan ken tikchiuaj?

¹² Ma tikinpaleuikan ikniuan Cristo. Ijkuak tikinpaleuiaj ikniuan Cristo yetoskia ken ye tikpaleuiaj (Mat. 25:34-40). Tikinpaleuiaj ikniuan ijkuak tiktematiltiaj Tekiuajkayotl uan tikinpaleuiaj oksekimej ma mochiuakan imachtijkauan ijkon ken ye otlanauati (Mat. 28:19, 20, TNM; Hech. 10:42). “Oksikimeh ichkameh” moneki ma kinpaleuikan ikniuan Cristo ma tetlapouikan ipan nochi tlaltikpak (Juan 10:16). Tla tipouij iuan “oksikimeh ichkameh”, tikteititiaj tikintlasojtlaj tlapejpenalmej uan Jesús ijkuak titetlapouiaj uan titlamachtiaj.

13. ¿Ken uelis tikchiuaskej tlen okijto Jesús itech Lucas 16:9?

¹³ Noijki timouikaj iuan Jehová uan Jesús ijkuak tiktemakaj tomin para ma motetlapoui (xiktlajtolti Lucas 16:9). Uelis tiktemakaskej tomin uan ika tetlapouiskej kanin okachi moneki, kinchijchiuaskej kalmej, kinmaluiskej kalmej tlen yokinchijchijkej uan ika tlapaleuiskej kanin tlaxixini. Noijki uelis tiktemakaskej tomin kanin timonechikouaj uan ma tikinpaleuikan tokniuan tlen amitlaj kipiaj (Prov. 19:17). Ijkon tikteititiaj tikinpaleuiaj ikniuan Cristo.

14. Ijkon ken kijtoua Efesios 4:15, 16, ¿tlen okachi techpaleuis ma timouikakan iuan Jesús?

¹⁴ Ma tikpaleuikan ialtepe Jehová. Jesús kiyekana tlanechikol uan kuali iuan timouikaskej tla tikinpaleuiaj tlayekankej porque yejuan okintlalijkej ma techmaluikan (xiktlajtolti Efesios 4:15, 16). Axkan ialtepe Jehová kineki okachi kuali ma tikintekitiltikan kalmej kanin timonechikouaj. Ik non, seki tlanechikolmej okinsetilijkej uan noijki okinpatilijkej kanin tetlapouiaj. Ijkon ialtepe Jehová amo miak tomin kitekitiltia. Pero ualeua tokniuan moneki momatiskej itech okse yankuik tlanechikol. Porque xamo yimiak xiuitl san sekan omonechikouayaj uan yomomatkej iuan tokniuan. Pero yokinmiluijkej ma tlapaleuikan itech okse tlanechikol. Jesús yolpaki ijkuak kita imachtijkauan yolmelajkej kichiuaj tlen kijtoua ialtepe toTajtsin Dios.

15. ¿Satepan ken timouikaskej iuan Jesús?

¹⁵ Tlapejpenalmej kichiaj yetoskej iuan Jesús uan nochipa iuan tlanauatiskej. Yejuan kitaskej, iuan motlapouiskej uan iuan yetoskej (Juan 14:2, 3). Noijki akinmej chantiskej nikan tlaltikpak yolpakiskej porque Jesús kinpaleuis uan kintlasojtlas. Maski amo kitaskej, okachi kuali iuan mouikaskej ijkuak kiseliskej tlen ye uan Jehová kinmakaskej (Is. 9:6, 7).

16. ¿Tlen tlateochiuali tikseliaj tla timouikaj iuan Jesús?

¹⁶ Tikpiaj miak tlateochiuali ijkuak timouikaj iuan Jesús. Axkan ye techtlasojtla uan techpaleuia uan satepan nochipa tiyoltoskej. Noijki techpaleuia ma timouikakan iuan Jehová. Se ueyi tlateochiuali timouikaj iuan Jesús